الموضوع: تقرير بالتفاصيل عن تغيير التيل وعلاج التصفير...وشكر للسبع..صنى 2013

السلام عليكم ورحمه الله

بدايه المشكله قمت بسردها فى موضوع سابق عن صوت الصفاره ومعاناتى مع توكيل السبع

-استلمت السياره شهر 8- 2012 ومنذ هذا التاريخ اسمع صوت صفير وصوت احتكاك مكتوم

-طبعا اتصلت بنيسان فورا بخدمه العملاء ابلغونى ان ده تطبيع فرامل واكشف عليها فى صيانه الالف

- رحت صيانه الالف فى مودرن موتورز طبعا التوكيل لايرقى الى انه ورشه متواضعه واكرر كلامي باهتمامهم بالاكسسوارات فقط

- مهندس الصيانه بالاستقبال اكدلى (بدون الكشف على السياره) انه الصوت مجرد تطبيع

- بعد اكتشاف ملاك نيسان المتكرر للصوت ووجود عيب بصاجه التيل الخلفى اصبح الصوت هو عيب صناعه وليس تطبيع

- فى صيانه 5 الالف قمت بالذهاب الى توكيل السبع وتوجهت بالمشكله لمهندسه الاستقبال وايضا بدون الكشف عليها قامت بالرد التلقائى الصوت ده عيب لعدم وجود صاجه تييل خلفى وعند توافرها سنتوجه بمخاطبتكم لتغيرها

- انتهيت من الصيانه وانا على ثقه من كلام المهندسه نظرا لاجماع اراء ليست بالقليله فى توكيل السبع

- فى صيانه ال 10 الالف(السبع) اكدت شكواي المستمره من صوت الصفاره ولكن مهندس الاستقبال ايضا اكد لى انها صدور هذا الصوت مصدره هو عدم تركييب صاجه تيل خلفى (ايضا بدون الكشف عليها)

- مهندس الاستقبال كتب فى تقريره (محتاجه تغيير صاجه تييل خلفى وهي عير متوفره الان)

- فى حمله الصيانه المجانيه (عدادالسياره 14 الف )ذهبت الى توكيل السبع وقمت بالاستفسار عن الصاجه والكشف على الفرامل فاكد لي مسئول الاستقبال ان اليوم هو صيانه عامه فقط

- عند مشاركه احد الاعضاء هنا بتوافر الصاجه باوتو ايجيبت منذ اسبوع تعجبت لعدم اتصال السبع بى لتغيرها
- فقمت فورا بالاتصال بخدمه عملاء السبع وبعد فتره قامت بالرد على بتوافر الصاجه وتحديد ميعاد لتغيرها

- توجهت فورا للتوكيل(عداد15 الف) واستقبلنى مهندس اسلام وقام بتغيير صاجه التيل الخلفى وايضا (بدون الكشف المسبق على السياره او الكشف الاحق عليها)وكانه تغيير الصاجه اجراء احترازي فقط

- بعد الخروج من التوكيل فوجئت بان صوت الصفير كما هو وقمت بالتحدث مره اخرى مع خدمه العملاء
-
- قمت الاتصال بخدمه العملاء السبع مره اخرى لتسجيل استيائى

-وقمت باتخاذ اجراءات احترازيه لحفظ حقوقى لعدم اكتشاف مشكله اكبر من المتوقع فى منظومه الفرامل يقوم على اثرها التوكيل بتحميلى ما الا اقدر عليه

- قمت بتحديد موعد اخر برغم نصيحه اخوه كثيره هنا فى القسم بتوجهي لاوتو ايجيبت ولكن عدم توجهي هنالتحمل مسئوليه توكيل السبع عن عدم الكشف المتكرر عن المشكله

- قمت مره اخرى بالتوجه وقام مهندس الاستقبال (محمد غالي) بالتحدث مع حديث مطول وغريب مفاده الاتي

-سألنى مشكلتى قلتله فى الصوت رد عليا قالى جاي منين الصوت قلتله اكشف وشوف مش انا الى اقول جاي منين الصوت انا الى بشتكى منه قولتهولك سألنى ركبت الصاجه قلتله ركبتها بس الصوت يابشمهندس جاي من قدام مش من ور ا

-فقالى ان التيل خامته رديئه وبيعمل رايش قلتله خلاص اكتب فى تقريرك انه محتاج يتغير تيل وانا هاقوم امشى دلوقتى

-طبعا ميقدرش يكتب الكلام ده فى تقريره فقلتله فى اوتو ايجيبت الناس غيرت تيل وطنابير
قال لا طبعا مينفعش واصل لازم موافقات مش عارف منين وقصص غريبه

