إلى كل من اشترى عربية مستعملة او بالتقسيط
السلام عليكم
كل واحد مننا فى الغالب فكر الف مرة قبل مايشترى عربية مستعملة هل فعلا يجيب عربية مستعملة على قد فلوسه ويعيش رحلة المجازفة مع مصاريف الصيانة والميكانيكة،ولا يدفع الفلوس ال معاه مقدم عربية جديدة ويدفع الباقى أقساط ويعتبر ان القسط جزء من مصاريف صيانة العربية المستعملة ويريح دماغه من العطلة والصنايعية.
عايزين كل واحد مننا يقول تجربته واختياره بعد التفكير:
1- قررت تجيب مستعمل على قد فلوس ولا تجيب جديد وتكمل أقساط؟
2- ليه اخذت الاختيار ده؟
3 - العربية نوعها ايه؟ وموديلها؟ وكنت شاريها بكام؟ و معاك بقالها فترة قد ايه؟
3- صرفت كام تقريبا على العربية خلال الفترة دى؟
5 - حاسس ان قرارك كان صح ولا غلط؟
6- لو رجع الوقت بيك لمرحلة التفكير كنت هاتجيب عربية مستعملة كاش ولا جديدة قسط؟
وطبعا انا اول واحد يقول تجربته
1- قررت تجيب مستعمل على قد فلوسك ولا تجيب جديد وتكمل أقساط؟
قررت اجيب مستعمل على قد فلوسى
2- ليه اخذت الاختيار ده؟
لانى مش بحب ان يكون عليا أقساط او ديون.كمان قالوا ان اللانوس الجديدة مش كويسة وداخلها حاجات صينى. وانا اللانوس كانت انسب حاجة لظروفى .
3 - العربية نوعها ايه؟ وموديلها؟ وكنت شاريها بكام ؟و معاك بقالها فترة قد ايه؟
لانوس 2 - 2007-45000 جنيه - بقالها معايا اربع شهور تقريبا
3- صرفت كام تقريبا على العربية خلال الفترة دى؟
صرفت تقريبا لحد امبارح 1000 جنيه ،لكنى النهار ده بعمل عامرة كاملة للماتور هاتكلف تقريبا 1600 جنيه
5 - حاسس ان قرارك كان صح ولا غلط؟ ولماذ؟
شايف ان قرارى كان صح الى حد ما ،مع انى لو كنت دفعت ال 45000 مقدم كنت ها ادفع قسط تقريبا 875 جنيه على خمس سنين،بس قلت ان برضه العربية الزيرو هاتحتاج مصاريف وصيانة،فخفت ان مصاريفها تكون عبء مع الاقساط.
6- لو رجع الوقت بيك لمرحلة التفكير كنت هاتجيب عربية مستعملة كاش ولا جديدة قسط؟
بصراحة مش عارف.
منتظر تفاعل الاعضاء