سواق تاكسى جابلى اكتئاب النهاردة الصبح
لأ مخبطنيش، ولا زنق عليا ، ولا حتى شتمنى، ولا حتى كنت راكب معاه وفاصل فى الأجرة ولا اى تصرف ممكن يخطر على بالكم
لكن اتى بأغرب تصرف كان ممكن يخطر على بالى
وقف جنبى بالتاكسى(فيات 1300) وانا مشاى على رجليا، وقال لى سلام عليكم، رديت السلام وانا منتظر انه هيسألنى عن عنوان ما، لقيته دخل فى سكة تانية خالص تبدأ ب"معلش انا اسف لو سمحت بعد اذنك" وبرغم توقعى للى هيقوله بعد كدة لكن مكنتش مصدق نفسى، لقيته مطلع لى ورق وبيقول "انا والله العظيم ابنى محتاج دواء، ان شا الله اولع...." انا بصراحة ولعدم اعتيادى انى اطول فى الكلام مع حد بيحكى لى القصة دى قلتله الله يعطيك وسبته ومشيت، لكن اللى مضايقنى حقا هو تلك التركيبة الغريبة، انا طول عمرى اشوف سائق التاكسى بيفاصل فى الأجرة او بيتعوج على الزبون وميرضاش يوصله لو المكان مش على مزاجه، لكن يشحت دى صعبة اوى، وبصراحة جة فى دماغى مليون احتمال:
1-ان العربية دى اصلا من العربيات اللى اتعمللها احلال بعربيات جديدة ومش شغالة تاكسى ولا حاجة، والراجل ده مأجرها يتسول بيها فى الأماكن البعيدة عن المرور، وهتكون مقنعة انه راجل بيمارس مهنة وبالتالى اولى بالتعاطف، زى بدل الكناسين وآلات سن السكاكين اللى المتسولين دايرين بيها
2-انه لقى طابور البنزين 80 طويل فقال لو عرف يلم حق البنزين 90 بالتسول من زبونين او تلاتة يبقى اسرع من الطابور
3- انه سواق تاكسى وحاطط بنزين 80 لكن معندوش دم ولقى ان التسول مهنة مربحة فى غير فترات الذروة
4- ان يكون ابنه تعبان ومحتاج دواء فعلا، وده اللى جابلى اكتئاب انه ممكن يكون على حق وانا سبته ومشيت
ايه رأيكم فى الموضوع ده، الموضوع ده خلانى انا اللى تعبان وعايز دواء، ولذلك محتاج اتسول ردودكم علها تكون مريحة بالنسبة لى