الموضوع: الرئيس محمد نجيب - دعوه للحوار الجاد المثمر

المشاركة الأصلية كتبت بواسطة sha2e

وطوعك قلبك تنسى "محمد علي" ياراجل ؟

ههههههههههه ده المعلم الكبير :d

يا محمد باشا سيبك منى انا.....انا يهمنى اللى انت توصلت ليه و زى ما بتقول مش عارف لسه تصيغه فى كلام و هو ده بالظبط اللى يهمنى نتناقش فيه..... هو ده لب الموضوع و عشان كده انا فى ردوى هتلاقينى برمى مفاتيح تساعدك فى بحثك اكتر من انى بقول اراء صريحة ممكن تشوش تفكيرك..... انا لما كنت بشارك فى المواضيع السياسية كانت ارائى معروفة حتى من كثير من المشاركين فى الموضوع ده نفسه..... عشان كده تكرارها ملوش لازمة بالاضافة الى انى ما فييش دماغ الصراحة ادخل فى جدالات لا هتودى و لا هتجيب..... عشان كده بكتفى انى براقب و اتفرج على اللى بيحصل و اخد و ادى مع نفسى و بس.....

بخصوص موضوع ايران..... ده بقى يا سيدى الكابوس السياسى و العسكرى الشخصى الخاص بى..... و يكفى انى اقولك انى دارس للملف ده و بتابع تطوراته بشكل يومى على سبيل الهواية..... و دارس جيدا لامكانات ايران العسكرية بالتفصيل و عارف حجمها كويس.... كما اعرف جيدا و اتابع ما يدور على الجانب الاخر من تطورات و استعدادات..... بس دى قصة تانية مش عايز ادخل فى تفاصيلها خالص لان زى ما قلت هى كابوس شخصى لى و مش عايز اتكلم عليه الا لما يحصل.... و خلى بالك من لما.... مش لو
اما موضوع تقاربنا معاهم..... يا ريت بس منلزقش فيهم اوى و تكون مجرد مناورة سياسية زى ما انت قلت

انا بقى مع اخر سطرين من تعليقك الاخير تماما..... محدش هيساعدنا غير انفسنا..... باقى بقى ان احنا من كبير لصغير نفوق لنفسنا.....

حاضر يا سيدى الفاضل.... نزولا على رأيك الكريم..... انت عايز تعرف من الاخر احنا رايحين فين و جايين منين..... نرجع لورا شوية كتير و نشوف...... و نسيب التاريخ يدل خطواتنا مما نستخلصه من عبره...... و هرجعلك لغاية يادوبك العصور الوسطى..... لانها كانت مفترق طرق لشعوب و كتل بشرية كتير...... الخلاصة لعصور اوروبا الوسطى هتلاقيها فى مشاركتى رقم 25 من الموضوع ده:
http://www.nilemotors.net/Nile/291362-a-3.html

طيب و احنا؟ احنا للاسف جه واحد و احتل بلدنا 300 سنة (من 1517-1805) و ده لسبب واحد..... انه عمل حيلة لطيفة جدا..... انه كرر اللى عمله من قبله الاسكندر الاكبر قبلها ب 2000 سنة لما عشان يخلى حكمه لمصر شرعى قام اعلن نفسه ابن لامون..... فبعد موقعة الريدانية سليم الاول دخل مصر و عرف الناس بيه انه مسلم زيهم و كمان سنى..... هيصوا و هتفوا له..... و ذهبوا المماليك و اتى العثمانيون 300 سنة

مع ترنح الدولة العثمانية مع الوقت و الفساد اللى دب فى اوصالها..... و مع نداءات اليقظة لدخول عصر جديد اللى تمثلت فى الحملة الفرنسية..... جه محمد على..... خد بأسباب العلم و بعت بعثات للخارج (مش قال عايز يعرب العلوم زى ما ناس اصحابنا كتبوا فى دستورهم.... قال يعنى شماليل قوى و بيقودوا قاطرة العلم فى العالم عشان كده عايزين كل حاجة تبقى بلغتهم) و عرف مفاتيح التقدم و عوض ال 300 سنة جمود و تخلف عن ركب العلم السابقين بتوع حكم العثمانيين..... لكنه ارتكب خطأ قاتل.... سمعت قبل كده عن مبدأ مونرو؟ جيمس مونرو هو خامس رئيس لامريكا..... و جه بعد ثورتهم بكام و عشرين سنة يعنى البلد كانت لسه فى اولها..... فعمل مبدأ للسياسة الخارجية خلاصته ان امريكا مش هتتدخل فيما حولها من شئون العالم الا لما تكتمل لها اسباب القوة اللى تخليها تتدخل عشان تأثر فى هذه الشئون...... عارف المبدأ ده استمر سارى لغاية امتى؟ لغاية الحرب العالمية الاولى يعنى بعدها ب 100 سنة و ساعتها لما امريكا اتدخلت كانت تملك من اسباب القوة ما يجعلها تؤثر...... محمد على بقى غلطته كانت انه استعجل على الطبخة..... الحلم الامبراطورى اخذه و خلاه يحلم يكون وريث الامبراطورية العثمانية رجل اوروبا المريض و اللى فى نفس الوقت كان بينافسه على تركتها القوى العظمى الاخرى فى ذلك الوقت و بالاخص بريطانيا...... و لانه استعجل و طلع يتوسع بره بلده بدرى زى ما قلنا فكان من السهل على الامبراطورية اللى لا تغيب عنها الشمس و كانت مازالت فى اوج قوتها انها تقود تحالف دولى ضده رجعه تانى لحدود مصر مقهورا مدحورا بعد ما حسسهم بتهديد حقيقى..... و استمر حكم الاسرة العلوية 100 سنة كمان بعد محمد على بقوة دفع انجازاته ليس الا......

