الموضوع: لمبة الأنجكشن نورت فى نيو صنى وألف شكر لأوتو إيجبت أبو رواش

يوم الجمعة بعد الصلاة رحت دورت العربية لقيت لمبة منورة فى التابلوة و مش عايز تطفى ومعرفتش ايه اللمبة دى لأنى كنت عند والدتى ف حلوان و الكاتلوج فى البيت عندى ف اكتوبر و حاولت اتصل بأتوا ايجبت علشان اعرف ايه المشكلة بس واضح ان يوم الجمعه اجازة هناك محدش كان بيرد
اتنكدت جدا و قللقت ليكون فى مشكلة فى العربية و يوم السبت الصبح كلمتهم كانت الساعة 10.30 و سألت عن اللمبة دى قالولى دي لمبة الانجكشن اللى بتبقى جنب اللمبة اللى بتنور لما يكون فى باب مفتوح وقالولى لازم تحجز صيانة و تجيب العربية لو مافيش صوت غريب ف الماتور قلتلهم وقالولى ممكن تيجي بكرة
طلبت من موظفة خدمة العملاء انى أروح انهارده السبت قالتلى انهم عندهم ضغط جامد انهارده و عادة بيبقوا السبت زحمه جدا عن تجربة
بصراحة كانت زوق و قالتلى طيب هسأل و أرد عليك و رجعت قالتلى طيب بس ضرورى أجى قبل الساعة 1 ظهرا و فعلا رحت نازل من حلوان ع هناك مسافة كبيره حوالى 65 كيلو و طول الطريق اللمبة منوره و انا قلقان لحسن الموتور يكون فى حاجه و انا ماشي عليه المسافة دى
المهم و صلت و أستقبلنى المهندس محمد رفاعى و هو راجل محترم جدا جدا و فاهم أوى و سألنى عن العربيه نزلت فى مياه او حاجه أو ركبت فرش قطع سلك ف العربية او اي حد لعب ف السلوك قلتله لأ قالى طيب احنا هنشيك و لو فى حاجه مقطوعة هتدفع 150 جنية تمن سلك الانجيكشن و لو مافيش مش هتدفع حاجة قلتله مش مهم المهم العربيه مايبقاش فيها مشكلة و فعلا أستلمها منى ع الساعة 1.30 و قالى هستلمها الساعة 4
و فضلت متابع ع البورد العربية لغاية ما ظهر انها خلصت الصيانة و فى مرحلة إنتظار الغسيل
رحت للمهندس محمد و سألته قالى نظفناها و شيكنا عليها تانى اكتر من مرة و ماديتش حاجه و غالبا جه ع السلك مياه و ده ممكن فى البنزينة و انا بغسالها او وانا بحط ميه ف العلبة بتاعت المساحات ربما
وفعلا استلمت العربية الساعة 4 بالظبط و كانت مغسولة و أخر تمام و شكرت المهندس جدا جدا ع أسئلتى الكتيرة و هو بصراحة كان فى منتهى الزوق و كل ده و انا ماكنتش حاجز صيانه ف نفس اليوم بس الناس قدروا انى ف مشكلة و حاولوا يساعدونى و فى نفس الوقت ده عملوا الكشف و غسلوا العربية و كمان خدنا واجب الضيافة و مادفعونيش حاجة
و من دردشتى مع المهندس محمد رفاعى قلتله بصراحه انا حاسس باختلاف كبير بين أتوا ايجيبت و مودرن قالى احنا اكبر مركز صيانه لنيسان و اتوايجيبت واخدين المركز الأول سنه 2011 ع مستوى العالم مش فى مصر كأحسن مركز خدمة لنيسان وعندهم أصول و أجهزة مش فاكر قالى بحوالى 255 مليون جنيه وفعلا بصراحه واضح حتى الكوادر اللى مختارينها من المهندسين و الفنيين مختارينهم بعنايه
حبيت أكتب الموضوع ده علشان لو حد حصل معاه الموضوع ده يستفيد و ياخد باله مايجيبش ميه ناحية الموتور و هو بيغسل العربية و فى نفس الوقت علشان اشكر أتوايجيبت و المهندس محمد رفاعى بصراحة الحمد لله ان فى مركز محترم كده فى مصر لملاك نيسان