الموضوع: تيدا ولا سي اليزيه ؟

اولا .. الموضوع ده لازم يتنقل قسم المقارنة
ثانيا نصيحة .. اى عربية حديثة لازم تصبر عليها شهور بس من نزولها عشان توافر قطع الغيار وعشان تسال عليها وتعرف قطع غيارها رخيصة ولالا ..
وبعدين بالنسبة لقطع غيار الستروين .. اكيد فى موديلات رخيصة او حنقول انها فى المتناول لان مفيش حاجة اسمها رخصية دلوقتى .. لكن حنقول فى المتناول .. وفى موديلات سيارات فى الستروين اكيد قطع غيارها حتكون غالية .. زى الحال فى اى شركة سيارات اخرى .. على سبيل الميثال .. نيسان مثلا حتلاقى التيدا غير القاشقاى والالنترا غير الاربى فى بعض قطع الغيار وهكذا

والمصنعيات بتفرق بين اى شركة سيارات .. وخدمة ما بعد البيع .. وكمان العروض اللى بتتعمل من خصومات صيانة طول السنة .. وكمان توافر مراكز الخدمة على مستوى الجمهورية

كل ده بيفرق

انا بصراحة معجب بالستروين .. لكن مقدرش اقدم على القرار ده لان العربية لسه طازة .. وانا مش بشترى عربية جديدة الا بعد مرور سنة على وجودها فى مصر ..

وبصراحة اتعودت على توكيل نيسان لان فى خدمة ما بعد البيع افضل من غيره .. وان كانت فى حالات فردية مينفعش اننا نحكم فيها كحكم كلى على نيسان .. زى اكيد ستروين فى ناس اشتكوا .. فمش ححكم على توكيل ستروين بحكم او حالة فردية

امتى احكم .. لو فى شكوى جماعية ومتكررة مع ناس كتير

التيدا حلوة طبعا .. بس الستروين السى اليزيه تزغلل العين .. بس انا قولتلك وجهة نظرى

والحكم ليك

وخالى بالك التيدا قريب شكلها حيتغير فى اخر السنة .. وحينزل شكل مختلف

بس العربية طبعا ماتورها محترم ويكفى انه لسه بينتجه منه سيارات الجوك والقاشقاى والماتور بنسبة كبيرة قريب منهم

ربنا يوفقك

وياريت تطلب نقل الموضوع فى قسم المقارنة افضل عشان تستفاد من اراء الاعضاء

فى علامة تعجب على الجنب دوس عليها واطلب نقل الموضوع من الادارة

تحياتى