المشاركة الأصلية كتبت بواسطة hh
طيب يعني صوته حيبقى زي الهوندا اللي بكاتم صوت؟؟
بالنسبة لموضوع العادم ده فعلا ممكن يكون سبب اني اصرف نظر عن الفكرة. زي ما قولت لحضرتك أنا المفروض ححطه في بلكونة, يعني العادم حيبقى طالع دايركت عالجيران اللي فوقي. مش معقولة يعني النور يبقى مقطوع و الناس قاعدة في الضلمة و الحر و أنا أقرفهم زيادة بريحة العادم عشان أنا يبقى عندي كهربا!!!!!!! أنا ممكن أقفل باب البلكونة و ده حيقلل الصوت و العادم و مش حيكون عندي مشكلة, بس برضه حرام أجي عالناس بالشكل ده, عشان كدة مش عايزة أخد الخطوة دي غير لو فيه حلول تقلل من ازعاجي ليهم بقدر الامكان.
بالنسبة لموضوع قدرة الهوندا اللي ثابتة طبعا حضرتك عندك حق, بس تمن الهوندا ال5 كيلو 12 ألف جنيه يعني أجيب بأقل من نصهم حاجة صيني ضعف القدرة دي عالأقل و بالتالي أضمن أخد القدرة اللي أنا عايزاها, مش كدة برضه؟؟ و في الحالة دي غالبا حاجيب مثبت تيار بألف و نص كمان عشان احمي الأجهزة عندي في البيت.
الحل الوسط اني أجيب البرافيا اللي موتوره هوندا و هو تصنيع مصري, بس هو برضه تمنه غالي يعني ال5 كيلو ب7 ألاف جنيه و من غير كاتم صوت و لا مثبت تيار. فمش عارفة يستاهل و لا الواحد لو جابه و حطله مثبت و كاتم صوت التكلفة في الأخر حتقرب من تمن الهوندا و يبقى معملناش حاجة.
يا ريت حضرتك تقول لي نصيحتك ايه بخصوص البدائل و كمان تفهمني أقدر أعرف قدرة الخرج الحقيقية للمولد ازاي لو قررت أجيب الصيني.