الموضوع: محدش شاف عربيتي.؟ تجديد كامل لكرولا 2006 في مركز نايل موتورز

المشاركة الأصلية كتبت بواسطة zangry

ماشاء الله ربنا يباركلك فيها والف مبروك على التجديد ..والله احلى من ماكانت زيرو :d
لون الجنوط حلو كده احلى من لونها الاصلي بكتير

الله يبارك فيك يا جميل

المشاركة الأصلية كتبت بواسطة karim_monir

الف مبروك يا علي
انت شخصية محترمة جدا وسعيد بالتعرف عليك
حابب اقول ان علي اختار كود لون بتاع المرسيدس تقريبا الجديدة بالكود بتاعها معجبوش بتاع التويوتا :-)
واضح انه نمكي قوي في التفاصيل
تاني حاجة بالنسبة للجنوط علي متمسك بالجنوط الاصلية ال 14 عشان ساكن في حتة مش ممهدة
الجنوط كانت مخربشة قوي قوي
فكان قدامنا حلين
اننا نعيد معجنة الجنوط عشان تاخد لون فضي وده حل يخوف مع حد مش بيتعامل مع بتوع كاوتش محترفين
التاني ان البطانة بتاعت المعجون الابيض معجون خفيف ومعجون فايبر ومش محتاج ورنيش يلمع فيداري تفاصيل الخدوش في الجنط وده كان الحل اللي اختارة علي

الف مبروك يا باشمهندس وربنا يحميهالك ويكفيك شرها

الله يخليك يا أستاذ كريم
فعلاً متمسك بالبروفايل العالي علشان الطرق في أرياف الأرياف لو شافتها إسرائيل هنصعب عليها و هتدينا معونات
وفعلاً كود الكورولا الأبيض مش ناصع كدا ودا باين في الرفرف اللي في الصور وكان عليه توضيح للفروقات بين الدرجات

المشاركة الأصلية كتبت بواسطة dr.kordy90

بسم الله ماشاء الله شغل عااالي بس بصراحه الحاجه الوحيده اللي حاسس انها لو كانت فضلت علي وضعها كانت هتبقي افضل الجنوط وممكن ليدات الاكصدام وضعهم مش مريح بس طبعا الحاجت دي ازواق وربنا يباركلك فيها ويكفيك شرها يارب

للأسف الجنوط كانت متجرحة
هي آه مش متجرحة أوي بس كان منظرها مش كويس واللي شافها الأول يعرف ان الآن أفضل والحمد لله
وفعلاً هي أكيد أذواق
ليدات الإكسدام حاجة كدا فلح
هههههههههههههه
العرق المنوفي نأح عليا ساعتها
بس أهم حاجة الواحد يكون راضي وقنوع
شكراً لك

المشاركة الأصلية كتبت بواسطة rompo10

بسم الله ما شاء الله العربيه فرقت جامد بس العيب الوحيد الجنوط لو زي ماهي كانت هاتبقي احلي بكتير

شاكر مرورك

المشاركة الأصلية كتبت بواسطة egyptiandiver

الف مبروك عليك

الله يبارك في سعادتك

المشاركة الأصلية كتبت بواسطة hossam_elwani

الف مبروك عليك كله تمام الالالالالالالالالالالالا الجنوط

نورت القسم يا محترم
والله يبارك في حضرتك
ممكن الجنوط مش أوي في نظر الكثير ولكن مقتنع بيها والحمد لله

شاكر مرورك

المشاركة الأصلية كتبت بواسطة beso516

احييييييييييييييييييييييي يييييك
بسم الله ماشاء الله
احب الشغل الكلاسيكى البسيط ده

منور
أنا كمان مبحبش اللعب الكتير
بس موضوع الليدات جه كدا

المشاركة الأصلية كتبت بواسطة algazar2

شغل حلو ما شاء الله
و الدهان ما شاء الله بجد حلو جدا جدا و طبعا الفرش شغل جينز كار و كريم منير مخلى العربيه احلى من الفابريكه بتاعتها

الحمد لله
كل ما تم في السيارة داخلياً وخارجياً خرج بشكل أكثر من ممتاز والحمد لله

المشاركة الأصلية كتبت بواسطة y a r i s

لا بسم الله مشاء الله والله اكبر
حاجة رستاتيكوو خالص وشغل على ميه بيضة ... بس انا مفهمتش هو ايه المايكروفون. الي ملزقوا في سقف القايم من جوا العربية ... هو انتا مركب الصندوق الاسود زي بتاع الطيارات ياعلي )
ولا بتسجل للناس الي بتركب معاك :) ههههههه

وفي كمان بتاعه مدلدلة من الكاسيت دي بتاعت ايه دي ياباشا !