نيجى لثورة 52...... حركة من ضباط صغار فى السن طموحين عندهم رغبة فى التغيير و نفذوها فى شكل انقلاب عسكرى الذى تحول الى حركة مباركة (كبداية لتسويقها للشعب) ثم انتهى الى ثورة لما فترة العك و صراعات السلطة خلصت و الناس لقت رمز تلتف حوله فى شخص جمال عبد الناصر..... احلام التحرر و الظروف الدولية و كمان الرغبة الحقيقية على الاقل فى البداية فى الاصلاح ساعدت ناصر فى ان الناس تلتف حوله اكتر و اكتر..... العدوان الثلاثى و اندحاره...... قوانين الاصلاح الزراعى و الرغبة باللحاق بركب التقدم فى التصنيع و القاهر و الظافر و غيره...... بس برضه و كأنه مش مكتوب يعيشلنا حلم..... عبد الناصر كان زمنه زمن الحاكم الفرد..... و ساعده على كده حب الناس و كاريزمته الشخصية...... و النتيجة نظام شمولى قمعى كان فاكر نفسه حاجة (النظام) و طلع و لا حاجة لما كشفته النكسة

السادات..... حاول يبقى عبد الناصر معرفش..... و لانه كان سياسى بيلعب بالبيضة و الحجر..... ضرب كذا كرسى فى الكلوب لغاية ما الكلوب نفسه وقع على دماغه هو شخصيا و مات بيد من اخرجهم من السجون.... لكن يحسبله انه اخذ قرار حرب اكتوبر اللى ربنا ستر و عدت بسلام و بعدها المفاوضات اللى برضه عدت بسلام لغاية ما خدنا ارضنا تانى بالتيلة.....

مبارك..... بداياته كانت توحى بأنه كأنسان كويس (البدل الصيفى بتاعة الطبقة الوسطى و التاييرات العادية جدا لمراته)..... لكن لان السلطة المطلقة مفسدة مطلقة..... كان ما كان و انتهينا الى ما انتهينا اليه..... و لانه كان محدود الامكانيات..... فلم يكن مميزا على اى صعيد سياسى..... استسلم لفكرة السادات ان 99% من اوراق اللعبة فى يد امريكا و عن طيب خاطر سلم لهم ال 1% الباقى..... داخليا اتعملت حاجات كويسة فى البلد لكن لانها بلا رؤية متكاملة فلم تتماشى مع حجم البلد و فى النهاية الفساد اكل كل شئ.....

وصلنا لثورتنا الاخيرة..... المرة دى كانت من تحت (الناس) لفوق (تغيير قمة النظام) مش زى 52 من فوق (ممثلا فى الجيش) لتحت (لما الشعب اقتنع بيها و ايدها)..... و لان ثورتنا كانت شعبية بلا قائد.... فوصل الى السلطة فى اخر مسارها من كان عنده اجندة و فكرة بيحلم بيها من زمان.....

كل الكلام اللى فات معروف و مفيش فيه جديد..... طب ايه اللى خلانى اكتب المقدمة الطويلة اللى فاتت؟ هو انى هربطها كلها بالاخوان و نظامهم اللى بيبنوه دلوقت و مستقبله كمان.....

