عملت حادثة وعايز رايكم ( اصلح ولا ابيع )

**abdulhafeez** · 07-02-2013 11:26 AM

الحمد لله على كل حال .... كنت راجع من اسوان وعملت حادثة على طريق اسوان الاقصر الصحراوي
وربنا سترها معانا محدش اتعور حتى ( بفضل الله )
خبطنا في عربية نقل من غير نور ولا عواكس والمقابل كان نقل ضارب في وشك النور العالي خلاك مش شايف حاجة ............ ربنا كرمنا بناس شدونا لاقرب ريست وطلبولنا ونش نقلنا لحد القاهرة ..

المهم رحت للمتحدة عملولي مقايسة تصليح هتتكلف في حدود من 10000 الى 12000 ( تصليح وقطع غيار )
حسب الحاجات اللي هتطلع منها سليمة

دلوقتي العربية هتغير كبوت ورفرف يمين وباب يومين ومقص يمين وكوبلن يمين و مساعد يمين والازاز الامامي ....
و هيستعدل الكرتيرة اليمين والقايم والصالة وصدر العربية ( وممكن يغير الصالة لو ما نفعتش )
طبعا الشسيه رحل شوية لجوه وهيستعدل هوه كمان

والمكنة بمشتملاتها مفهاش حاجة باستثناء الريداتير مش عارفين حالته ايه ممكن ينفع او لا

دلوقتي العربية 516 موديل 2009 عاملة تقريبا 80 الف كيلو ..... فيها اربع فرد كاوتش جداد
واربع مساعدين جداد + مصاريف الونش كانت 2000 ج

ايه رايكم اصلح ولا ابيع ..... ولو هبيع ممكن تجيب كام

شكرا..

**S O P H O S** · 07-02-2013 11:34 AM

الحمد الله انك بخير
انا رأي انك تصلحها
والله اعلم ..

**abdulhafeez** · 07-02-2013 11:38 AM

انا بس خايف بعد التصليح ان الشسيه ما يرجعش زي الاول ... يعني العربية يكون فيها حدفة وتاكل كاوتش
بس المركز بيقولي انت هتروح تقيسها زوايا علشان تتاكد انها مضبوطة... وبيضمنولي الحاجة دي

وشكرا على مرور حضرتك

**S O P H O S** · 07-02-2013 12:20 PM

هو بصراحة انا عندي اعتقاد دايما
ان العربية لما بتعمل حادثة وتكون فالاجزاء دي بتتصلح اه وممكن تكون بحرفية عالية
لكن عمرها ما بترجع زي الاول 100%
بس انا مش عاوزك تفكر تعبها وهي كذا فتخسر
والله اعلم ..

**mous6fa** · 07-02-2013 12:55 PM

حمدلله ع سلامة حضرتك والناس اللى كانت معاك والحمدلله إنها بتيجي ف الحديد والصاج بعيد عن الأرواح ... بالنسبة لمشكلة حضرتك هتقدر توصل لحل عن طريق الورقة والقلم ... يعني أحسب العربية دي كانت واقفة عليك بكام وصرفت عليها ايه وشوف الإجمالي .. وبعدين شوف سعرها لو أتباعت حوادث بالحالة دي وسعرها لو صرفت عليها المبلغ اللى طلبه منك التوكيل ... وأختار أقل الخسارتين طبعا ... بس لو حضرتك من النوع اللى مش هتبقى مرتاح نفسيا وإنتا راكب عربيتك بعد التصليح عشان الشاسيه أتعوج والحاجات اللى حصلت فيها يبقى توكل ع الله وبيعها لإن الراحة النفسية فوق كل شىء

**BESO516** · 07-02-2013 01:29 PM

المتحده ناس قاهمين وشغلهم جامد وانا بتعامل معاهم دايما
بس التكلفه لازم تنزل كتير عن كده وتشوف السليم اللى فيها

وبعد اذن حضرتك هى العربيه لونها فضى ؟؟

**abdulhafeez** · 07-02-2013 04:32 PM

لا لونها كحلي ... واقفه على الباب عليها لوح ملاكي الفيوم .. الخبطة كلها في الجنب اليمين

العربية الفضي اللي واقفة عندهم جوه .. اللي القايم بتاعها مخبوط جامد من اليمين وكلها مدمرة دي .... تكلفة تصليحها 27 الف ج

**abdulhafeez** · 07-02-2013 04:50 PM

هو بصراحة لو انا حسبتها بالورقة والقلم هكون خسران حوالي 7 الى 9 آلاف جنيه في سعرها لاني صرفت عليها 2500 ج قبل الحادث والحاجات دي كلها سليمة بعد الحادثة ......... استاذ محمود حسين قالي لو بعتها ممكن تجيب 25 الف .... ( لان اللي بيشتري عربية عاملة حادثة بيعمل حسابه انه يصلحها ويبيعها ويكسب فيها 5 الاف جنيه )

هي بس المشكلة ان انا كنت عايش في الامارات واللي اعرفه هناك ان لو الشاسيه اتنى العربية ما تترخصش تاني و تتباع خرده ....... علشان كده انا متردد ... هي هترجع زي الاول او حتى 95 % من الاول يبقى كده تمام هصلحها علشان استفيد بفرق الصيانات اللي انا عملتها قبل الحادث ....

كمان هو قلي لازم تشتري قطع صاج جديدة واصليه علشان تضظبط زي الاول لانه لو صلح الحاجات القديمة مش هيقدر يضبطها زي الاول قوي

**hugan** · 07-02-2013 07:59 PM

المشاركة الأصلية كتبت بواسطة mous6fa

حمدلله ع سلامة حضرتك والناس اللى كانت معاك والحمدلله إنها بتيجي ف الحديد والصاج بعيد عن الأرواح ... بالنسبة لمشكلة حضرتك هتقدر توصل لحل عن طريق الورقة والقلم ... يعني أحسب العربية دي كانت واقفة عليك بكام وصرفت عليها ايه وشوف الإجمالي .. وبعدين شوف سعرها لو أتباعت حوادث بالحالة دي وسعرها لو صرفت عليها المبلغ اللى طلبه منك التوكيل ... وأختار أقل الخسارتين طبعا ... بس لو حضرتك من النوع اللى مش هتبقى مرتاح نفسيا وإنتا راكب عربيتك بعد التصليح عشان الشاسيه أتعوج والحاجات اللى حصلت فيها يبقى توكل ع الله وبيعها لإن الراحة النفسية فوق كل شىء

قضاء اخف من قضاء
كلام سليم
100*100
الوضع يتوقف علي حضرتك
هل هاتقبل العربيه بعد التصليح ولا هاتتعقد منها