ادعولى أنجح فى الامتحان وآخد الرخصة على خير

**Aesha** · 17-02-2013 02:40 PM

السلام عليكم يا أهل بروتون خاصةً ونايل موتورز عامةً:
أشكركم جميعاً على المعلومات اللى باكتسبها من مشاركاتكم ودلوقت جه الوقت اللى أطلب فيه دعمكم ... الحمد لله أنا اشتريت فى يناير عربية Gen 2 2013 وهى أول عربية اشتريها وكمان أول مرة أتعلم السواقة بس يمكن اللى مريحنى شوية انها Automatic وبالتالى خدت دروس السواقة على عربيات اوتوماتيك, وبعدين بقالى أسبوعين بمشى بيها يالتدريج الصبح بدرى قبل الشغل وأخويا جنبى..الأول كنت خايفة جداً بس دلوقتى حاسة إنى أكثر هدوءاً وثقة بس بصراحة لا زلت خايفة...
إن شاء الله أنا ناوية أروح امتحن فى مرور التجمع الخامس يوم الثلاثاء و اخدت حصة تمرين على امتحان حرف U بس ياريت تقولولى الامتحان العملى ايه بالضبط لأنى مش هلحق أبص بنفسى على شكل الامتحان قبل يوم الثلاثاء , يعنى U رايح بس ولا رايح وراجع ويا ترى فى حاجة تانى ؟
بالنسبة للملف هل هو متوفر فى المرور ولا هيدوخونى عليه زى ما بعض الناس قالولى؟ ويا ترى تمنه كام ؟
أشكركم على وقتكم ويا ريت تدعولى أخد الرخصة بسهولة ويسر بإذن الله

**S O P H O S** · 17-02-2013 02:47 PM

ربنا معاكـي ان شاء الله خير وتعدي
اهم شئ متوتريش نفسك وخلي اعصابك هادية
هي دقيقة وهتعدي علي خير
بالتوفيق ان شاء الله ..

**Aesha** · 17-02-2013 02:54 PM

أشكرك

**Land_Cruiser** · 17-02-2013 03:02 PM

حاولى حضرتك تتمرنى على قد ما تقدرى على الركنه فحاولى تضعى قرطاسين من بتوع المرور او اى حاجه تانيه زيهم حتى لو كرسيين مثلا و بعد كده تركنى العربيه ما بينهم و ممكن فى الاول تخللى المسافه كبيره و لما تركنى بسهوله و تتعودى على تقدير المسافات تبقى تقللى المسافه بالتدريج و التمرين ده مفيد قوى و عملى لانه هيخليكى تحكمى فى العربيه و تعرفى تطلعى قدام و ترجعى لورا بسهوله و ده مهم قوى و ده بالاضافه طبعا الى التمرين على الركنه فى أماكن ضيقه و دة من الحاجات المهمه قوى التى لا يمكن الاستغناء عنها وسط الزحام اللى بنعيش فيه و بالتوفيق ان شاء الله

**ICE_MAN** · 17-02-2013 03:20 PM

بالتوفيق ان شاء الله...

ماتنسيش تحفظى اشارات وعلامات المرور علشان الامتحان النظرى مع تجهيز الشهادات الطبية (باطنى-نظر-فصيلة دم)

**mhf_77** · 17-02-2013 03:46 PM

اولا بالتوفيق ان شاء الله
ثانيا معلش سؤال عشان ممكن تكون معلومه بالنسبه لى وتفيد زوجتى
هو ممكن دخول الامتحان بعربيه اوتوماتيك ؟؟
انا مطلع رخصه من سنه 2000 / مرور اسماعيليه - وايامها كان لازم الامتحان بمانيوال وموتور مش اقل من 1300 سى سى وكان المتاح ايامها معايا كيا برايد 1100 سى سى ولانسر اوتوماتيك ورفضو الاتنين وامتحنونى بعربيه من المرور نص نقل
- وزوجتى مبتعرفش غير اوتوماتيك
وانا اللى بقولها مينفعش تمتحنى الا بمانيوال
فياريت لو عندك معلومه مؤكده فى الموضوع ده استفيد بيها ومبروك مقدما

**Aesha** · 17-02-2013 08:23 PM

أشكركم جميعاً على نصائحكم ودعواتكم الكريمة و بإذن الله هركز على النقاط اللى ذكرتوها...
بالنسبة للشهادات الطبية عملتها النهاردة الحمد لله وشكراً على التذكرة ،أما عن الإشارات أدينى عمالة أحفظها وأراجعها كل شوية وربنا يسهل الأمور....
بالنسبة للامتحان على الأوتوماتك، أنا لما رحت آخد درس التدريب على الاختبار المدرب سألنى مانوال ولا أوتوماتك وبالتالى كنت راكبة اوتوماتك وأنا بتدرب على الاختبار والمدرب عارف إنى ناوية أمتحن على عربيتى...ومن هنا أعتقد إنه عادى إن شاء الله إنى أمتحن على أوتوماتك وأشكر حضرتك على التهنئة المبشرة بالخير، وبإذن الله زوجتك تمتحن على أوتوماتك ووننجح بتفوق احنا الاتنين بمشيئة الله...
يا رب تسمعوا منى أخبار حلوة يوم الثلاثاء...