كيا بيكانتو احسن ....ولا الشاهين........

**celine_back** · 29-07-2008 12:31 PM

انا عارف انها مقارنه غريبة اوى .....بس انا عندى دلوقتى شاهين 1400 مو 2003 وكنت بفكر ابيعها واجيب بيكانتو مستعمله 2005-2006
....اول حاجة عايز اعرف اسعار المستعمل منها ايه؟....ثانيا انا 90% من المشاوير هتبقى على طريق الزقازيق أبوكبير لو حد يعرفه وهو طارق اسفلت وكل حاجة بس فيه مطبات كتير وهيبقى فى حدود 60 كم يوميا ...يا ترى البيكانتو تستحمل ....وانا ببقى لوحدى او معايا واحد بالكتير فى العربية...وكنت بفكر برضة فى الريو 2004 مثلا ...ايه رأيكو فيها برضة ....انا مش بتاع جرى وكده بس برضة مش بمشى باحة اوى....يعنى غالبا سرعتى بتبقى 90-100 ....يبقى أبيع الشاهين ولا ايه ؟

**amr_elrashidy** · 30-07-2008 03:57 PM

و الله انا معايا بيكانتو لكن لو على الاستحمال اكيد الشاهين تكسب خصوصا فى المطبات عشان العربية كبيرة ..البيكانتو عربية ممتازة فى المدينة و السفر و كل حاجه لكن عفشتها خفيفة ووزها خفيف حتحس انها بتتنطط منك فى المطبات مش زى الشاهين..لكن طبعا الاوبشن و الباور و سهولة القيادة لصالح البيكانتو اكيد..انصحك تركب الريو قبل ماتفكر فيها.

**وائل عطية** · 31-07-2008 01:02 AM

أنا عارف الطريق دا طبعاً .. بل إني أقدر أقولك إني حافظه لدرجة إني عارف كل مطب فين بالظبط
من الآخر البيكانتو عمرها ماهاتحك في أي مطب منهم لأن المطبات مطابقه للمواصفات ..يعني مش غبية مع إنها مطبات كبيرة.. وحتى لو كانت أكبر من كده برده البيكانتو مش هاتحك
بس من الأخر الشاهين برده هاتكسب في التحمل ..لأن زى ماحضرتك عارف دا طريق غير مقسوم على حارت للرايح والجاي ولكنه سايح على بعضه وبيمشي عليه نقل تقيل وميكروباصات ونص نقل ..يعني انت عايز حاجة تسد مع الناس دي ..عايز أقوك إن هوا العربيات النقل هايأثر على البيكانتو وهى ماشية
بس من الأخر برده البيكانتو تكسب من حيث إنها ركوبة حلوة وسلسة بل ممتعة في السواقة
بيكانتو = رفاهية ومتعة فائقة في القيادة داخل المدينة
شاهين = تحمل (ولا تحمل أي من عناصر الرفاهية أو الاستمتاع في قيادتها)

**celine_back** · 31-07-2008 06:29 AM

شكرا يا جماعة على الردود الجميله دى ....انا طبعا عارف ان الشاهين تكسب فى حاجات كتير زى التحمل ورخص قطع الغيار والسهوله فى التصليح وكدا ....انا قصدى البيكانتو تستحمل الطريق ولا هيظهر فيها مشاكل كتير ....والعفشة تتبهدل من الطريق دا .....بس هو محدش قال حاجة عن الريو يا جماعة ليه؟

**CBR** · 31-07-2008 09:30 AM

تبيع الشاهين عشان تجيب بيكانتوا

في فرق كبير في الحجم

خليها معاك وخلاص احسن

**amr_elrashidy** · 31-07-2008 11:11 AM

اقولك حاجه..دور على حد مع الريو و جربها..انا عن نفسى جربتها قبل البيكانتو..موتور اقوى و لكن صوته اعلى بكتير من البيكانتو زائد ان التكييف بيموتها ده غير ان شكل التابلوه غبى (وجهة نظر)..اعادة البيع مش سهلة زى البيكانتو و السيفيا مثلا..بأمانه متكيفتش منها خالص..نزلت منها ركبت البيكانتو حسيت بفرق فى الركوبة و السواقة ممتعة فعلا فيها بالذات جوه البلد