الموضوع: بلية الدبرياج

السلام عليكم ورحمة الله وبركاته
بقالي فترة كبيرة بواجه مشكله في عربيتي ارجو المساعدة من صقور المنتدى
عربيتي نيسان صني موديل 2009 مانيوال
من فترة كبيرة كنت دايما وانا طالع الكباري وخصوصا لما بتبقى زحمة فطبيعي إني لما ابتدي اتحرك بشيل رجلي من على الدبرياج واحده واحده وبدوس بنزين بسيط لغاية مالعربية تمشي وبعد كده تاخد الغيارات حسب السرعة, أثناء التحرك من السكون ده بقى بسمع صوت (ترررررررررر) جاي من الموتور, وللأسف كنت كل اما اروح اعمل صيانه للعربية وأبلغ التوكيل كان ردهم ان العربية مفيهاش حاجه وانهم حطوها على جهاز كشف الأعطال ومفيهاش مشكلة. وسالت بعض أهل الخبرة فقالولي ممكن يكون السبب هو بلية الدبرياج.
المهم فضلت على كده لغاية مالعربية خرجت من الضمان في شهر 8 سنة 2012, ومن حوالي 3 أسابيع كنت بعمل صيانة الـ 35000 وبلغت عن الصوت ده عشان يشوفوا أيه مصدره, لما جيت استلم العربية المهندس قاللي انهم هيحتاجوا العربية تجيلهوم تاني عشان لازم الموتور يتفك ويكشفوا على المشكله دي عشان يعرفوا اذا كان المشكله سببها بلية الدبرياج والا الاسطوانه والديسك, المهم قولتلوا ان العربية خرجت بره الضمان, وقبل كده لما كانت لسه في الضمان كنت بقولكوا على الصوت ده وكان الرد ان العربية مفيهاش حاجه, المهم هو قاللي كده كده لو كان المشكله في الاسطوانه والديسك فدي مالهاش دعوه بالضمان حتى لو العربية عاملة 1000 كيلو, وعلى العموم ابقى هات العربية واعمل حسابك انها هتبيت في التوكيل عشان نشوف سبب الصوت ده.
لغاية دلوقتي لسه مروحتش لأني مشغول.
فقولت أعرض الموضوع عليكم عشان استفيد من خبراتكم.
هل لو الصوت سببه بلية الدبرياج فهل تغييرها مكلف والا لأ, وبكام؟
ولو الصوت سببه الاسطوانه والديسك برده تكلفته أيه.
وهل ممكن أكشف على المشكله دي بره التوكيل, والا ده فيه خطر على العربيه؟
أرجو الإفادة منكم, ولكم جزيل الشكر.