انا كنت اعلنت عن عربيتي من 6 شهور في الموضوع ده:
http://www.nilemotors.net/Nile/294484-a.html

الموضوع كان فيه كل تفاصيل العربية وقتها
وانا حالياً عارضها للبيع تاني، وهاستلف واجيب اي حاجة زيرو ان شاء الله

خلال الفترة دي صلّحت شوية حاجات في العربية، وفي شوية حاجات باظت :)

1. بالنسبة للفتيس، الفتيس طلع سليم الحمد لله
نزّلت الزيت بتاعه وحطّيت زيت جديد اشتغل كويّس
بس هو في تسريب زيت في الفتيس حاليا محتاج يتعالج

2. بالنسبة لنقص المياة والسخونة
طلع وش سلندر للمرّة المليون
فا جبت وش جديد (القديم مانفعش فيه ملو)
وظبّطت الجوانات و الحركات
والحمد لله بقالي شهرين تقريبا مازوّدتش ميّة خالص

3. ظهر في العربية مشكلة جديدة
بدأ يظهر تبخير زيت، ونقص في الزيت
على المدى القصير باحط زيت شل تقيل واغيّره كل 1000 كيلو والعربية سحبها مش بطّال
بس على المدى الطويل (مش طويل اوي) محتاجة بلوكّة
هاتتكلّف بالمصنعيات بكلّه من 3 ل4 آلاف جنيه
اللي هايشتريها ممكن يريّح دماغه ويعمل الموضوع ده اوّل ما ياخدها وينسى القصّة دي

4. بالنسبة لمفتاح الازاز
جبت المجموعة كاملة استيراد ب600 جنيه من سوسو وركّبتها والازاز كلّه شغال كويّس

5. في سوط تزييق في العفشة قدّام يمين
ماعرفش مساعد ولا ايه

6. التكييف في آخر الصيف فصل لوحده، قد تكون حاجة بسيطة وقد تكون حاجة كبيرة

7. حالة الدهان الخارجي مش هايلة،هي مش ضايعة، بس مش هايلة... لو حد عايز يظبّط العربية هايدخّلها فرن ب2000 جنيه

8. برضو لو حد عايز يرجّعها زيرو، هايحتاج فانوسين قدّام استيراد

يعني باختصار العربية دواخل سليمة
صالون وكماليات زي الفل
كاوتش مش بطّال
محتاجة بلوكّة
ومحتاجة كشف على العفشة
ومحتاجة تصليح تكييف (ان شاء الله تكون حاجة بسيطة، سكسبالف ولا حاجة)
الدهان والفوانيس حسب الرغبة

انا كنت طالب 39 الف بالعيوب القديمة
بالعيوب الجديدة انا طالب 32 الف بس

في اعتقادي العربية ممكن تتشد شدّة محترمة ب8 آلاف
بس للي عنده دماغ وغاوي تظبيط
انا شخصيا تعبت من التصليح وتعبت من المستعمل وتعبت من الاوبل

ليّا بس طلبين:

1. اللي هاياخد العربية يكشف عليها كشف كامل، ويجرّب كل حاجة يتأكّد من كل حاجة بنفسه عشان انا مش عايز اتحمّل مسئولية قدّام ربّنا... انا من الاوّل اهوه بقول ان العربية فيها شغل (واحتمال يكون في حاجة اكتر من اللي انا كاتبها وانا ماعرفهاش)
2
. العربية دي انا اشتريتها ب39 الف من اقل من سنتين (بعد الثورة على طول)، وصارف عليها حوالي 30 الف... فا لو سمحتم 32 الف ده سعر نهائي نهائي نهائي، مفيهوش اي مجال للفصال... وانا بس عشان عارف ان المنتدى ناس محترمين وفاهمين، فا جبت معاهم من الآخر، بدل ما نقول 35 او 36 ونقعد نفاصل مع بعض ساعتين

العربية موجودة كل يوم برضو ان شاء الله في المحل في المعادي
وممكن برضو في البيت في الهرم

اللي يحب يشوفها يكلمني
01222533919

ولكم جزيل الشكر والاحترام