لازم آخد قرار قبل الساعة ١٢ الضهر - ساعدوني

**Haitham Yehia** · 28-02-2013 01:58 AM

حبايبي الصقور،

انا كنت صدعتكم بمقارنات بين سيارات مختلفة بس آخر ماوصلتله هو نيسان صني الشكل الجديد عشان كنت محتاج عربية ضروري وماكنتش لاقي تيدا. انا كنت حاجز تيدا عند اوتو ايجيبت وهو كان قاللي انها حاتوصل على شهر ٥ فقررت اسيب المبلغ اللي حجزت بيه لحد ما اقرر حاجيب ايه وبصراحة كنت عامل حسابي اجيب العربية الأسبوع الجاي وكانت نيسان صني الشكل الجديد الهاي لاين.

المهم النهاردة كلموني أوتو ايجيبت المحتزمين جدا وقالولي ان العربية التيدا موجودة وجت باسمي واللون اللي كنت عايزه.. قلتله اني الحقيقة محتار بينها وبين الصني فقاللي ان كنصيحة خليك في التيدا لأنها أفضل واداني مهلة لحد بكره الساعة ١٢ الضهر عشان ارد عليه.

انا محتار جدا التيدا سعرها بقى ١٣٣ ونص. الصني الجديدة ١٢٠.

انا ساكن جديد في شارع مكسر جدا. وخايف من التيدا عشان قريبت ان عفشتها ناعمة ومش بتاعت بهدلة.

الصني أقل طبعا بس بتاعت بهدلة وأرخص طبعا
التيدا ناعمة وأحلى بس مش بتاعت بهدلة قوي

ايه رأيكم؟ صني الجديدة ولا تيدا؟

شكرا مقدما

**miceg** · 28-02-2013 02:15 AM

بص ياباشااااااا
الاثنين ممتازين
لكن التيدا أفضل
بص الفيصل فالكلام ده
الفلوس
متنساش انك هتدفع في معدل 3000 جنيه مصاريف التسجيل والاكسسوارات وغيره
لو اشتريت التيدا وحسيت انك مش هتتعسر فالفلوس إتكل على الله
غير كده يبقا الصني
وبرضه بيرجع لزوقك لو محتاج هاتشباك فالتيدا ولا محتاج السيدان فالصني

**alaamousa** · 28-02-2013 03:36 AM

التيدا وتوكل على الله عربية شكلها محترم

**Nashaat Rady** · 28-02-2013 04:31 AM

انا كنت في نفس الحيرة و جبت التيدا الحمد لله، نفس الفئة بتاعتك،

عربية ممتازة، عيوبها تكاد لا تذكر،

مصاريف الترخيص ٣ سنوات حوالي ١٦٠٠ جنيه بالاكراميات.

و الأهم من ده كله، استخير الله سبحانه و تعالي.