العربية الفيكترا ال بي 2 من العربيات المحترمه جدا .. هي تعتبر عربية عائلية .. مريحه جدا في السفر .. ثبات ولا كلمة .. ال 1600 سحبها كويس جدا .. في الطلعه بس تقيل سنه بسيطه.
عربيتي كانت عامله 160 ألف كيلو و مكنش فيها مشاكل في الكنترول الحمد لله .. و تكييفها ممتاز لو سليم و بيتصلح عند ناس بتفهم.
قطع غيارها أقل ما يمكن انك تقوله عليها انها مرطرطه في السوق .. و الميزة ان لو عندك مثلا جزء من قطعه ميكانيكية عاوزه .. هتجيب الجزء ده .. مش محتاج تجيب القطعه كلها.
مشاكلها باختصار:
البوهيه بتاعتها بتكلح زي معظم الأوبل.
محتاجه صيانه عند جد بيفهم .. لو اللي اشتغل فيها مش صنايعي أوبل هتلاقي كليبسات مكسره و بلاستيكات و كده.
فرشها محتاج عنايه أوي .. خصوصا فرش الأبواب.
الايه بي اس بيبوظ كتير .. بس بيتصلح بالكتير بألف جنيه و المشكله بتتحل نهائيا.
فك التابلوه بتاعها مقرف جدا .. لو لا قدر الله تلاجة التكييف باظت بتكوم مشكله .. حتى لو لمبات العدادت باظت فكها مقرف.
من الاخر لو لقيت عربيه نضيفه و استخدام كويس .. و حتى لو رشه بره نتيجة تكليح أو خرابيش بس دواخل فابريكه .. تبقى فرصه كويسه .. حتى لو موتورها مش كويس .. انت لو شفت كمية المواتير الاستيراد اللي في المخازن مش هتصدق نفسك.
و ربنا يوفقك لما فيه الخير.
المفضلات