استفسار : عن سعر ومكان بيع ومكان تركيب فتيس بومة 2007/1600ccاوتوماتيك

**alkawther60** · 07-03-2013 07:08 AM

المشاركة الأصلية كتبت بواسطة د.أبونضال

في حاجة في الفتيس الأوتوماتيك اسمها "القربة" وساعات بيسموها "الصفيحة" وهي الجزء المقابل للديسك والاسطوانة في المانيوال، وهو ده الجزء المســتهلك اللي بيبوظ الفتيس، لأنه عبارة عن قلب مشرشر بيدخل فيه ذراع قادم من الموتور وهو ده روح العربية، لما المشرشر بينعم بيفوت وبتبقى العربية عامله زي ماتكون على الـ n على طول رغم إنك بتديها غيار. بتوع الاستيراد عارفين كده علشان كده ما بيرضوش يبيعوه لوحده ولازم يبيعوا الفتيس كله على بعضه، لكن مش معنى كده إن مش ممكن تلاقيه، دور على واحد يكون عنده القربة دي مفكوكة وموجوده لأنها لو في الفتيس هيغالي جدا في ثمنها وهيبيعها لك بنص ثمن الفتيس.. لو كانت موجودة عند حد لوحدها فثمنها هيكون حوالي ثلث أو ربع ثمن الفتيس الكامل.. طبعا الجزء ده بيبوظ لو العربية عدت 200 ألف كم وده ممكن بالنسبة لموديل عربيتك حتى لو العداد بيقول غير كده.

يارب يكون كده فعلا حكم اربع الاف ونص دي تقيلة عليا اوي في الوقت الحالي
بس سؤالي هل الميكانيكي ممكن يعرفها بسهولة هل هيا القربة او الصفيحة دي ولا حاجة تانية

لان لما روحت له قال لي الفتيس جاب كتينة وقعد يفهمني ان الكتينة دي شبه الجنزير شوية بس مش جنزير وانها كلها شرايح حديد كتييير اوي والمشكلة انها لما بتتاكل بتعمل برادة حديد بتبوظ الفتيس كله عشان كده تغيره كله افضل ده تقريبا اللي قاله واللي انا فهمته انا طبعا ماليش اي خبرة بالميكانيكا ولا اعطال العربيات قلت له خلاص متعملش حاجة وهاخدها اوديها مصر عند ميكانيكي تاني اما اسمع منه هيقول ايه هو كمان

**MITSUKERO** · 07-03-2013 09:19 AM

المشاركة الأصلية كتبت بواسطة alkawther60

يارب يكون كده فعلا حكم اربع الاف ونص دي تقيلة عليا اوي في الوقت الحالي
بس سؤالي هل الميكانيكي ممكن يعرفها بسهولة هل هيا القربة او الصفيحة دي ولا حاجة تانية

لان لما روحت له قال لي الفتيس جاب كتينة وقعد يفهمني ان الكتينة دي شبه الجنزير شوية بس مش جنزير وانها كلها شرايح حديد كتييير اوي والمشكلة انها لما بتتاكل بتعمل برادة حديد بتبوظ الفتيس كله عشان كده تغيره كله افضل ده تقريبا اللي قاله واللي انا فهمته انا طبعا ماليش اي خبرة بالميكانيكا ولا اعطال العربيات قلت له خلاص متعملش حاجة وهاخدها اوديها مصر عند ميكانيكي تاني اما اسمع منه هيقول ايه هو كمان

انا شوفت الكاتينة بعيني في فتيس مفكوك عند المتخصصون و الفتيس كان بيغير بلية

و فعلا هي لما بتتقطع يبقي عوضك علي الله في الفتيس و ياريت بس تعمل الشغل عندهم حفاظا علي عربيتك

ممكن الصنايعي اللي انت شغال معاه يكون كويس و مفيهوش مشاكل بس الميزة عندهم انهم ميكانيكية و كهربائية و كل حاجة في نفس الورشة و كلهم واخدين كورسات علي ايد اليابانيين فبيشتغلوا و هم فاهمين

ربنا معاك انا حاسس بيك جدا والله بس ثق تماما ان ربنا هيرزقك رزق مخصوص اكتر مما تتخيل و هتصلح العربية و تبقي تمام كمان

**أبو إياد** · 07-03-2013 09:21 AM

المشاركة الأصلية كتبت بواسطة alkawther60

الاسعار دي فين يا باشا ردك ده ريحني شوية الناس بتقولي انه باربعة ونص

واكيد يعني مش معقولة كله باظ مرة واحدة هو وحساساته على العموم انا هوديها لميكانيكي تاني لحد مايجمعوا على العطل بالضبط تغيير كامل ولا تصليح وساعتها هقرر

من سنتين بالظبط انا اشتريته كامل بكل حاجه 2500ج فك وركب وكان فى حساس بايظ رجعتله واخدته منه ( ده كان سوسو فى المريوطيه )

وطبعا اكيد كنت بجايب اسعار فى وقتها الحرفيين كان عامل 3000ج وبور سعيد من 2500 الى 3000ج

