الموضوع: هو احنا فعلا عنينا زايغه اوى كده؟؟؟؟؟

اولا انا متشكر جدا على النصائح الغاليه
الناس اللى مش عاجبهم الموضوع من اساسه انا فعلا عايزها تبقى مراتى وام عيالى ودى حاجه انا واثق منها مليون فى الميه
انا بس شايف ان فى مشكله فيا وباول انى اصلح فيها مش اكتر
وبالنسبه للعضو اللى عايز يعرف والدى رافض ليه هو ببساطه شايف انه مش وقته علشان اعرف اركز فى شغلى ومستقبلى ووادى من النوع اللى لازم اتعب شويع على ما اقتنعه باللى انا عايزه ياعنى الموضوع عايز صبر معاه علشان اثبتله انى فعلا قد المسئوليه دى
وعلى فكره البنت والدتها عارفه الموضوع وكلمتها بالفعل
اما بالنسبه بقى للناس اللى وصلتلى انها استحاله تبوص على واحده ماشيه فى الشارع فدا بصراحه انا مش مقتنع بيه انا اعرف ناس قمه فى الاحترام والتدين وممكن يعلقوا كمان على واحده عدت من جنبنا دى غريزه فينا على فكره زى العضو المحترم ما قال انا ممكن ابص على العربيات كلها طول ما انا ماشى علشان الجنط واللون ووووو طبعا مش بقول ان دا صح دا خلط وانا عارف دا
وشكرا تانى على النصائح

فعلا في فرق بين واحد بيبص بس مش فارقه معاه ولو خيروه بين اللي بيبص عليها وبين اللي معاه هيختار اللي معاه وهو مغمض وبين واحد لو بص علي واحده بيمجرد انه قارنها باللي معاه يبقي هي مش ماليه عينه او هو عينه زايغه ومفيش واخده هتملي عينه

اخى العزيز
السلام عليكم ورحمه الله
انت فى ايدك نعمه مش مقدرها فهذه هى التى تصلح زوجه صالحه لك فهى بتحبك ومستعده للتضحيه من اجلك
اما انت لاتغالط نفسك فانت لاتحبها ولكنك مبسوط من احساسك بوجد من يحبك.
لن تقدر هذا الموقف الا اذا احببت انت امراه اخرى وهى لاتحبك سوف تمشيك على العجين متلخبطوش ولن يفرق معها لانها لاتحبك وانت الذى تحبها.
خذ موقف بسرعه بدلا من ضياعها من بين يديك

طول منت امامك طبق فاكهة عمرك ما هتكتفى بنوع واحد ... مشكلة اغلب الرجالة مش مشكلتك وحدك ودى طبيعة الانسان اما ربنا امرنا ليه بغض البصر

بس خلى بالك لو فضلت على حالتك دى بدون ارتباط مستقبلا هتلاقى نفسك بتحطها فى مقارنات مع غيرها وهيجيلك الهاجس اياه بتاع انا استحق احسن من كده ...

انا مش كدا ,هههههههههههههههههه
فعلا البنات دلوقتى بقت مستفزه زياده عن اللزوم, المشكله لو الوحد بيبص فى ناحيه ولقى واحده حلوه بيقول اللهم اغزيك يا شيطان وبيحاول يغض البصر و يبص الناحيه التانيه الاقى واحده انقح من الاولانيه, طيب ابص فين, مقدميش غير السما ابص فيها واشكى حالى لربى, الاقى واحده لابس ملابس منيله بنيله وواقفه فى البلاكونه او بتنشر غسيل, طيب ابص فين مفيش غير الارض اكيد يعنى مش حلاقى جينيه من تحت الارض, اقوم باصص فى الارض اقوم الاقى ورقه من مجله عليها صورة مغنيه ولا ممثله من اللى ملهومش اول من اخر دول, اغمض عينى بقى ولا اعمل ايه انا مش فاهم.