ياريت يا جماعه حد يرد على استفساراتي
ياريت يا جماعه حد يرد على استفساراتي
استاذ ياسر احييك على الموضوع الجامد ده
بص هو موضوع الهجره دى مفيش قدامك غير انك تقدم فى اى جامعه لكذا دوله وده طبعا بفلوس مش ببلاش عن طريق النت وبيبقى فى ناس جايه هنا مصر يعملو انترفيوهات وبتبقى فى الغالب فى فنادق كبيره زى ماريوت وخلافه ويسألوك شويه اساله وتعمل انترفيو معاهم وبتخش على النت تكمل بقيه الاجراءت وبتدفع فلوس مصاريف الدراسه وهما بيوفرولك سكن هناك فى مقابل انك طالب بتدرس فى دوله غير دولتك
اما موضوع الجنسيه انا عايش فى الغردقه وصحابى كتير اوى متجوزين اجانب ومعظم الللى متجوزين اجانب بيبقو طامحين يااما فى فلوس الست الاجنبيه دى رغم كبر سنها وكرمشه جلدها لانه برضو مستحمل معرفش ازاى انا وغيرى منقبلش وضع زى ده بس فى ناس تقبل من اجل الفلوس وفى ناس تانيه بتتعرف على بنات 29 و30 سنه وبيتجوزو وطمعا فى الاقامه وليست الجنسيه انت عشان تاخد الجنسيه استاذى الفاضل على سيبل المثال دول اوروبا مش سهل خالص كمثال دوله زى المانيا عشان ليا صاحبى عايش هناك واتجنس من سنتين بس رغم انه هناك من التسعينيات بس طبعا مكنش دائم الاقامه فى المانيا استقر هناك لمده 6 سنين درس المانى قرايه وكتابه متجوز المانيه من اصل تركى امتحن اكتر من كزا امتحان وفى الاخر بعد رحله كفاح خد الجنسيه فى مقابل انه اتنازل عن المصريه وده شرط البلد كده لاتحمل جنسيتين بس عاوز اقولك شروط الحصول الجنسيه فى المانيا ومعظم دول اوروبه المتقدمه انك تكون متجوز واحد لمده 5 سنين من اهل البلد او معاها الجنسيه للبلد وانك تكون ادخل البلد شرعى طول الفتره اللى فاتت دى ان يكون سجلك او ملفك خالى من اى مشاكل يعنى مش وش اجرام يعنى بيمتحنوك فى تاريخ البلد وحضارتها وتكون بتتكلم اللغه قرايه وكتابه :) :) عشان كده سيبك من موضوع الجنسيه دى الموضوع صعب للغايه خاصه كدول اتحاد اوروبى
اما فى امريكا وكندا الموضوع مختلف شويه بالنسبه للمده اقل من 5 سنوات كم بالظبط معرفش لان مليش اختلاط بالجنسيات دى وبتاخد جرين كارد وكده انت بتبقى مواطن امريكى
ربنا يكرمك ويوفقك وان شاء الله تلاقى فرصه عمل هنا احسن من غربه بره وعيشه بره مش سهله والله صدقنى
كلهم بيكلمونى من هناك نفسهم فى اللمه والقاعده على القهوه وشويه الاكل اللى بناكلهم من الشارع سواء فى المطاعم ولا سواء الاكل المصرى بتاع اهالينا فى فعلا هنا حاجات مش حاسين بيها الا لو سافرنا بره او المتربين يقولوك عنها كفايه هناك التلج ودرجه الحراره اللى بتبقى تحت الصفر مش عاوز اقولك عشان واحده تروح شغلها واهى ست تصحى 6 الصبح تفضل تشيل فى التلج من قدام بيتها ساعتين عشان تعملها طريق تمشى فيه ودى كانت دوله التشيك ومن ناس اوروبين اعرفهم بيحكولى
ربنا معاك ويوفقك اولا واخيرا
ياباشا الف شكر بجد يا عمرو باشا على الاستفاضه في الحديث ربنا يكرمك يارب
اولا عمري ما هتجوز عشان الجنسية او الاقامة واحد مكرمشة وكبيرة في السن وكده وده مش عيب ليها بس من نحية الاستغلال يعني حتي لما فكرت بالموضوع ربطه بموضوع الزواج والاستقرار ومنها الجنسية او الاقامة . اللي انا لسه واخد بالي ان في فرق بينهم دلوقت لاني معنديش اي خبرة ف الموضوع ده عشان كده قلت اسال اهل الفضل بالمنتدي الكريم
انا هاخد كلامك كدة وامشي علية واحدة واحدة بس ياريت حضرتك توضحلي لو عايز اقامة مثلا هتبقي اسهل؟ واعملها ازاي؟ . واكيد مفيش احلي من اللمة والصحبة والناس اللي اتربينا معاهم بس ارجع واقول كل واحد له ظروفه .اللي بتجبرة على حاجات مكنش عايز يلجا ليها . والله المستعان اروجو الرد. وف الاخر يابشا احب اشكرك تاني على الحديث الطيب ده
شرفتني
بص يا باشا انا عايش فى مصر و الحمد لله حققت حاجات كتير كانت بالنسبة لى حلم بس مع الوقت و الإجتهاد و قبلهم توفيق ربنا وصلت لمستوى حياة كويس و ربنا أنعم على بنعم كتير. بس خلال العشر سنين اللى فاتوا أنا فكرت فى كل اللى أنت قولته مع انى أحسن حال من ناس كثير بس الإنسان عمره ما حيبطل يحلم و يتمنى ان يكون فى وضع أفضل ...