لكن السنه اللى فاتت سالت عند سوسو قالى 32500 وده اخر سعر ليه

* ممكن تشرح المشكله اللى عندك بالتفصيل ؟

**alkawther60** · 07-03-2013 09:38 PM

المشاركة الأصلية كتبت بواسطة أبو إياد

من سنتين بالظبط انا اشتريته كامل بكل حاجه 2500ج فك وركب وكان فى حساس بايظ رجعتله واخدته منه ( ده كان سوسو فى المريوطيه )

وطبعا اكيد كنت بجايب اسعار فى وقتها الحرفيين كان عامل 3000ج وبور سعيد من 2500 الى 3000ج

لكن السنه اللى فاتت سالت عند سوسو قالى 32500 وده اخر سعر ليه

* ممكن تشرح المشكله اللى عندك بالتفصيل ؟

ادي القصة ومافيها http://www.nilemotors.net/Nile/33964...post3874848572

ان شاء الله على السبت هاخد لفة في الحرفين اسال ياريت المحلات او الورش اللي اسال فيها في الحرفين اسمها ايه ومكانها فين بالضبط

**Eng.Peter** · 09-03-2013 02:44 AM

ربنا يعوض عليك
بص على زيت الفتيس يمكن يكون ناقص
بس العربية عاملة 197 كيلو و ده كثير قوى قوى
بجد شكلها مطحونه وانت غلطان انك اشتريت عربية عاملة الرقم ده
عموما ربنا يعوضك و شوف جديد فى التوكيل بكام لان الاستيراد مش مضمون

**alkawther60** · 12-03-2013 05:14 AM

محتاج رايكم ضروري يا شباب وشورو عليا اعمل ايه محتااااااااااااااااار

دلوقتي بعد اسبوعين من وقفة العربية وبعد اللف والسؤال

نزلت الحرفيين سألت عن فتيس البومة 2007 1600
تقريبا معظم محلات اللانسر ومنهم محل ملك اللانسر واللي ناس هنا في المنتدى شكرت فيه
تقريبا معظمهم بالاجماع سعر الفتيس 3500 وضمان اسبوع بس انت تجيب الميكانيكي بتاعك وتشيل الفتيس اللي يعجبك هما بس بائعين مش ميكانيكية ده كلامهم

المهم اثناء لفي تكونت الاراء الجديدة التالية
حد قالي خد الفتيس من غير الحساسات ومش عارف ايه كده جزء كمان كده ب 2750
حد تاني قال هات القديم وخد الاستراد الجديد ب 2750
حد تالت قال انا عندي الفتيس كامل بس الحلة اللي بره دي مكسورة يعني هتغيره بحلة فتيسك القديم بس يعني انت كده بتاخد قلب الفتيس ب 2750
حد شار عليا قالي طيب مادام الكاتينة بس اللي مقطوعة خد الكاتينة لوحدها بالف جنيه ( ولاقيت كذا محل فعلا بيبيع الكاتينة لوحدها وبرضه متفقين على الالف جنيه ) وطبعا سالت في ورشة صغيرة هناك كده بيصلح فتيس ياباني وقال لي يا باشا لازم يتفك الفتيس ويتشاف من جوه لان ممكن مش عارف البتاعة اللي بيلف عليها الكتينة دي هيا كمان تكون متاكلة وفعلا ده اللي اكتشفته بعد كده لما فكيت الفتيس في ورشة حد من قرايبي قعد يمدح لي فيها كتير في بلد اسمها كمبرة جنب اوسيم كده (اما اشوف اخر البهدلة دي )
المهم دلوقتي خلاصة الكلام الميكانيكي اللي فك الفتيس دلوقتي بيقول الموضوع هيكلف 2500 لانه هيشتري الكاتينة والترس ده تقريبا وحاجة كمان جوه الفتيس وده طبعا لسة غير المصنعية والزيت بتاع الفتيس
قلت له طب مادام قربنا قوي كده من تكلفته كامل مانجيب واحد كامل استيراد ونشتري دماغنا بقى قالي فتيسك كويس وادينا عرفنا اللي فيه الجديد الله اعلم بيه لسة انت وبختك فخوفني ؟؟؟؟؟؟؟؟؟؟؟؟؟؟؟

انااااااااااااااااااااااا اااا متبهدل على الاخر حد فااااااااااهم بجد يقولي اعمل ايه ؟؟؟؟؟؟؟

**أبو إياد** · 12-03-2013 08:31 AM

ماتعملش اصلاح للى معاك اشترى واحد من غير الحساسات شرط انك تكون متاكد ان الحساسات بتاعتك سليمه

**walidadel81** · 12-03-2013 11:03 PM

بلاااااااااااااااااش تفكر تصلح الفتيس الاتوماتيك لان بتصرف فلوسك عالارض وكمان متسوبيش بتنصح بتغير الفتيس لوفيه مشكله مابالك بالمصري لما يفكر يصلحه بلاش انا صرفت علي فتيس بيجو 2000 تصليح وبعد شهرين جبت واحد استراد 2500 لانه للاسف باظ