(๏̯͡๏) تجربتى المفصلة لنقل الملكية وتجديد رخصة تسيير السيارة وحدة مرور طنطا

**wesam_salom** · 11-03-2013 11:13 AM

المشاركة الأصلية كتبت بواسطة Elawany13

العربية معايا بقالها سنتين ونصف
طقت فى دماغى امبارح أتأكد من رقم الشاسية ورقم الماتور الموجود فى الرخصة
قولت علشان متفاجئش بأى حاجه اثناء الفحص ومتعطلش على الفاضى
اخدت الرخصة ونزلت على العربية وفتحت الكبوت
لاقيت رقم الشاسية على الركبة اللى متثبت فيها المساعد اليمين
ولاقيت نفس رقم الشاسية على قايم الباب الايسر
وهو نفس الرقم المثبت فى الرخصة
وقولت تمام
ناقص بقى الماتور اتأكد منه
ارقام كتيرة مكتوبه فى كل حته ومش لاقى اى رقم مطابق للرقم الموجود فى الرخصة
سألت جار ليا متعرفش رقم الماتور فين قعد يدعبس معايا مش لاقين اى رقم مطابق
دب القلق جوايا وقولت انا اتنصب عليا ولا ايه !!!
قولت اللى هيفيدنى فى الموضوع ده الكهربائى اللى بتعامل معاه
عمال يتاجر فى العربيات الشاهين
كل شوية ألاقيها شارى واحده وبايع التانية
روحتله قولتله تعرف رقم الماتور فين قالى بملئ فيه طبعا يابيه ديه حاجه معروفه وسهلة
وداخ السبع دوخات فى البحث وبعدين قالى الرقم اهو مطبوع على وش السلندر
وفعلاً رقم شكله محترم وقولت اكيد ده
جيت اقارنه بالرخصه بردوا مش مطابق !!!
الدنيا لفت بيا والشكوك اللى جوايا بقت كبيرة
قولت انا عايز أتأكد ... روحت للميكانيكى قولتله تعرف رقم الماتور فين
رد عليا بنفس ثقة الكهربائى ان ديه حاجه معروفه
قعد يلف يمين وشمال ويطلع فوق الماتور
وينزل تحت الماتور ومعرفش يوصل لحاجه !!!!
فتحت كاتلوج العربية
لاقيته كاتب مكان رقم الماتور وحاطط صورة مش واضحه ومش محدده هيه فين
حاولت اشوف المكان بناء على الكتالوج معرفتش اوصل للرقم
روحت البيت مش شايف قدامى
وعمال اقول هعمل ايه لو لاقيت الماتور متغير بدون ورق
ولما هروح اللى بعهالى هيقولى ايه وهعمل معاه ايه
وطول الليل عمال افكر والقلق مبهدلنى

يتبع ........

مبروك الترخيص يا استاذنا
اول مره اشوف الموضوع ده
لو كنت اعرف كنت هقولك على واسطه كبيره تخلص لك الفحص فى دقايق وتقولك على مكان البصمه
لان صاحب البيت اللى فيه الميكانيكى بتاعك هو نفسه عامل البصمه

والصراحه عمره ما اتاخر مع حد انت بس تروح له تسلم عليه قولك هات العربيه هنا و5 دقايق وتكون كل حاجه خالصه ومبيرضاش ياخد فلوس

**mohamedq** · 11-03-2013 11:50 AM

عندى سؤال مهم جدا , هو انا لما انقل ملكية العربية و انقل المرور للمرور الى انا تابع ليه و اغير النمر , فيه ناس قالتلى انى كل ما اجى ارخص و افحص كل 3 سنين لازم اجيب شهادة مخالفات من المرور القديم الى كانت تابعة ليه ومن المرور الجديد , يعنى انا كل مرة حفحص حجيب 2 شهادة مخالفة , يا ترى الكلام ده صح ولا ايه ؟ طمنونى ارجوكم

**Elawany13** · 11-03-2013 12:35 PM

المشاركة الأصلية كتبت بواسطة wesam_salom

مبروك الترخيص يا استاذنا
اول مره اشوف الموضوع ده
لو كنت اعرف كنت هقولك على واسطه كبيره تخلص لك الفحص فى دقايق وتقولك على مكان البصمه
لان صاحب البيت اللى فيه الميكانيكى بتاعك هو نفسه عامل البصمه

والصراحه عمره ما اتاخر مع حد انت بس تروح له تسلم عليه قولك هات العربيه هنا و5 دقايق وتكون كل حاجه خالصه ومبيرضاش ياخد فلوس

الله يبارك فيك ياوسام باشا
طيب ما هو الميكانيكى اللى بحكى عليه هو الاسطى على ... معرفش يوصل لمكان البصمة
ومجبش سيرة خالص عن الموضوع ده

الحمد لله الفحص متعبنيش بدون واسطة ولا حاجه
والجو كان جميل والطابور كان ماشى

بين وبينك ياوسام باشا ... الإيجابيات الوحيده لطوابير البنزين انها علمتنى الصبر وطولة البال ههههههههههههههه

**Elawany13** · 11-03-2013 12:40 PM

المشاركة الأصلية كتبت بواسطة mohamedq

عندى سؤال مهم جدا , هو انا لما انقل ملكية العربية و انقل المرور للمرور الى انا تابع ليه و اغير النمر , فيه ناس قالتلى انى كل ما اجى ارخص و افحص كل 3 سنين لازم اجيب شهادة مخالفات من المرور القديم الى كانت تابعة ليه ومن المرور الجديد , يعنى انا كل مرة حفحص حجيب 2 شهادة مخالفة , يا ترى الكلام ده صح ولا ايه ؟ طمنونى ارجوكم

معتقدتش ان الكلام ده صحيح
بمجرد نقل ملفك الى المرور بتاعك خلاص ملكش دعوه بالمرور القديم
انا لم امر بهذه التجربة
بس المنطق بيقول كده
وان شاء الله حد هيفيك

**Elawany13** · 14-10-2014 07:51 AM

المشاركة الأصلية كتبت بواسطة anasfox84

موضوع ممتاذ جدا
وكان عندي سؤالين
الاول بخصوص رقم الشاسيه الي موجود علي القايم الشمال انا لسا مشتري شاهين ٢٠٠٨ وعندي علي القايم
هل هذا الرقم يعني شئ لان الناس كاتبين علي المواقع ان دا معناه ان كان في حادث للسيارة
ولا الموضوع دا طبيعي
وثانيا السؤال بخصوص تحويل الرخصة باسمي لماذا ثلاث سنوات وكم السعر لو سنة واحدة فقط

بالنسبة لرقم الشاسيه متهيألى ده الطبيعى
الرخصة عملتها 3 سنوات علشان مش عاوز اروح مشوار النكد بتاع المرور ده قبل 3 سنين لو ينفع يعملوها كل 20 سنة يبقى احسن