الاخوان ككيان مبنية على فكرة..... يعنى حلم..... جميل اوى..... بس من الاساس فى خلل فى تكوين كيانهم ده..... هم حلمهم سياسى..... لكن اليافطة اللى بيسوقوا الحلم ده تحتها هى دينية..... و هنا نيجى لاول خلل و نرجع لاول نقطة انا كتبتها و هى خروج اوروبا من عصورها الوسطى..... طيب يا عم ما ممكن ينطلى الموضوع على المصريين زى ما حصل ايام العثمانيين و يسيبوا الاخوان 300 سنة بسبب انهم بيقولوا قال الله و قال الرسول...... بس المصريين مش عبط و الوعى اتطور و الناس عينيها فتحت...... و النتيجة ان الخدعة دى..... انك تبيع نفسك للناس على انك بتاع ربنا يعنى المفروض عندك اخلاق الدين لكن افعالك مفيهاش غير كل انتهازية السياسة...... مش واكلة مع الناس لانهم فهموا كويس ان كل غرضك الكرسى.....

طيب و الحلم الجميل بتاع الاخوان..... الخلافة..... استاذية العالم..... ميستاهلش ان احنا كشعب نعتنقه معاهم؟ و هو مين ما يبقاش عايز انه يتسيد العالم..... المشكلة الحقيقية هى ازاى..... و هنا نأتى للخلل التانى و هو خطأ محمد على..... الاخوان كل ما يهمهم هو الوصول الى الكراسى فى اى حتة و الاستحواذ عليها بأى ثمن..... يعملوا ايه بقى بالكراسى دى هو ده اللى احنا اكتشفنا انهم ببساطة معندهمش ادنى فكرة عنه..... على رأى اللى قال..... قعدوا 80 سنة بيسعوا انهم يحكموا...... بس فى الطريق نسيوا يفكروا يحكموا ازاى لما يوصلوا..... طيب يا عم الاخوان الحلم بتاعكم العابر للدول ده الله يكرمكم ركزوا بس فى البلد اللى انت مسكتوها و احسنوا ادارة احوالها و بعدين ابقوا كملوا..... لأ..... لا يتطورون و لا تبدوا اى علامات على تطويرهم لميراثهم الفكرى اى بادرة..... الكارثة الاكبر انه حاليا معندهمش اى حد بقامة فكرية كبيرة يقدر يقود التجديد الفكرى المطلوب..... عشان كده هم واقفين عند سيد قطب اللى بدوره اخد من ابو الاعلى المودودى.....

ثم من الاساس..... هل الخلافة كما نشأت مما يزيد على الف سنة قابلة للاستنساخ الان؟ من اكتر من الف سنة نشأت الخلافة بقوة دفع دين جديد و فى ظروف دولية موائمة فيها قوتين عظمتين تتهاويان..... عشان كده نجحت..... شوف بقى ظروفنا دلوقت..... احنا فى سبنسة التقدم البشرى على كل المستويات

طب و الاخوان كنظام سياسى؟ حدث و لا حرج..... بكل نشاط و همة يعملون لاحلال استبداد العسكر السابق بأستبدادهم الخاص بنظامهم المنهمكون فى تأسيس اركانه..... يعنى عاملين كوكتيل ظريف من عبد الناصر (رغم ان المقارنة مش فى محلها اوى الا ان الشاطر هو اللى فيهم بيمشى الامور بطريقة عبد الناصر الحاكم بأمره) على السادات (الانتهازية السياسية و اللعب بالبيضة و الحجر و اللعب على كل الحبال طالما هتوصل و الغاية تبرر الوسيلة) على مبارك ( الافق المحدود و عدم الطموح و الجمود و عدم وجود رؤية قابلة للتنفيذ على ارض الواقع و قلة الحيلة فى الحلول للمشاكل الاجتماعية و السياسية و الاقتصادية).......

طب و النتيجة...... رايحين فين؟ رايحين مطرح ما راحت الثورة الفرنسية اللى احلت دكتاتورية نابليون محل لويس ال 16..... و مطرح ما ستالين استولى على الحكم فى 1924 بعد 7 سنين من قيام الثورة البلشفية (و يا للعجب كلمة بلشفيك معناها الاغلبية :) بعد ازاحة كل معارضيه بالذات من المفكرين امثال لينين و ليون تروتسكى و استمر فى الحكم الى 1953......

طب يا عم مفيش امل خالص؟ الامل فى ان يصلح الاخوان مسارهم و احلامهم و يطوروا ميراثهم الفكرى اولا لكى نرى تغييرا على الارض..... هل ده هيحصل؟ لا اعتقد..... هم متمسكون بأهداب الماضى كما ورثوه و ليس لديهم الرغبة و لا القدرة حتى لتطويره.....

