الموضوع: مكالمة مع تاجر

موضوع شراء عربية مستعملة ده موضوع في قمة الملل

اليكم الحوار التالى



الوو السلام عليكم
وعليكم السلام ورحمة الله

حضرتك كنت عامل اعلان عن عربية اوكتافيا 2001
اه انت متصل عشان العربية الاوكتافيا اه تمام حضرتك

ايوة تمام ، حضرتك العربية زي ما في الاعلان موديل 2001 فبريكا ماعدا رفرفين قدام
اه بالظبط هى راشة الرفرفين ومغيرة كبوت وغير كدة فبريكة

مغيرة كبوت ؟
اه اصل كان السور بتاع الجراج كان وقع عليها فغيرنا الكبوت ورشينا الرفرفين


اه تمام ، طيب ما حصلش اي تأثير على الحوض او حاجة في الدواخل زي الشنب مثلا وكدة
لا لا خاااالص ، خبطة بسيطة جدا واتغير الكبوت وبس

طيب حضرتك العربية مانيوال ماشية 120 الف كيلو
اه تمام العربية دى احنا شاريينها وهى عاملة 86 الف كيلو والعربية بتاعت واحد شغال في شركة بترول وربنا كرمه وجتله سفرية فهو عمللى توكيل ببيع العربية وانا صديقه وببيعهاله والعربية نضيفة جدا وما لحقش يمشى بيها 40 الف كيلو

تمام ، طيب ايه اخبار الميكانيكا الموتور والفتيس وكدة
يا باشا انا طبعا لو اتكلمت هبقى بشكر في الحاجة بتاعتى

لا حضرتك مفيش مشاكل انا بسأل حضرتك عن حالة العربية وطبعا انا في حاجات معينة بدور عليها في العربية اللى هجيبها فعشان ما اضيعش وقتى ووقت حضرتك محتاج اعرف منك حالة العربية بالظبط وان شاء الله لو في نصيب كدة كدة هكشف على العربية في التوكيل او مكان محترم ، والحاجات دى كدة كدة مش بتستخبى بس اناا بحب اسأل في الاول حفاظا على وقتى ووقت حضرتك
اه بص هو انت لو ركيب اوكتافيا يعنى، والالمانى عموما فاانت اكيد عارف ان العربيات دى بتحب "يتمول لها" 95 فالـ 92 بتاعتنا بيتعب حساس الشكمان ولو رحت دفعت الـ 200 جنيه في الكشف وبتاع، كدة كدة هيقولك عايزة حساس شكمان وحتى لو غيرته هيبوظ تانى وهتفضل لمبة الاتشك منورة والكلام ده ...

مممم طيب حضرتك التكييف شغال ولا لا
--- عمل نفسه مش سامع السؤال وتوه في الاجابة
سألته تانى

، قاللى ااه اه عادى ، شغال ، عادى


طيب حضرتك العفشة اخبارها ايه
تمام زي الفل

طيب حضرتك السعر في تفاوض ولا نهائى
بص انت تيجى وتشوف الاول ويبقى في كلام وتقوللى انت قدرتها بكام ، انا عن نفسى قدرتها بـ 72
اه تمام انا بسال حضرتك عشان في ناس بتتفاوض في السعر حسب الحالة وحسب المصاريف اللى محتاجاها العربية وفي ناس بتبقى عايزة مبلغ معين والموضوع منتهى بالنسبة لها ايا كان

لا حضرتك تيجى تشوف وان شاء الله لو في نصيب العربية تعجبك ، هى الف فوق الف تحت ومش هنختلف ، وبعدين انت ممكن تفاصل معايا في السعر وابيعلك وانا مبسوط وممكن واحد ياخدها بالـ 72 وابقى مضايق وانا ببيعله ، فالموضوع بين البايع والشاري اتفاق و ارتياح و كدة ..

طيب حضرتك المعاينة فين ..
كذا كذا وممكن تيجى براحتك وتشوفها في الصبح في النور وكدة

تمام انا ممكن مثلا اكلم حضرتك بكرة اشوفها قبل المغرب بحاجة بسيطة عشان ظروف شغلى
لا، هو انت لو هتشوفها الصبح يبقى يا الخميس يا الجمعة

تمام
تمام

شكرا ياباشا وان شاء الله لو في نصيب اكلمك بكرة ان شاء الله
العفو ياباشا

شكر لردودكم جميعا

انا فعلا ما استريحتش للموضوع وعرفت من طريقته في الكلام انه تاجر وطبعا حلو اوى الحوار بتاع انها بتاعت واحد صاحبه عاملله توكيل والفيلم ده :d

وعشان كدة عملت الموضوع اوري الناس الموضوع بيحصل ازاى وازاى الزبون بيلبس العربية

انا اتخنقت الصراحة والواحد حاسس انه داخل حرب مش بيشتري عربية

هو ليه كل حاجة في البلد دى مقرفة كدة ..

يعنى اغلب الشعب مش لاقى ياكل ولما يبقى معاه فلوس برضه ما يعرفش يشتري ولا يعيش

كل حاجة ماشية بالعافية تعليم ثانوية عامة شغل جواز عربيات بيع شرا ، حتى مجرد نزولك مشوار قريب بتشيل هم كل حاجة ...

.. ده حاجة تزهق والله

ماحنا شفنا البلاد اللى برة عايشة ازاى ، ليه احنا معقدين كل حاجة كدة

الرحمة من عندك يارب