بالنسبة للهجرة أنا سألت عن كندا و المصدر ناس عايشين هناك و كلامهم ثقة و بيفكروا يسيبوا كندا اللى هى بلدهم لأسباب حقولها بعد كده ... و نظام الهجرة هناك قائم على تقييم بالنقاط و علشان تتقبل و تأخد هجرة لازم تعدى درجات معينة أعتقد فوق الـ 68%. طب على أى أساس بتأخد النقاط دى ؟ الخبرة عليها نقاط ، إجادة اللغة عليها نقاط (انجليزى أو فرنساوى لو هتهاجر لمقاطعة كيبيك) مستوى التعليم و المؤهل ليه نقاط و حتى درجة الإعالة عليها نقاط يعنى الأعزب غير المتزوج غير اللى متزوج و يعول (رايح معاه عائلة جاهزة).
النوع اللى بكلمك عليه ده النوع المناسب لشاب زى حضرتك فى مقتبل حياته لأن فى برامج تانية لرجال الأعمال و المستثمرين.
كندا دولة متقدمة و عندها مرافق كثير بس عندها مشكلة كبيرة .. هى بتأخد نسبة كبيرة من المرتب كضريبة و فى المقابل بتقدم لك علاج و تعليم و خدمات فوق الوصف يعنى ممكن يدوك مرتب لو حتدرس و يتكفلوا بمرتب الحامل أو السيدة المربية لأطفال صغيرين! النمو السكانى هناك منخفض جدا بالتالى مفيش ناس يدفعوا ضرائب و بالتالى مفيش إمكانية تنمية المرافق و تنمية البلد بالمعدل المطلوب علشان كده هما عايزين ناس مؤهلين علشان يشكلوا تعداد سكانى يعمر البلد.
العيوب و اللى الناس اللى أعرفهم عايزين يسيبوا البلد علشانها: البلد ساقعة أوى فى الشتاء ! النهاردة مثلا -15 !! الجو كئيب و الناس فى حالها و ممكن متسمعش من جارك طول عمرك .. الواعز الدينى و الإلتزام منعدم تقريباً.
مع ذلك فى مصريين كثير عايشين هناك و بيتقابلوا و يتفاعلوا بس على الضيق علشان هما كمان بقوا كنديين :)
بالنسبة لموضوع الجنسية حضرتك تنساه دلوقتى علشان فيه قبلية فيزا و بعدين إقامة و بعد 5-6 سنيين الجنسية و الكلام ده فى أغلب دول أوروبا.
الزواج من أجنبية ممكن ... ده موضوع معقد و ليه أبعاد كتير حتى مع وجود نقس الديانة فيه حاجات كتير و عادات مختلفة .. على الأقل دى مشكلة واجهتنى شخصياً و أجهضت الفكرة حتى مع المحاولات ..
أنا فاهم أنت بتعانى ازاى فى ظل الوسايط و الكوسة و عدم إتاحة الفرص للكفاءات و المجتهدين بس ده مش معناه إنك تيأس من رحمة ربنا .. دايما خللى عندك امل فى ربنا و أكيد لو لك نصيب فى حاجة يبقى حتلاقيها .. أنا أشتغلت فى وزارة الطيران و فى مصر للطيران و قى شركة بترول كبيرة و دلوقتى فى شركة غاز تابعة لهيئة البترول و والله العظيم كل ده من غير واسطة و بمجهودى فقط :) لو انا سمعت واحد بيقولى كده من 7-8 سنين مستحيل كنت أصدقه بس ده فعلا اللى حاصللى و كله من عند ربنا و يمكن تفتكر كلامى ده لما ربنا يرزقك بحاجة زى دى أو أحسن منها
انا مش بقوللك كده علشان تلغى الفكرة اللى فى دماغك بس علشان حاسس إنك محبط و عندك يأس
و على فكرة انا كمان كنت بفكر أسيب البلد من شهرين و كل ما أرجع من تركيا أفكر إنى أروح أعيش هناك :))) بس الموضوع مش سهل و البلد هنا مع إنعدام الأمن و الأمان و مع الإهمال و التسيب و الحقوق الأساسية المهدرة لسه برده بلد سهل تعيش فيها و تلاقى اللى يسندك لو وقعت أو احتجت مساعدة ...
