الموضوع: تقرير الماروتي من اول 5000 كيلو و لحد 64000

يعني زي ما انتم عارفين اني كنت جايبها كسر زيرو موديل 2007 و كانت عامله 5000 كيلو و الكلام ده كان سنه 2010
دلوقتي هيا عامله 63000 ما شاء الله عليها ربنا يصونها
نيجي لسير الكاتينه انا فعلا عندي في الكاتلوج 100 الف بس طبعا اكيد ده غلط
انا غيلت سير الكاتينه الفبريقه علي 20 الف كيلو عشان العربيه كانت موديل 2007 فخفت و ده كاوتش و الركنه وحشه
جبت سير من سوزوكي سنتر و قالي اصلي يا بيه و مش عارف ايه و كان اغلي حاجه عنده وقتها و كان ب 60 جنيه تقريبا
جيت و العربيه عامله 57500 كيلو و ماشي في امان الله علي المحور الطريق وقف مورت قامت العربيه مبطله ادور متدورش زقتها ع جنب و جبت ميكانيكي قال ده كاتينه ( يعني السير الجديد قعد 37500)
طبعا يومها جبت و نش و كان يوم اخر بهدله و حلفت اني مش هجيب ام حاجه تاني من سوزوكي سنتر ده لانهم بيسترخصوا
العربيه راحت ع الميكانيكي و جبت سير من ليدرز ب 140 جنيه في كيس ابيض كده و عليه شعار ماروتي كتير و الختم بتاع الاستيراد من لاهند و السعر كام في الهند و انه كمان متصنع في مصنع ماروتي و لسه الكيس عندي
طبعا انا مش اول مره اجرب ليدرز فعشان كده لجأتله في سير الكاتينه
يعني انا كان عندي مصيبه كبيره في الابلاتين و كل اسبوع اغير واحد و ساعات افتح الاسبراتير الاقي الابلاتين مكسور و الله مش لادع بس
رحت جبته من عنده ب 25 جنيه عملت بيه 20 الف كيلو من غير ما اظبط كهربا خلال المده ديه كلها
جبت من عنده مرايه شمال مقعره و ممتازه ب 30 جنيه و قعدت كام شهر و اتكسرت و كان قافل في يومها رحت جبت من شركه الجيزه اللي في المطبعه ب 30 جنيه برده و بفتحها لقيت مكتوب ع المرايه قلت يبقي تمام بعد ما مشيت و ركبت لاقتني مش شايف حاجه بقرا اللي مكتوب عليها لقيته بيقولي ان الحاجات بحجمها الططبيعي (اه يا ولاد التيت )
صيانه ال 40 الف كان كل حاجتها من سوزوكي سنتر
ابلاتين ب 15 جنيه (خلال ال 20 الف دول اللي بعد الصيانه غيرت 5 ابلاتين ع الاقل)
كوندنسر ب 15 (برجلي العربيه و رجعت الاصلي و ما زال فيها ال يومنا هذا)
سير دينامو
فلتر هوا اصلي ب50 حنيه
و كمان غيرت الموبينه الزيت بموبينه الكتروني من عند الشركه اليابانيه اللي في التوفقيه عشان الزيت كانت بتسخن و تأخر الدواره و العربيه سخنه لكن الالكتروني بقالها اكتر من 40 الف كيلو مفيش منها شكوي و الحمدلله
صيانه ال 60 الف كان كل حاجتها من عند ليدرز
اولا الابلاتين كان من عنده ب 25 جنيه
فلتر بنزين مش بيركب عليها ب 20 جنيه
سير دينامو نص نص مش اصلي ب 15 جنيه لان الاصلي كان ب 50 جنيه
فلتر هوا ماروتي اصلي بعلبه المصنع بتاعه ماروتي ب 50 جنيه
و اخيرا تيل الفرامل اللي الكل كان بيتكلم فيه و العصافير و انه بيخلص بسرعه قلت بما ان حاجاته اصليه اجيب من عنده
وراني التيل اللي عنده كان فيه نوع اسمه fbk ب 55 جنيه تقريبا ماليزي و شكرلي فيه و كان فيه بتاع ماروتي الاصلي برده بعلبته بختمه بسعره بالهندي في بلاده ب 100 جنيه قلتله هاخد ابو 100 بس لو قرفني او خلص قبل 50 الف كيلو هرجعه
التيل الفابريقه قعد 60 الف و كان لسه فيه بس انا كنت بغيره بالمره عشان مش بعرف افضي اني اعمل حاجه في العريبه
يبقي صيانه ال 60
تم فيها تغير سير كاتينه ب 140 جنيه
تيل ب 100
فلتر بنزين ب 20
فلتر هوا 50
سير دينامو 15
ابلاتين ب 25
3 بوجيهات نوع مان عنده انجليزي و الواحد ب 7 جنيه
و كمان فكيت الردياتير و نضفته عشان العربيه من 2007 متغيرلهاش ميه حتي و مكنش فيه شكوي من الحراره فاتفك و اتسلك و احطله مايه خضرا و كله تمام التمام
و بعدها طلعت رصصت و ظبطنت الزوايا و عملت الروتيشن بتاع الكاوتش لان كان بقالي ماشي بيها و هيا بترج و حالتها حاله لكن بعد الترصيص و الزوايا الدنيا اختلفت
تيل الفرامل دلوقتي انا عامل بيه 4000 كيلو و ما زال مفيش شكوي منه و بطمن ع الطنابير كل مده كل تمام لسه
تم الكشف ع التيل الخلفي و كان لسه زي الفل فرجلشت الفرامل و نضفت هوا و صنفرت و بس ع كده

