الموضوع: المحرك المنبطح

تعريف المحرك المنبطح flat engine (واحيانا يسمى boxer):
هو محرك ذو مجموعة من السلندرات مصنوعة على شكل حرف V ولكن الزاوية بين ضلعى حرف الV اتسعت لتصير 180 درجة فأصبح المحرك مسطحا او منبطحا

حد فهم حاجة؟ لأ؟ ولا انا كمان فهمت حاجة.

نبسطها شوية

المحرك التقليدى المكون من اربعة سلندرات تكون تجويفات السلندرات فيه رأسية وكلها صف واحد ، يعنى كأنهم طابور فى مدرسة او فى الجيش كل واحد فيهم مخبى اللى وراه،يوجد تصميم آخر يسمى حرف V وهو ببساطة تجويف السلندرات المتتالية لابكون رأسى وتكون هناك زاوية بين كل سلندر والذى يليه، يعنى اول سلندر بيكون مايل ناحية اليمين، واللى وره مايل ناحية الشمال، والتالت مايل ناحية اليمن وهكذا مما يحعل الذى ينظر الى المحرك من الأمام يرى السلندرات المتتالية كأنها تشبه حرف V
طيب لو فرضنا ان حرف ال V دة اتفرد خالص لحد ما بقى الضلعين افقيين والزاوية بينهم 180 درجة
فى الحالة دى هنلاقى السلندرات بقت افقية واحد رايح يمين والى وراه رايح شمال وهكذا

طيب إمتى يستخدم كل تصميم
التصميم التقليدى يعتبر الأرخص فى التكلفة والأكثر شيوعا لكن يعبه شئ أساسى، انه طويل ورفيع، يعنى نسبة الطول للعرض فيه مش متوازنة، نفس شكل طابور تذاكر السينما اللى كل واحد واقف ورا التانى، دى مش بتكون مشكلة كبير لما بنتكلم عن موتور4 سلندر مبرد بالمياه هايركب بالعرض فى سيارة جر امامى لأن طول الموتور يكون بعرض السيارة ودة بدينا ميزة ان حجرة المحرك بتكون قصيرة كما نرى فى كل السيارات الحديثة
بتبدى المشاكل تبان لو حبينا نغير التصميم: يعن لو الاربعة سلندر بقو ستة، هنا هنلاقى لموتور بقى طويل جدا وعرض السيارة مش واخده، فنعمله حرف V عاشان نزود العرض على حساب الطول ويكون المحرك اقرب للشكل المكعب من شكل متوازى المستطيلات ويدينى استغلال افضل للمساحة
المشكلة التانية لو المحرك مبرد بالهواء: التصيميم التقليدى بخلى اول سلندر يحجب الهوا عن اللى بعده، فهنا لازم تتعمل السلندرات حرف V ,والمثال دة بنشوفه فى الفيات 126 `ذات الإتنين سلندر حرف V المبردة بالهواء
المشكلة التالتة:لو الموتور هايركب بالطول علشان العربية دفع خلفى او دفع رباعى، نلاحظ ان عربيات زمان ذات الدفع الخلفى كبوتها طويل اوى بالمقارنة بعربيات ديلوقتى ذات نفس السعة اللترية والدفع الأمامى، مثال اللادا ذات ال 1200 سى سى مقابل الماتريكس 1600 سى سى، ودة طبعا لأن العربيات زمان كنت كلها دفع خلفى وكلها محركات ذات صف واحد( يعنى مش حرف V)
وكذلك نلاحظ ان عربيات الدفع الرباعى الحالية لازم يكون كبوتها طويل علشان تساع المحرك المركب بالطول
طيب يكون إيه الحال لو انا عايز اعمل عربية دفع رباعى بحجم العربيات الصغيرة ومحرك كبير السعة وها يتركب بطول العربية علشان الدفع الرباعى زى السوبارو إمبريزا
المحرك ذو الصف الواحد لن يصلح لأ معناه كبوت طويل جدا
بيقى لازم نروح لتصميم حرف V،
لكن إحنا ممكن نكسب ميزة تانية لو خلينا الV تبقى 180 درجة، ان كدة المكابس بتكون افقيه بجوار الكرنك ودة معناه ان وزن المحرك هايكون لتحت جدا، يعنى مركز ثل المحرك وبالتالى العربية كلها هايكون منخفض جدا ودة بيدى طبعا ثبات عالى جدا للعربية، إلى جانب انه بيقلل جدا الإرتعاشviberation فى الموتور

طيب ليه مش كل الناس بتعمل المحركات كدة: لعدة اسباب
اولا انه مكلف جدا لأن معنى انى اعمل محرك V او افقى هو انى هاعملله 2 وش سلندر بدل واحد، 2 بلوك بدل واحد، 4 عمود كامة بدل 2 ودى كلها تكلفة فلوس وزيادة وزن المحرك
الحاجة التانية انه غير مناسب لعربيات الجر الأمامى لأنه هايحتاج كبوت اطول لو اتحط بالعرض
الحاجة التالتة انه غير معتاد وكثير الاجزاء وده هايخلى صايناته مكلفة جدا

بقى ان اضيف شيئا اخير وهو ان: مع كل احترامى للإخوة اليابانيين فإن تصميم المحرك المنبطح لم ياتى به اليابنيين من الفضاء الخارجى ولكنه قديم جدا، وتحمله إحدى اشهر سيارات العالم والتى ظهرت للعالم منذ أربعينات القرن الماضى ولا تزال تخدم بكفاءة فى كل دول العالم حتى هذة اللحظة واحبها العالم كله واحببناها جدا فى مصر

طبعا عرفتوها: الفولكس واجن بيتلز، منذ ان ظهرت للنور وهى تعمل بمحرك منبطح مبرد بالهواء، وقد اعطاها هذا المحرك ثلاثة ميزات:
الأولى: إتساع السطح المعرض للتبريد بالهواء
الثانية:المحرك كله اسفل السيارة ولا يشغل حيز يذكر(يوجد بالسيارة فراغ خلف الكنبة الخلفية يكاد يماثل حجم شنطة اى سيارة صغيرة)
الثالثة: مركز ثقل السيارة منخفض جدا وهذا-بالإضافة الى إتساع قاعدة عجلات السيارة الغير طبيعى- يجعلها من أكثر السيارات ثباتا على الطريق على وجه الأرض