و الله انتوا جيتوا على الجرح ، انا بقالى بتاع شهر عمال ادرس فى البدايل المتاحة للموضوع ده ، و بينى و بينكم انا موش متحمس لموضوع المولد قوى لتلات اسباب ، الاول ، انو عاوز بنزين و ده بقى موال دلوقت ، تانى حاجة انه بيعمل دخنة لا يستهان بها ، فلو ما فيش مكان تهويتة كويسة يبقى انتا فى ورطة ، تالت حاجة ان اسعارهم بجد ضربت بسبب تكرار انقطاع الكهرباء - ربنا يباركلهم -
فالحل البديل اللى كنت بفكر فيه هوه تونجر + بطارية عربية + انفرتر
فيه واحدة من المشاركات هنا اتكلمت عن الموضوع و انه موش عملى
بس الكلام ده موش صح
انا عندى فى العربية انفتر 200 وات بقدر اشغله طول الوقت لو مسافر مشوار طوالى و كل الناس اللى معايا فى العربية يشحنوا موبايلاتهم و لاباتهم عادى من فيشته ال 220 اكنهم فى البيت
و قبل كده كان عندى عربية لادا كنت مركب فيها واحد و موصل عليه باور سبلاى بتاع كمبيوتر و سيدى روم (ايام الكحرتة - كنت عاوز صوت سيدى بس موش معايا فلوس اجيب كاسيت عربية بيشغل سيدى - و كان شغال زى الحمار
و فيه حل تانى اسهل بس برده غالى اللى هوا اليو بي اس ، بس ده اخر جهاز واحد (اليو بي اس ده اللى بيخلى الكمبيوتر شغال حتى لو الكهربا راحت ، و جواه بطاريات زى الكشاف الشحن)
و سمعت عن بطاريات مراكب اللى هيا ال
marine deep cycle battery
و ان دى فى الموال ده احسن من بطاريات العربيات
فخلاصة رايي ان تونجر ب 500 جنيه
بطارية عربية ب 250 جنيه
و انفرتر ب 500-600 جنيه
هيدونى سيستم يشغللى بتاع 800 وات كده مع بعض
فموش عارف رايكم ايه
و اهم ميزة فى السيستم ده انه موش عاوز بنزين
هوه بس هيحوش شوية كهربا لما النور يبقى موجود
انا برده شفت فيديو عن واحد من قطاع غزة بس ده بقى عامل شغل جميل خالص
جايب الواح طاقة شمسية و عاملهم مع بعض دايرة عشان يبقوا تونجر شحن
و بالتالى بيشحن بطارياته بالنهار
و شفت واحد خواجة برده عامل نفس الموضوع لتخييم ، و لما ما بيكونش متواجد بره البيت بيستخدمه لتلبية احتياجات غرفة عنده
بيشحنله التليفون و اللاب و بيشغله راديو او تليفزيون ال سي دي و رسيفر
و المهم انه كل ده ببلاش
عموما احب اسمع ارائكم
تقبلوا تحياتى
سلام