الموضوع: قدر الله وما شاء فعل - حادثة بالكليو

تفاصيل الحادثة:
ماشي في جسر السويس في طريقي للعريش مرورا بالإسماعيلية الصحراوي، وواحد طالع من اليوتيرن بعربية فيرنا، وواخد في وشه من غير ما يبص، وطالع عالواسع. قمت جايب عربيته من ورا يمين باكصدامي الأمامي من اليمين.

عملت معاينة مبدأية للموتور، ولقيت الحمد لله الموتور شغال كويس، والرادياتير والمروحة شغالين، شيكت عالتكييف واتطمنت عليه لإن الكومبريسور والوصلات كلها كانت ناحية الخبطة. بعدها ربطت الحاجات المفكوكة بقفيزات وسافرت بيها العريش ورجعت.

الخسائر الظاهرية:
1- الاكصدام.
2- الشبكة الأمامية.
3- الرفرف اليمين.
4- الفانوس اليمين.
5- عوجة في طرف الكبوت من ناحية اليمين.

هاروح أكشف عليها النهاردة إن شاء الله عشان أشوف لو فيه حاجة تانية.

دلوقتي أنا مش عارف أرتب أفكاري ولا أعمل ايه. هشتري ايه جديد وايه استيراد وهارش ايه، والفوانيس اجيب نوعها ايه، والسمكرة بتاعت الكبوت هتبقى ازاي.

أنا متلخبط ومحتاج نصايحكم ليا

بالمناسبة: العربية اللي اتسببت في الحادثة وهربت كانت فيرنا رقمها ق ج 9318 أو 9418. بس مش عارف أعمل ايه برقمها ده. ربنا يجازي صاحبها.

المشاركة الأصلية كتبت بواسطة algazar2

الاكصدام على حسب مقطوع ولا ممكن يتصلح غير كده يبقى استيراد نضيف بلون العربيه
الرفرف شوف سمكرته تتكلف كام لقيتها كتير يبقى تجيب استيراد بلون العربيه
الكبوت تستعدله بارد و ما ترشش
الفانوس لو لقيته استيراد حالته حلوه و مش مطوس و سعره كويس ماشى غير كده يبقى تجيبه ديبو او تجيبه تركى

و الحمد لله انها جت على كده يا باشا

و من يومين برضه عربيه فيرنا خبطت عربيه راكنه بوظتله الاكصدام الخلفى بالرفرف بالفانوس و ممكن تكون بوظت حاجة فى حوض الشنطة و خد بعضه و جرى و كان هيخبط البواب و هو بيجرى تقريبا الفيرنا فيها حاجة بتخلى الى سايقها يتجنن ( بس اكيد فى ناس بتسوقها محترمين يعنى )

شكرا لردك الوافي. بالنسبة للفانوس، يعني ايه "مطوس". كمان أنا عندي الفانوس السليم لونه مصفر ومخدوش. ينفع أبيعه واجيب الفانوسين الجداد سواء استيراد او ديبو شبه بعض؟

بالنسبة للرفرف والاكصدام الاستيراد. اللي بيبقى بلون العربية، بيحتاج رش عشان الخدوش وكده ولا بيبقى كويس؟

وسؤال تاني لخبراء الرينو: ايه الاسعار التقريبية للرفرف والاكصدام والشبكة والفوانيس الاستيراد؟