-المهم كان فى مهندس محترم جدا اسمه (محمد حسين) قالى انا هاظبطلك العربيه وهاجربها معاك ومش هاتمشى الا وكله تمام

-العربيه خلصت وخرجت انا والمهندس جربناها ومفيش صوت ( طبعا قاموا بصنفره التيل)

-المهندس المحترم ( محمد حسين) ادانى رقمه وقالى لو فى اي حاجه كلمنى

بعد لما خرجت ومشيت حلوالى ربع ساعه كدا ظهر الصوت كلمت المهندس قالى جربها يوم كامل

-المهم فى استاذه كانت بتابع معايا فى خدمه العملاء كلمتنى وقلتلها المشكله لسه متحلتش

-حددت معايا ميعاد يوم الخميس بالامس

-رحت استقبلنى المهندس المحترم (محمد حسين) وكان مكتوب فى التقرير المرسل من خدمه العملاء تغيير تيل وطنابير فى الضمان

-المهم المهندس اكدلى ان العربيه هاتطلع النهارده مفيهاش اى صوت ولو عايزه اي حاجه هانغيرها

-بعد ساعتين العربيه خلصت ورحت استلم لاقتهم مغيريين التيل الامامي فى الضمان

-طبعا المهندس قالى ان التيل مش بيتغير فى الضمان فى الكيلومتر العالي لانه استهلاكي

ولكن تم تغييره مراضاه عميل

- جربت العربيه بصراحه حاجه تانيه خالص بسم الله ماشاء الله الصوت اختفى نهائيا

اخص بالشكر المهندس (محمد حسين) رجل ذو اخلاق عاليه جدا ومخلص فى عمله

واخص بالشكر الاستاذه (ايمان) خدمه عملاء السبع

وطبعا انا اصريت ان مشكلتى تتحل فى توكيل السبع لان المشكله كانت فى التوكيل نفسه وهو الى متابعها وسوء اداره للمشكله وليس مشكلته الفنيه فى اصلاحها

ولو رحت اوتو ايجيبت كان التيل اتغير على حسابى لان الكيلومتر 16 الف واصبح التيل قطعه استهلاكيه

ولكن اسجل اعتراضى وشجبى لشركه نيسان لتركيبها تيل رديئ جدا بسياره تمنها 104 الف جنيه

الف مبرووووك و الحمد لله ان المشكله اتحلت
منفضلك انا ليه مجموعه استفسارات
هو حضرتك لما بتعمل الصيانه الدوريه بيدوك تقرير ؟ و بالنسبه للصوت انا الحمد لله مش بسمع صفاره بس بسمع صوت احتكاك مكتوم مش علي طول و بسمعه لما برفع رجلي من الفرامل مش لما بدوس؟
ارجو الإفاده شكرا جزيلا

المشاركة الأصلية كتبت بواسطة gomana85

الف مبرووووك و الحمد لله ان المشكله اتحلت
منفضلك انا ليه مجموعه استفسارات
هو حضرتك لما بتعمل الصيانه الدوريه بيدوك تقرير ؟ و بالنسبه للصوت انا الحمد لله مش بسمع صفاره بس بسمع صوت احتكاك مكتوم مش علي طول و بسمعه لما برفع رجلي من الفرامل مش لما بدوس؟
ارجو الإفاده شكرا جزيلا

الله يبارك فيكى

من حقك تقرير الصيانه بس احنا كمصريين بنحب نكبر دماغنا(المصلحه خلصت يعنى)

انا لو طلبت تقرير المفروض انه يديهولى ويكتب فيه كل حاجه اتعملت ومطلوب تتعمل

يعنى فى صيانه ال 10 الاف كتب محتاجه تركيب صاجه تيل خلفى

وموضوع صوت الاحتكاك المكتوم ده ممكن يكون الصاجه
بس من الافضل التوكيل يكشف عليها وتصرى على انها تتجرب وان الصوت يروح نهائيا

احنا بنشترى عربيه+ضمان

يعنى لو العربيه تمنها 100 الف
سعرها الاساسى مثلا 95 الاف و 5 الاف ضمان تكافلى للسياره

يعنى من المحتمل لو 100 اشترو العربيه نسبه كام واحد بيستفيد بالضمان

يعنى نيسان بتكسب فى الضمان مش بتخسر

ومفيش شركه بتعمل ضمان بتخسر بالعكس موضوع الضمان بيكسب

الف مبروك يا باشا ..

المشاركة الأصلية كتبت بواسطة S O P H O S

الف مبروك يا باشا ..

الله يباركلك ياباشا

المشاركة الأصلية كتبت بواسطة kliken

مبروك التغيير فى الضمان

الله يبارك فيك

----

المشاركة الأصلية كتبت بواسطة miceg

مبروك عليك حل المشكلة

الله يبارك فيك