الموضوع: قدر الله و ما شاء فعل حادثة سيارتى البورا

الأخوة الأفاضل أعضاء المنتدى الكرام, و أعضاء منتدى فولكس الأعزاء
الأول صباح الخير و ياريت تكونوا فى أتم الصحة و العافية,
طبعا أنا كنت صدعتكم من 6 أو 7 شهور بمشاكل عفشة البورا الى كنت لسه جايبها و جهلى بالكثير من مكونات الفولكس و صنايعية الفولكس, وطبعا الأخوة هنا مسبونيش و نزلت عليا محاولات المساعدة كالمطر كان أكثرها من أخ عزيز و هو م/أسامة موسى الفهمنى أشياء كثيرة أجهلها فى ال VW و عرفنى على محلات قطع الغيار و الميكانيكية المتخصصين فى السيارة, و الحمد لله ربنا وفقنى كثيرا (و بكثير من المصاريف بردو) و أحيت العفشة و السيارة من أول و جديد.
المهم انا ربنا الحمد لله كان كرمنى و أكملت نصف دينى قبل ماشترى العربية ب 3 او 4 شهور, و بردو بكرم ربنا فرحى كان من الاشياء المميزة بين المعارف و الاصدقاء بشهادة كل من حضره و الطلبوا شريط الفرح, و يمكن غلطتى انى لقاية هنا و كان لازم أهدى شوية و أبتدى أخاف من الحسد (الى مكنتش مقتنع بيه الا لذكره فى القرأن و كنت أعتقد ان الناس بتبالغ), و خصوصا انو كان فى مقدمات منها انى فوت طيارة شهر العسل, و مرضى و اصابة زوجتى (بسيطة الحمد لله) اثناء أحد رحلات السفارى بردو أثناء شهر العسل و اكتملت سعادتى ان ربنا وفقنا و زوجتى حملت سريعا.
و لكن كل ده عادى و ربنا وفقنى و جاتلى بيعة لسيارتى الكيا السبكترا و وفقت بشراء البورا فابريقة برا و جوا و تكييف تاتش و خشب أبانوس.
و فى الأحد الأيام و بعد انتهائى من تصليح أخر حاجة فى العفشة بيوم واحد (كنت لسه مغير دنجل و شمعدان أمامى) استيقظت باكرا للذهاب الى اجتماع فى مدينة العاشر من رمضان و طلعت من بيتى مباشرة (فى مدينة نصر) و خد الدائرى عشان أنزل طريق مصر الاسماعيلية من أوله (مع انى كل مرة باخود طريق السويس و من ثم مدينة الشروق و أطلع على طريق الاسماعيلية قبل مدينة العاشر ب 10ك), و بما انى كنت لسه ضابط العفشة قلت اجرب العربية و جريت ل 190 على الدائرى و اتعفرت شوية و قربت أنزل على طريق الاسماعيلية.
المهم جالى تليفون يبلغنى بتبديل مأمورية كان من المفترض سفرى اليها بعد يومين الى الصعيد و تم تغييرها الى الأسكندرية و بما ان زوجتى كان بقالها مدة بتطلب تغيير جو قلت ده نصيبها أنا أخدها معايا اسكندرية تغير جو.
و المهم خلصت تليفون و نزلت طريق الاسماعيلية و لقيت الطريق زحم شوية و هديت سرعتى ل 120 و كنت ماشى فى الحارة الثانية شمال, المهم فجأة العربية النقل القدامى هديت فجأه, و بما ان هناك لسه حارتين على اليمين روحت فاديت النقل و رميت يمين و كانت المفاجأة لقيت ربع نقل شبه وقفة فى تانى حارة جنب النقل الفرملت و انا فاديتها , الأغرب و جود سيارة ربع نقل ثالثة محملة أنابيب بوتجاز و بترجع مرشدير فى أخر حارة متوفرة لدى عشان أعدى منها و حتى الصحراء كانت مسدودة قدامى لوجود عامود نور قدامى على اليمين و قبل النقل مباشرة (يعنى من الأخر فخ محكم لا يصلح معه فرامل ولا جميع خبرات تفادى الحوادث الواحد اكتسبها من شقاوة الماضى و كثرة السفريات على سرعات عالية) "كل ده متهيألى ميعديش الثانية الواحدة" و روحت دايس فرامل و مش متخيل انى فعلا هخبط.........................................

بس أنا حكيت أخر حاجة موجودة فى ذاكرتى, أنا فجأة لقيت نفسى واقف فى الشارع شمال عربيتى ناحية باب السواق مش فاهم فيه ايه و راسى عمالة تزل دم كتير و أنا حاسس بضبط زى الأفلام الأجنبى بنسبة كتير من الصمت و ناس عمالة تجرى و تيجى تهدى فيا و عربية نقل مرمية فى وسط الصحراء و أنابيب مرمية فى كل حتة و تقريبا اتخيلت بسيارة اسعاف و شرطة و روحت ماشى عشان ابص ايه الحصل فى العربية..................................

