الموضوع: غيرت زيوت البرسونا

صباح الخير على جميع اعضاء المنتدى
انا غيرت زيوت العربيه امبارح( برسونا 2009)
بالنسبه لزيت الفتيس الاوتوماتيك( جبت نوع اسمه EBRO من محل المدينه فى شارع دمشق) بصراحه ما عجبنيش الفتيس الصبح بيتاخر برضه فى النقله الاولى بالذات ومش عارف ايه السبب انا كنت فاكر ان المشكله فى الزيت لانه ما اتغيرش من زمان والمالك الاول كان بيزوده مش بيغيره والعربيه عامله 155000

فالوفولين
غيرت زيت الموتور لزيت فالفولين ماكس ليف 10w-40 من توكيله الى فى الحى السادس مدينه نصر
بصراحه من اول دواره العربيه بسم الله ماشاء الله فاقت جداً وصوت الموتور وطى والسرعه زادت بشكل ملحوظ جدا وحتى فى السلانسيه (مش عارف فيه علاقه ولا لا بس ده الى حسيته فعلاً) مع العلم ان الزيت الى نزل كان شيل 5000 الجيركن الاصفر بصراحه مقارنه بالفالفولين سيئ جداً
المهم مش عاوز اوصفلكم قد ايه المعامله محترمه هناك
اولاً زيت فالفولين ماكس ليف للموتور مصمم للعربيات الى عدت الـــ 100000
هولندى الصنع
سعره مناسب جدا جدا جدا مقارنه بالموبيل والشيل (200 جنيه وفى خصم 10% يعنى دفعت 180 جنيه)
بيقعد 10000 كيلو وممكن اكتر - بس المهم فى النوع ده ان العربيه ما يكونش بينقص فيها الزيت خالص
غيرت فلتر (طبعا مش الاصلى"بتاع لانسر") بسعر السوق عادى جداً 25 جنيه
اخدت معطر سياره مجاناً
المكان نضيف جداً وفى كمان كافيه جوه لو عاوز تشرب حاجه على ما يغيروا الزيت
فى نوع زيت مخصص للفتيس الاوتوماتيك ماكس ليف برضوا عليه خصم تحفه نازل من 85 جنيه الى 68 جنيه بس للاسف انا كنت غيرت الزيت للنوع الى قلت عليه EBRO
الخلاصه
بجد انصح بزيت فالفولين لاى حد عاوز يغير زيت بس تجيبه من التوكيل لانه قالى ان فيه منه مضروب كتير جداااااااااااااااااااا فى السوق وقالى ان فيه ناس بتستورده غيرهم (تحت السلم ) بس المشكله انك مش هتعرف تميز الاصلى من المضروب وعلى فكره انا شفت المخزن بتاعهم بجد حاجه محترمه
طبعا الى عاوز يجمع معلومات اكتر عن نوع الزيت هايلاقى موضوع مخصوص عن فالفولين فى المنتدى
وعلى فكره هما عندهم داتا بيز بكل انواع العربيات وانواع الزيوت المتلائمه معها
واسف للاطاله بس حبيت انقل تجربتى ليكم للافاده
وشكراً