آسف على الإطالة و أتمنى أن ربنا يكرمك و يوفقك للى فيه الخير ...
الله يكرمك يا باشا علي سعة صدرك والحديث الطيب ده
المعلومات عن كندا تقريباً نفس المعلومات اللي عندي الحمد لله كدة ابقي اتاكدت منها بس كندا اصلا بعيدة جدا عن احتملات السفر بالنسبة ليه مش عارف ليه بس زي ما حضرتك قلت او زدت عليهم فمش هفكر فيها اللي بفكر فيه استراليا اسبانيا تركيا بريطانيا فرنسا دي دول اعتقد فيها حياة واقدر اتعامل فيها بس ياريت تقلي هوا البرنامج ده لكندا بس ولا بيبقي موجود لدول تانية زي اللي زكرتها لحضرتك واسم البرنامج ده ايه
ما حملني على الموضوع هوا اني كنت اكتر شخص متفائل اصحابي يعرفوا ): بس ما باليد حيلة مفيش اسرة يعتبر عايش وحيد من غير عمل مفيش استقرار مع انعدام الامن زي ما حضرتك تفضلت وغيره وغيرة يعني اكيد عمري ما هقنط من رحمة ربي بس الحمد لله ع كل شيء
انا بشكر حضرتك جداً على المعلومات الطيبة دي جزاك الله كل خيييييير
البرنامج اللى أتكلمت عليه عن كندا بس و ده عن طريق الحكومة الكندية و ليه لينك فى الموقع بتاع السفارة الكندية (حبعتهولك على الخاص لو محتاجه) و بصراحة هى أنضف حاجة لو فكرت فى الهجرة. (خللى بالك فى مكاتب للهجرة ملهاش أى لزمة و كل اللى حيعملهولك أنه يرتب ورقك و يجمع نقاط لو ينفع و ده ممكن تعمله بنفسك)
على حد علمى مفيش هجرة للدول اللى انت كاتبها يإستثناء أستراليا طبعا !! يعنى اسبانيا و تركيا و بريطانيا و فرنسا حيطلبوا ناس للهجرة ليه ؟ دول عندهم بطالة و كمان عندهم الكفاءات اللى تشتغل بس أنا أعرف ناس فى أسبانيا للدراسة و جنبها بيشتغلوا و الموضوع ده مش سهل و محتاج تظبيط جامعات هناك و مصاريف دراسة علشان الـscholarships صعب تلاقيها ... فى واحد حبيبى قوى راح لندن من 4 سنين و معاه جنسية علشان أتولد فى أسكتلندا، الراجل طلع عينه هناك و أضطر يروح أيرلندا الشمالية علشان يلاقى شغل كويس و يعرف يعيش (خللى بالك ده مواطن بريطانى) الموضوع مش حينفع فى الدول دى إلا لو طالع تدرس بفلوسك أو جاللك منحة و دى مش مستحيلة بس محتاجة مجهود و بحث دقيق علشان تعرف الجامعات بره عايزة إيه.
اللى متأكد منه ان اللى يشترى بيت او شقة فى تركيا بيأخد اقامة بس ده برضه عايز فلوس مش قليلة علشان العقارات هناك مش رخيصة (على الأقل اللى أتفرجت عليه فى أسطنبول).
يا باشا أنت مش وحيد و كلنا أخواتك و معاك بقلبنا و إن شاء الله حتتعدل و الأمور حتبقى كويسة علشان مش معقول الدنيا تفضل بايظة على طول ... و انا تحت امرك فى أستفسار فى أى وقت
من خلال اطلاعي البسيط على بعض الأمور في أستراليا رأيت أنه من الممكن للعديد القدوم إلى أستراليا كمقيم دائم ولكن يجب عليه الحصول على درجة 5 في امتحان الأيلتس العام في جميع الفروع ( القراءة, الكتابة, المحادثة,الإستماع)
حد عنده معلومات كفاية بخصوص هذا الشان يا شباب
kingoffeeling.2012@yahoo.com
ولو ينفع حضرتك تبعته هنا عشان الكل يستفيد يبقي افضل
جزاك ربي كل خير