بالنسبة ليا كانت صدمة و كنت متأكد انى فى كابوس وحش هصحى منو مش متخيل منظر العربية الكنت بحنتف فيها و أخاف عبيها بقيت بالمنظر ده, و فجأة ربنا الهمنى بدعاء (كنت تقريبا نسيه) "لا اله الا أنت سبحانك انى كنت من الظالمين" و ده يمكن صبرنى على انى أعدى المحنة, فعلن الواحد ياما افترى و جرى على سرعات تعدى ال 200 و خد غرز بالعبيط و أكيد خض ناس كتير ملهاش ذنب بغرزه و ياما افتكر انو كبير على الحوادث لأن كل مرة ربنا كان بيسترها معاه و هو ماشى على 180 – 200 كان بتزداد ثقته فى نفسه و امكانيته على تفادى المواقف الصعبة حتى لو العربية مش مؤهلة (أكسنت و لانوس و اكسيل و سبكترا) و لاما ربنا كرمك بعرية مستويات ثبات و أمان و فرامل عالية معرفتش و ملحقتش أعمل أى حاجة و أنا ماشى على 120.
المهم الاسعاف ربطولى دماغى و مصممين يأخذونى على المستشفى سريعا, و الضابط الجه كان متعاطف معايا جدا (طلع معاه بورا بردو J ) و دخل جاب الكاسيت و الموبايل و الرخص و 2 لابتوب و كل محتوياتى العربية تقريبا و فصل البطارية و كتبلى رقمه فى ورقة و حطها فى جيبى, و الراجل صاحب العربية النقل محبش يعمل محضر ولا أنا كمان (عشان ملحقتش أئمن على العربية) و بالصدفة كان فى زميل عمل ورايا على الطريق لحقنى و خد محتويات العربية عندو و جه ورايا على المستشفى (مستشفى السلام كانت أقرب مستشفى), و هناك راحوا حلقين شعرى و بدأو يخيطوا دماغى و عرفت انهم خيطوا 18 غرزة, طبعا انا توقعت انى خلاص تشوهت و فضلت عايش الوهم ده بتاع أسبوعين لأن المنظر فعلن كان صعب أوى, لكن بحمد الله ربنا سترها و الشعر غطى على معظم الغرز.
بعد كده جابوا ونش و خليتوا يسبقنى على البيت و بدات أكلم أهلى و طمنتهم عليا (بس مكنوش متخيلين منظر الحادثة), و زوجتى نزلت تستقبل الونش لقيتها بتكلمنى فى حالى انهيار من منظر العربية و مش مصدقة انى سليم, المهم حصلت الونش و طمنتها و لقيت والدى و والدتى داخلين على المنزل ورايا و شافوا العربية قبل مايشفونى و تكرر حالة الانهيار عند والدتى و بالعافية هديتها الحمد لله.

المهم طلعت أغير هدومى من الدم و فجأة بدأت حالة من الهبوط و ألم فى العظام و طلبت يأخدونى المستشفى, و هناك كان فى دكاترة معرفة طمنونا على الجرح و العظام, لكن لقوا الضغط و الحرارة ارتفعوا فكان لابد من الحجز و عمل أشعة مقطعية على الدماغ (الجرح ال فى وسط دماغى كان عميق و مقلقهم شوية على مخ), أعدت 3 أيام فى المستشفى و اطمنا على المخ الحمد لله و طلعت اعدت فى البيت أسبوعين كاملين لأنى أصبت فى التهاب شديد فى العضل الخلفى للظهر بعد الحادثة باسبوع.
طبعا عدد قليل من المنتدى العارف بموضوع الحادثة منهم الأخوة الأفاضل أسامى موسى و محمد مصطفى و نور من قسم البيجو, و أنا تمام الحمد لله دلوقتى و فى أتم العافية و الحادثة ديه كانت من 3 شهور بس كنت متردد و مش عاوز أعمل الموضوع غير لما أتعافى نفسيا.
العربية بقى طبعا كانت Total loss, و الغريب انو جالها عروض بيع أكثر من أى عربية سليمة و الموضوع طلع بيزنس و سبوبة كبيرة لا تتخيلوها عربيات الحوادث أكتر من الهم على القلب, و بعدين يروحوا جايبين العربية نص امامى أو نصين كاملين و يلحموا العربية و رقم شاسيه العربية الحوادث, و بقى معاك عربية على أعلى مستوى, و كتير بيتخموا و يشتروا على انها جديدة, يا جماعة الموضوع منتشر جدا فوق ما تتخيلوا و خصوصا فى العربيات الالمانى (بى ام – مرسيدس – و فولكس) و من ثم اليابانى (هوندا - لانسر).
الدروس المستفادة:
-عمر ما الجرى ما هيكون ليه أمان حتى لو كنت شوماخر و سايق الفيرارى, و لو حبكت جرى يبقى لازم تبقى لوحدك على الطريق على قد ماتقدر و تبقى شايف الطريق كلو من يمينو لشمالو.
-حاول تأخد بالأسباب و لو ربنا مديك ماتستهرش انك تشترى عربية بعوامل امان عالية لأن ساعتها ولا هقولك ثانيتها بس هتعرف قيمة العربية (و خصوصا لو كانت المانى)
-عرفت قيمة التأمين على السيارة طبعا المكسب و الخسارة بتاعت ربنا بس بردو تأخد بالأسباب
أخيرا بأه أسيبكوا مع صور العربية, و ربنا يستر طريقم جميعا