الموضوع: رابطة مالكى استرا ( j )

المشاركة الأصلية كتبت بواسطة paradox

السلام عليكم جميعا
انضميت الأسبوع اللي فات لمالكي أسترا j سيدان
الحقيقة المتابعة للمواضيع هنا على المنتدى كانت مفيدة جدا جدا جدا في معرفة كل حاجه عن العربية من الـ الألف إلى الـياء

فيه نقطتين احب اقول عليهم أول حاجه لأني أنا شخصيا سألت هنا عليهم وكنت مقلق منهم:
1- الرجة (رعشة الموتور) : مش موجوده إطلاقا ولا حتى الهوا. انا جربت العربية على الـ d و على الـ r مع الفرامل زي ما الأعضاء هنا قالوا و بفضل الله مفيش اي رعشة. واضح ان الموضوع ده زي ما أعضاء قبلي قالوا مرتبط أكتر بتظبيطة معدل الـ rpm في الدفعات الأولى للعربية.

2- صوت الهوا: انا طلعت بالعربية على طريق مصر اسكندرية الصحراوي وجبت لغاية 160 (رغم سحب العربية مارضيتش ازود عن كده - العقل زينة برضه ) الملاحظة الأساسية ان صوت الموتور على السرعة هادي جدا جدا جدا. معرفش ليه الناس ما اتكلمتش عن الموضوع ده أو على الأقل ما ادتهوش حقه. الفتيس 6 نقلات (6 أمامي) وعلى الغيار الأخير بيبقا في نعومه رهيبة مع ثبات على الطريق ماتخيكش تحس انك على سرعة خااااالص. الفتيس ال 6 نقلات ده فعلا روووووووعة و في رأيي أهم ميزة في العربية. على سرعة 100 كم/ ساعة بيبقا الـ rpm تقريبا على 2300 -2400 لفة/الدقيقة (مع التكييف شغال كمان).... احساس رااااااائع بالسلاسة في القيادة وان العربية مستريحة وهدوء في المقصورة مايتوصفش. والهدوء ده بيخليك مش سامع اي صوت للموتور او الكاوتش وبالتالي ده غالبا سبب ان الناس بتتكلم عن صوت هواء .... ببساطة لأن مافيش باقي الأصوات اللي بتغطي على الصوت ده في العربيات التانية. انما مافيش اي تسريب (في عربيات تانية بتبقا تسرب هوا من منطقة زراير الازاز اللي في باب السواق مثلا) أو تخبيط هوا. فرق بين صوت انسياب الهوا حوالين العربية وبين تخبيط الهوا نتيجة عدم انسيابية أو تسريب نتيجة عيب تصميم أو تقفيل

الخلاصة....العربية راااائعة واللي بيفكر انصحه يتوكل على الله. خصوصا مع ميزة الفتيس الأوتو الـ 6 سرعات وبعيدا عن مشاكل الفتيس الـ dsg اللي نازل في كل عربيات الفولكس فاجن والأوكتافيا الجديدة. الموضوع ده مدي ميزة كبيره للأسترا في رأيي هاتنعكس أكتر على المبيعات الفترة اللي جاية.

تحياتي لكل الأعضاء وخالص شكري واعترافي بالجميل للأعضاء اللي نوروني بتجاربهم في العربية واللي كان ليها الدور الأهم في إني توكلت على الله و جبتها.

الف مبروك وربنا يعطيك خيرها ويكفيك شرها ... واهﻻ وسهﻻ بيك معانا وشكرا علي تقريرك وخليك علي تواصل دائم بالرابطة

المشاركة الأصلية كتبت بواسطة m.farouk

روحت التوكيل النهارده اعمل صيانة ال10000 الساعة 9.15 وخلصت 1.30 الحمد لله ظبطولى موضوع الرعشة فعلا نزلولى سوفت وير جديد وكان فى شكوه عندى انى فى رجة مع الفرامل وشفوها وقلولى انى التيل قرب يخلص ونزلت شوفتة لقيتة لسة فى حوالى 45 فى المية بس لقيت الطنابر الاربعة مريجة بسيط وقلتلوا السبب من الطنابير طالما مريجة وقلى احنا هنصنفرهاوهنصنفر التيل ونجرب قلتلوا دى لازم تتخرط قالى لا هتخد وش صنفره وهنجرب ولو عملت تانى هنغيرهم وهتجبلنا تيل جديد قلتلوا ماشى وخرجت اسئل على التيل علشان ابقى عارف الاسعار لقيت التيل الامامى ب742والتيل الخلفى 1070 وسئلت على صيانة ال20000 الف بيعملوا فيها اية قالى زيت وبوجيهات والبوجيهات ال gm ب200 او 250 وصيانة ال45000 بيتغير فيها سير كاتينة وشداد وبلية وسير دينموا وتغير زيت فتيس وتغير طرامبة مياه وبوجيهات وتكلفتها 5500 انا لقيت اسعرهم غالية جدا انا قولتلهم انا هجيب البوجيهات والتيل من بره وتركبوهم قالولى مفيش مشكلة وكنت عوزهم يظبطوا مياه المساحات علشان بحسها عالية شوية بتوصل للزجاج الخلفى فقلتلوا يوطيها شوية بس قلى هى كده مبيتلعبش فيها فقلتلوا خلاص سبها والمهندس ده اسموا مروان وهو انسان محترم جدا

طرومبة مية و سير كاتينة ودينامو على 45000 !!!!!!!!!

الحاجات دي المفروض في أي توكيل على 60000

المشاركة الأصلية كتبت بواسطة paradox

يا عزيزي كلهم لصوص.
فورد برضه بيغيرهم على 45 ألف كم. الموضوع بيزنس مش أكتر. زي بالظبط كده صيانات الـ 5000 كم
كلها بدع التوكيلات في مصر علشان يشغلوا نفسهم و يلموا شوية فلوس.

توكيلات بتستهبل فعلا

أنا أكيد عارف إن ده استهبال توكيل :)
بس مش كده , دي مهما كان الماني

اغير طرومبة على 45000 !!!!!!!!
ده أساسا ال 60 ده بدري

ربنا يرحمنا من جشع التوكيلات

المشاركة الأصلية كتبت بواسطة m.farouk

فى صيانة ال5000 اطلب ينزللولك السوفت وير الجديد هتتحسن شوية بس مش كتير

انا حاسه ان سحبها بدا يتحسن و بفكر احطلها مره بنزين ٩٥ عايزه اعرف حيبقه فيه فرق ولا لا
بالنسبه للسوفت وير الجديد انا حابه اسيبها زي ما هيه قدام كده كده مش حيبقه تغيير كبير

انا الحمدلله استلمت اوبل استرا هاتشباك 2013

العريية جميلة جدا الحمدلله بس مختلفة عن ال 2012 فى الحاجات ديه :

العربية نزل فيها usb

الفرش نصه قماش و نصه جلد زى الباقى ولكن نقشة القماش مجتلفة تماما و فى رائ الشخصى شكلها احلى.

هى دى الفروقات اللى موجودو من الداخل والخارج فى فرق فى الشبكة الامامية و فوانيس الضبابب + الكروم فى الابواب و الاكصدام الخلفى.

و ربنا يسهل واستلم الافراج الجمركى عشان ارخص لانهم من الواضح مواعيدهم بايظة تماما .