تم تغير البطاريه علي 40 الف كيلو تقريبا هيا و الديسك و الاسطوانه بعد ما شاطت مني و انا ماشي علي الدائري الصبح في امان الله و كمان غير الكاوتش عشان طريقي دايما طرق سريعه و كان فيه فردتين في كل واحده 7 لحامات و الاتنين التانين ملوحين و كمان كان عدي علي انتاجه 5 سنين و غيرته ب هانكوك كوري بقاله 24 الف كيلو و زي الفل


الديسك و الاسطوانه كانوا فاليو من محلات ميدو هما و البليه فرع التوفقيه و بقالهم 24 الف كيلو بدون مشاكل




و اخيرا و ليس اخرا
اود ان انوه علي انه في القريب العاجل سأعلن انضمامي رسميا لشبكه مشجعي الالتو بعد ما تم حجزها من عند الطارق و ركبتها و كانت وهم فعلا سواء في قعدتها و جربت تكيفها كان لزيز و اخر حلاوه



و كمان احب اشكر اكسيل باشا بجد انسان رائع دوشته كتير و انا واقف قدام الطارق قبل ما احجز هوا انا كنت ناوي علي لوجان اتوماتيك بس النصيب بقي هبقي سوزوكي للابد



انا كنت حاجز الفضي بس غيرتها بالنبيتي نظرا لاوامر القياده العليا




حاجه اخيره انا شفت مفتاح الالتو هوا لا مكتوب عليه ماروتي و لا سوزوكي و لا التو لكنه مفتاح طويل كده بالنسبه لبتاع الماروتي و عليه شعار سوزوكي



انتظروني قريبا في تقارير الالتو و هتكون كتير لان عدادها هيجري لاني بعمل في الشهر من 2500 ل 3000 كيلو



اه الماروتي هتفضل موجوده برده و مش هفرط فيها لانها اثبتت انها اعتماديه لاني فاشخها
سافرت بيها اسكندريه رايح جاي علي 140 بدون راحه
سافرت العين السخنه 5 مرات مقفل عدادها طول الطريق
سافرت الاسماعليه مره علي سرعه 110
كل يوم محوز و دائري في متوسط 100 كيلو يوميا
كتير ممكن اعمل بيها في اليوم 250 كيلو
فهيا تمام
شغاله ببنزين 80 و بعمل في رنج من 320 كيلو ل 400 كيلو في الصفيحه بس طرقي كلها سريعه