الموضوع: كيفية تحديد ثبات العربية

اكيد مش بالسرعه يعني في خط مستقيم
اكيد بتتحدد عن طريق الغرز والمناورة وماتحسش انها عومت منك كدا ولا كدا
ونستني بردو رأي الباقي وانا عارف هتلاقي ناس دخلت وجابت سيرة ماركات وهاتبقا مطحنه

هى فى الغالب هتبقى بالسرعه وفى خط مستقيم لان لو العربيه من اول 100 وهى بتطلع وتنزل مع مطبات الهواء والدركسيون يدردر منك وكانك مش مع الناس على الارض
وكمان بتكون مع الغرز فى السرعات العاليه بتفرق

فى رأيى الثبات دة امر نسبى
يعنى ما اقدرش اقول ان العربية دى ثابتة
لكن ممكن اجيب عربيتين و اقارنهم ببعض و اقول دى افضل فى الثبات من دى,
انا فى مرة جربت لانسر بومة 1600 و جريت بيها و عجبنى جداً ثباتها (مع العلم انا راكب لانوس و فيات قديم), لكنى لقيت ناس هنا فى المنتدى بتعيب فى ثباتها !! عشان كدة الموضوع نسبى

بالنسبة لتحديد ثبات العربية بالتجربة اعتقد موضوع معقد شوية,
يعنى ما تجريش بعربية اول مرة تركبها ع الصحراوى و شوية غرز و حركات و تحكم عليها
لأن ممكن عربية تتظلم فى تقييمك لثباتها بسبب حاجات انت مش واخد بالك منها :
حالة الكاوتش و نقشته و ضغط الهوا بيفرقوا جدا فى الثبات.
الحالة الفنية للعفشة و الفرامل ممكن يكون فيه مشاكل فى العربية و انت مش واخد بالك و يتهيألك ان ثباتها ضايع.

انا بحس بثبات العربية من الحاجات دى:
- بتميل قد ايه فى المناورات و الغرز على سرعات معينة body roll
- الدريكسيون تقيل ولا خفيف على سرعات اعلى من 120 كم/س
- تاثير الهوا على العربية فى السرعات العالية aerodynamics
- استجابة العربية لحركة الدريكسيون العنيفة ( غرز - تفادى بلاعة او حفرة) خصوصاً فى السرعات العالية

الثبات بيبقى احساس بالعربية يعنى مثلا الجرى فى خط مستقيم بعد ال150 هبقى قادر اسيطر على العربية ولا حاسس انى طاير

مطبات الهوا لو اخدتها و انا بجرى العربية بعد المطب بتنزل فى خط مستقيم و تكمل زى ما هى ولا بتلعب يمين و شمال ولو بدرجة بسيطة

الملفات لو اخدتها بسرعة بتبقى حاسس ان العربية هتتزحلق منك بجنبها ولا هتروح معاك عادى

وفى الاخر كل واحد بيحس بالثبات بطريقة مختلفة عن التانى

انا طبعا زي الرجالة ماقالت بالظبط

بس احب اضيف حاجة

احساسي بالعربية هو اللي يخليني احدد ان كانت ثابتة ولا عادية .. بمعنى اني بعتمد على عفشتها في الاحساس ده .. هل هحس بكل حاجة في الطريق اللي ماشي عليه ولا محسش بحاجة لو خدت نقرة مثلا ( طبعا بتكلم عن العربية الرخيصة مش المرسيدس)

يعني كل حاجة وكل تعريجة في الطريق وكل نقرة وكل كل حاجة في الطريق لازم احس بيها عشان اتطمن ان العربية دي ثابتة .. وفي الاخر بردو مش عايزين ننخدع بالعربية وخلينا ماشيين على مهلنا احسن :)

الثبات بيبان في المواقف المفاجاه لكن الغرز انت بتبقي عارف هاتاخد الغرزه امتي وازاي دا مش مقاس الموقف المفاجا بس اللي بيحدد