اما غير كده بسم الله مشاء الله شغل على كورولا بيضه او على مية بيضه زي ما بيقولوا ... ربنا يحميك يا عزيزي ويحميلك عربيتك ويكفيك شر الطريق عاوزك بقه يابطل تجربلي الكراسي الجديدة كده مشوار طويل وتقلي احساس القعده بقه عامل ازاي. وهل هدومك بتبقى شوربة من ورى ولا زي الفل ... علشان بفكر اعمل فرش انا كمان ... حاكم الفرش عندي اتهرى وفي انتظار تنقلنا خبرتك واحساسك بالفرش الجديد والف الف مبروك ياباشا

منووووووووووور يا عمدة
المايك دا خاص بالبلوتوث
واللي مدلدل دا الزرار وتحكم صوت البلوتوث
واللي كنت ذكرتلك قبل كدا ان أنا هنزل تقارير للحاجات دي

بس لأخذ العلم
البلوتوث دا نوكيا أصلي
كنت جايبه ب 100 بعد خفض سعره من 600
ومركبه عند واحد بتاع كاسيت
ومن نظرتي
سهل جداً أي حد يركبه بنفسه لو محترف شوية
(((((( زيي كدا ))))))))))))))

والفرش
كنت مركب كسوة الأول من التوكيل
كانت ممتازة
وبعد فرش جينز كار
الكراسي عليت سنة صغيرة
بس بقت أريح كتير

الكراسي مش بتعرق في المشاوير الطويلة
سواء الكسوة القديمة أو التفصيل الجديد دا

كان فيه كرسي جنب السواق بيزيق وكنت فاكه بنفسي قبل كدا ورشيت عليه دابليو دي أربعين
واختفى ورجع تاني يزيق بعد أسبوع

بلغت جينز كار بكدا
وتم علاج الأمر ومعرفش إزاي
بس هجرب لسة

المشاركة الأصلية كتبت بواسطة modo88

الله ينور بقت عربية ما شاء الله بس فعلا الجنوط لو بلونها العادي كانت تبقا احلي او كنت غيرتهم.
سؤال بقا ايه الاجرائات القانونية اللي عملتها عشان تغير اللون؟

بص يا سيدي
روحت يوميها بالليل بعربيتي
رحت المرور الصبح جبت أورنيك فحص ملاكي ب 18 جندي
نزلت أفحص
تعرف المهندس يكتب اللون الجديد بدل القديم في خانة اللون
هيقوم يبص معاك على الدواخل علشان يتأكد من اللون القديم
خلصت فحص ؟؟؟؟
اطلع سلم ورقك يتراجع عالكمبيوتر ويطلعلك التكاليف
لو الرخصة سارية هتدفع 10 جنيه بس
8 رخصة و 2 استيكر الرخصة اللي عالإزاز
وتطلع نفص الرخصة القديمة ونفس تاريخ الإنتهاء
بس اللون الجديد و تاريخ الإصدار

بس كدا

المشاركة الأصلية كتبت بواسطة wael30003

ابدا بيغير اللون الاول

وبعدين بيروح يرخص وفى استمارة بيملاها باللون الجديد

وبس خلاص

باختصار شديد

مفيش استمارات يا باشا
الموضوع أبسط من كدا بكتير
وشكراً لإهتمامك

المشاركة الأصلية كتبت بواسطة Ahmed_Ramadan

جايبه منين يا باشا ؟؟

كنت جايبه من راية

وجبت منه حتتين
واحدة اللي ب 100 ودي اللي راكبة في التويوتا

والتانية كانت ب 75 بعد خفض السعر للتصفيات
وكنت مركبها ف عربية سوزوكي سوبر كاري
التمناية المايكروباص دي وكانت خاصة بيا


والآن مش متوفي في راية خالص لأن الكمية اللي تبقت عندهم رجعوها للمستورد تاني ومش هايجيبو تاني النوع دا علشان مكنش حد عنده خلفية بيه ومكنش بيبيع


بس أنا هقولك كود المنتج من نوكيا وانت ممكن تشوفه عند أي مول إلكترونيات هنا في مصر
أو تشوفه على أمازون وغيره لأنه منتشر هناك أوي
وهبقى أفضى وأنزلك صور للعلبة والكتالوجات لو عرفت
وعلى فكرة
دا راكب معايا بسم الله ما شاء الله بقاله 5 سنين والحمد لله الزرار بس عايز يتلزق بس أنا سايبه مخلوع لحد ما أفضالو

Nokia Advanced Bluetooth Car Kit
CK-7W

موفق

ماشاء الله ربنا يباركلك فيها
تلوين الجنوط دا موضوع جامد بس احنا هنا في مصر مش متعودين عليه وبنحسه غريب
الليدات اللي بتركب من جوا الشبكه اللي تحت او حوالين الشبورة بيكون شكلها اجمد من دي
كل حاجه مظبوطه ماشاء الله ناقصك بس ياباشا كاست دفي دي وبلتوث وجبي اس هيغير شكل العربيه من جوا وهيكمل شياكتها عشان الاصلي شكله عقيم بصراحه بتاع تويوتا وتريح دماغك من الاسلاك اللي طالعه دي
جيب النواكل بتاعت المقابض بس وشايف ان من غير تفييم الفانوس اللي ورا هيكون احسن والموضوع في الاخر اذواق وراجع لراحتك انت
بالنسبة لتغيير لون العربيه قبل كدا انا غيرت اللون قبل التجديد ولما رحت فحصت كتبوا اللون الجديد من غير اي حاجه
كنت عايز اعرف ياباشا الدواسه سعر المتر والمصنعيه
وربنا يديك خيرها ويكفيك شرها

المشاركة الأصلية كتبت بواسطة y a r i s

انتا ليك حد شغال في رايه يا علي !

أبداً والله بس تفاصيل التفاصيل دي تقدر تعرفها لما تصاحب حد من جوا المكان
ويبقى فيه بينكوا مصالح مشتركة

صباح الورد