الموضوع: قواعد شكمان ميجان يا وحوش : تغييرها إًصلاحها أماكنها وطرق وقايتهابالسيارة

السلام عليكم

من فترة ممدوح باشا كلمنى عن قاعدة شكمان فى عربية صاحبه اتقطعت وبسببها الشكمان نزل شوية وبقى يحك فى المطبات تقريبا

أنا وعدته بإنى هشوفها وبالفعل نزلت تحت العربية من كام يوم عشان أشوف إيه هى قواعد الشكمان دى

هى عبارة عن حامل للشكمان فى جسم العربية بتمسكه فى جسم العربية وفى نفس الوقت بتمتص ذبذبات الشكمان عشان متوصلش لمقصورة الركاب

هى مكونة من 3 أجزاء رئيسية

جزء حديد وجزء جلد وجزء بلاستيك فيه شدادات قماش بولستر

الجزء الحديد مثبتها فى جسم العربية الجزء الجلد بيمص الصدمات بتاع الشكمان ويمنع وصولها لجسم السيارة والجزء البلاستيك اللى فيه الشدادات بيتحكم فى حركة الجزء الجلد

الحبلين القماش اللى فيها دول بيحددوا حركة الشكمان فى نطاق معين

نفس نظام المساعد والسوستة فى العربية فى القاعدة الجزء الجلد والحبلين القماش دول نفس الوظيفة

العربية فيها 2 قاعدة شكمان
واحدة ماسكة الشكمان فى نص العربية بعد علبة الشكمان الأولى الطويلة اللى فى النص مباشرة
وواحدة ماسكة الشكمان من علبة الشكمان الكبيرة اللى من ورا ودى سهلة لو نزلت تحت العربية من غير ما ترفعها وبصيت جنب علبة الشكمان هتلاقيها ماسكاها فى جسم العربية

الصورة دى مبينة قدامنا القاعدة اللى فى نص العربية نفكها أزاى ؟؟

القاعدة اللى فى النص متثبتة فى جسم العربية بمسمار ألانكيه ( محتاجين طقم ألانكيه نجمة طبعا ) ومتثبتة فى الشكمان نفسه بمسمارين مقاس 10 يعنى مفتاح 10


أنا فكيتها طبعا ودا شكلها شايفين عندى إيه اللى حاصل فيها القطعة الجلد مقطوعة ولكن الشداد القماش سليم وفيه شداد تانى وراه بس مش باين فى الصورة سليم برضه ...... أنا اكتشفت بالصدفة أنها مقطوعة يا أصدقاء


بس أنا لحمته .... جبت أبرة وفتلة وخيطته وبعدين جبت سلك ورعديته زى نظام كوبرى سخنته وخرمت بيه الجلدة وبعدين ربطته كويس وبعدين جبت سليكون حرارى وغطيت النظام كله

نبص كدا فى الصورة تانى أنا معلم بنقط لونها أحمر على أماكن الخياطة ومعلم باللون الأزرق على أماكن دخول السلك عشان أضم بيه الجلد على بعضه اخترت أقوى منطقة فى الجلدة وسلك رفيع نحاس ومربطتش قوى سبت براح برضه وبعدين غطيت بالسيليكون عشان يبقوا كيان واحد




وبكدا رجعت تانى زى ماكانت ولو سبتها كان الموضوع هيتطور والشداد الحبل هيتقطع طبعا
بالنسبة للأعراض لو القاعدة اللى فى النص مقطوع الجلدة بتاعتها زى عندى كدا هتحس بزنة خفيفة مع بداية سحب السيارة ...... طبعا لو القاعدتين مقطوعين نهائيها الشكمان هيقع خالص وهتبقى مشكلة توقع بقى لما الشكمان دا كله هيبقى نازل على الأرض وماشى يجر ورا الموتور عشان كدا هتكلم عن طريقة وقايتها للى عنده قاعدة سليمة وعايز يطول عمرها

من المعروف إن الكاوتش ليه عمر افتراضى وبيتأثر بعوامل الجو والرطوبة والقاعدى دى اللى نزلت فى العربية من 2007 وهى كانت شغالة برضه لكن كان فيه زنة بسيطة والعربية بتبدأ تسحب مع الغيار التانى كدا يحسها اللى قاعد ورا بس أو لما تكون العربية باردة ودلوقتى اختفت تماما

كان عندى فكرة تانية لعزل أقوى ممكن نحط طبقة سيليكون فوق المكان اللى بيتربط فى جسم العربية ونسيبه ينشف وبعدين نربط هيعمل عزل أقوى بالتأكيد

اللى بيحصل إن الجزء الكاوتش دا بيتقطع فى الأول بعديه الشدادات أو الحبال القماش بتتقطع وبكدا الشكمان ميبقاش فيه حاجة ما سكاه

طبعا الحرق والشد بيقصر من عمرها وعمر قواعد الموتور والفتيس بالتأكيد بس دا على المدى البعيد

أكتر حاجة تأثر عليها بجد لما تكون العربية جايبة كويل و تمشى بيها هزات الشكمان بتبقى عنيفة جدا

بعدين بصيت على قاعدة الشكمان اللى ورا ودى مكانها باين قوى ونفس طريقة الفك بس هنا فيه مسمار 13 او 14 تقريبا اللى مثبتها فى جسم العربية بدل المسمار الألانكيه فهنحتاج مفتاح بيبة

بس دى كانت سليمة كليا ودا مكانها





عايز تطول عمر القاعدة ؟؟ فيه مواد بتترش على الكاوتش بتطريه وبتطول عمره وبتمنع التشقق والنشفان للكاوتش بيقولوا السيليكون السبراى ينفع فى الحتة دى

الموضوع بسيط جدا يا جماعة وهى نفسها القاعدة دى حاجة بسيطة جدا وممكن تغيرها بنفسك

القاعدة اللى ورا ممكن لو نمت تحت العربية من ورا تعرف تتعامل معاها كويس

لكن القاعدة اللى فى النص لازم العربية تترفع على كوريك بس أنا بقى عشان أريح دماغى كان عندنا شوية طوب كدا من اللى بيتعمل بيه الأرصفة رصيتههم ورا بعض وطلعت بالعربية عليه