الموضوع: كيفية عمل reset للتيدا 2006

بص يا سيدس.... كلامك صحيح الي حد كبير، ممكن فعلا تحس بتحسن، لان من خلال طريقة سواقتك و نوع البنزين اللي بتحطه، ال ecu بيخزن معدلات الحرق و كمية الهواء و بشتغل بيها بعد كده، لكن مش للابد.

لو غيرت نوع البنزين و اسلوب سواقتك، يعني كبس وجري و غباوة، الecu، بعد فترة معينة بيعيد برمجة نفسه في خلال فترة تقدر بيومين او تلاتة.

عشان كده، بعض الفهلوية يقولولك سيبلي العربية يومين و انا افوقلك العربية و واحد تاني يقولك دي عربية مخنوقة عشان صاحبها كان بيسوق علي قشر بيض.

و الآن اليك الطريقة علي ضمانتك الشخصية (ما جربتهاش قبل كده).

التوقيتات مهمة جدا..... استخدم ستوب ووتش...

1- ادخل المفتاخ و خليه علي وضع "ON" تاني تكه يعني
2- انتظر ثلاث ثوانى
3- اضغط علي دواسة البنزين جامد للآخر.
4- شيل رجلك للآخر تماماً.

كرر 3 و 4 خمس مرات في خلال خمس ثواني

5- انتظر 7 ثواني.
6- اضغط علي دواسة البنزين جامد للآخر لمدة 10 ثواني تقريباً لغاية ما لمبة "check engine" تبدأ تنور و تطفي مع نفسها.
7- شيل رجلك للآخر تماماً في خلال ما اللمبة بتنور و تطفي.
8- انتظر 10 ثواني.
9- اضغط علي دواسة البنزين جامد للآخر لمدة اكثر من 10 ثواني.
10- شيل رجلك للآخر تماماً (اللمبة برده لسه بتنور و تطفي).
11- رجع المفتاح علي وضع "OFF" و دور العربيه، المفروض تكون اللمبة طفت دلوقتي.


بالتوفيق ان شاء الله