طب و الناس؟ الناس لما هيفيض بيها الحال و مع استمرار تجاهل الاخوان لاثار قراراتهم المتخبطة على الناس..... الناس لما يفيض بيها الحال البلد هتقلب كلها بورسعيد..... بس يا عم ازاى ده الاخوان مؤيديهم كتير و عندهم ميليشيات و بيأخونوا الدولة و بيزرعوا اذرعهم و اتباعهم فى كامل جنباتها..... الاجابة ببساطة هى مش بورسعيد فيها اخوان؟ و ميليشياتهم كمان؟ طب هم فين؟ و هل حد فيهم بيجرؤ دلوقتى يعلن و يجاهر بأخوانيته؟ الطوفان لما بييجى بيزيح..... و المرة الجاية مش هيبقى طوفان سياسة و لا رغبة فى تغيير نظام الحكم..... لأ هيبقى طوفان بلد تحترق بنار نظام الاهل و العشيرة و الجماعة و الاخوة اللى بدل ما يخلصوا النية لله و للوطن مازال اللى فى دماغهم فى دماغهم بالاضافة ان اصلا مفهوم الوطن ده مش فى منظومة معتقدانهم من الاساس..... و بورسعيد سيل صغير و عينة مما يمكن ان يكون

هييجى حد يقولك ايه يا عم الكآبة دى و التحامل الشنيع على الاخوان ده..... انت مش شايف فيهم حاجة عدلة خالص.... ايه التحيز و التحامل ده...... و كمان قبطى..... عشان كده بقى :)

هقول و الله شاهد على ما اقول..... انى رغم اختلافى الكامل مع فكر الاخوان من اساسه الا انى كنت اتمنى لهم النجاح و الفلاح من كل قلبى.... ليه؟ ببساطة لان نجاحهم هو نجاح لبلدى و رخاء و عيشة كويسة لى و لكل مواطنى هذا البلد لان هذا هو ما يستحقونه ..... ده ببساطة موقفى..... لو كانوا اثبتوا كفاءة و كرامة كنت انا شخصيا اول واحد هيعطيهم صوته لكى يستمروا..... و انا كمواطن يهمنى ايه غير راحتى فى عيشتى و راحة بالى على مستقبلى فى البلد اللى عايش فيها؟

هييجى حد يقولك طيب و البديل؟ يعنى انت عايزهم يمشوا طب و ييجى مين مكانهم؟ انت يعنى شايف الساحة مليانة قوى بالسياسيين الشماليل اللى هيصلحوا المايلة؟ الاجابة برضه ببساطة ان انا مش عايز حد بعينه..... المفروض ان الناس هى اللى تحدد..... و تحدد صح..... بس ناخد بالنا..... ان عشان الناس تحدد صح لازم و عيها يكون من النوع اللى لا بيتباع و لا بيتشرى..... و كمان من النوع الناضج الفاهم الدارس..... مش كله بيطجن و يفتى و خلاص بدون علم و لا دراسة...... و طبعا عشان ده يحصل محتاج عشرات السنين...... هيفرحوا الاخوان و محبوهم و يقولك قشطة احنا عاوزين عشرات السنين دى :) هقولهم متفرحوش اوى لان لو معرفتوش تصلحوا من حال البلد على اى مستوى و بسرعة قريب مش هيبقى فى بلد تحكموها اساسا...... اضف الى كده كابوس الوضع الدولى الاقليمى و الاعصار اللى بيتشكل فى الافق......

و فى النهاية...... (إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ) و الاية الحكمة دى انا بقولها لنفسى اولا ثم للكل ثانيا..... حاكم و محكومين

استريحت يا سيدى و خليتنى اتكلمت :)
اعتقد دلوقتى هتقول يا ريتك فضلت ساكت احسن :) و انا كمان رأيى كده :) الغريب انه رغم ده كله انا مازال عندى امل...... و رغم الاحباط اللى احيانا بيصيبنى..... الا انى لا افقد الامل فى انصلاح الاحوال..... لان هذا هو ما تستحقه هذه البلد..... و التاريخ لما تدرسه بيقوى جواك الشعور بالامل ده..... لان البلد دى يا ما شافت..... و تاخد كل هودر و هودر و تقف على حيلها تانى و اكتر من كده و ربنا بيزيح :)..... و ده مش لحاجة الا عشان تم ذكرها بالخير فى جميع الكتب السماوية..... دى فى حد ذاتها كفاية

نقطة اخيرة بس..... هى انى زى ما انا كتبت رؤيتى.... اللى يحب يعرض رؤيته المغايرة يتفضل..... بس انا و لا عايز اخش فى اقتباسات متبادلة و لا مبارزات فى الردود..... لان زى ما انا قلت قبل كده.... ناس كتير تعرف ارائى من قبل كده.... و انا كمان اعرف اراء و انتماءات ناس كتير برضه من قبل كده و مش هنجر لمعارك جانبية لا لزوم لها..... و احتفظ لنفسى بحق التعامل فقط مع الاراء التى ارى فيها نقاطا موضوعية للمناقشة ..... غير كده يبقى لكم دينكم و لى دين.... عفوا لكم رأيكم و لى رأى :)