الموضوع: تقرير صيانة 40000 كم لسيفيك الجيل التامن

صباح الخير

امبارح كنت حاجز صيانة الاربعين الف و بعد ما موظف الاستقبال فتح امر الشغل الواحد اتعود انه يهول في كل ملاحظه وده طبعا عشان يركزوا كويس جدا في العربيه يمكن يلاحظوا حاجه الواحد مش حاسسها و يعملوها (وقد كان) و طلبت تشيك كامل على الطنابير و العفشه عشان انا مش مبسوط (كده و كده)

المهم العربيه كانت جوه الصيانه في حدود الساعه 8:40 مفيش ساعه لقيت اتصال على الموبيل حد عايزني في الاستقبال قلت خير اللهم اجعله خير لقيت الموظف بيقول لي انهم لقيوا التيل الخلفي خلصان على الاخر قلت و ماله ما انا مغيرتوش قبل كده من ساعة ما جبت العربيه زيرو
و التيل الامامي ( اللي مشي 40 الف برضه) يمشي 3000 كم تحب تيجي بعد ما تعمل 3000 كم تغير و لا نغيره بالمره؟

هنا بقى الموضوع محتاج تفكير و لاول وهله (حلوه وهله دي) قلت ابقى اروح تاني بعد شهرين اغير و خصوصا ان مصنعية التيل منفصله عن الصيانه بس لتاني وهله قلت ياواد يا هاني بيه لسه هتخبط مشوار و تضيع يوم كامل و الخصم بتاع قطع الغيار هيكون خلص و اكيد الدولارهيغلى تاني بعد شهرين ده لو التيل هيبقى موجود اصلا يعني ممكن تلقى زياده عن دلوقت 200 جنيه وبعدين اكيد الفرامل هتبقى احلى لو تيل قدام و ورا جديد

قمت واخد القرار المصيري و قلتله غير قدام و ورا ياباشا و انا قلبي بيتعصر على الفلوس

المهم رحت قسم الاكسسوار و اشتريت طقم دواسات اصلي اسود ب 480 جنيه بعد الخصم كان نفسي فيه الصراحه بدل الدواسات التانيه اللي بتتزحلق و مخليه شكل الصالون very عره
على الساعه 11 كانت خلصت و جينا للحساب طلع 1600 جنيه بعد خصم حوالي 300 جنيه (معقول برضه) وده عشان الفلتر ببلاش و خصم 15 في الميه على المصنعيات و 12 في الميه على قطع الغيار

لأ و خد الكبيره لقيوا قاعدة الموتور اياها مش سليمه راحوا غيروها في الضمان يعني هقعد لحد 80 الف ما غيرهاش على حسابي و ادي كمان 1200 جنيه اتوفروا عشان العربيه قربت تطلع من الضمان

المهم استلمت العربيه بعد ما غسلوها من بره و من جوه زي الفل و فرشت الدواسات اخر فخامه و شياكه بصراحه و ليها كلبسات بتشبك فيها الدواسه عشان ما تجريش و ماليه المكان و مفرغينها بالمللي حوالين الدواسه و مفاتيح التنك و الشنطه و بالنسبه للدواسات الخلفيه عاملينها حته واحده واخده من الباب للباب عشان ما تجريش و توسخ موكيت الفابريقه فعلا الغالي تمنه فيه

المهم اول ما طلعت لسه بلمس الفرامل عشان اهدي لقيت العربيه كلبشت في الارض و ده عشان مش واخد عليها و بقيت ماشي براحه عموما لحد ما التيل يطبع ونبقى نرجع نشد تاني بعد ما نمشي 300 كم ولا حاجه

وعلى فكره انا متهيألي بكده ان السيفيك ارخص صيانه في مصر انك تقعد خلال 80 الف كيلو يادوب 1100 جنيه تمن تيل امامي و خلفي بخلاف زيت الموتور و شكرا على كده
يعني تقعد تفحت في العربيه 80 الف كم و تصرف عليها 4500 جنيه قطع غيار و زيت و فلتر و مصنعيات و كيل يا بلاش

المشاركة الأصلية كتبت بواسطة amgomaa

الف مبروك

الله يبارك فيك

المشاركة الأصلية كتبت بواسطة hisham80

الف مبروك والسيفيك من اعلي العربيات اعتماديه الصراحه الوحيده الي بتملي عيني بعد الالماني

الله يبارك فيك و حتة الاعتماديه دي بالذات السيفيك اعلى من الالماني و عن تجربه مريره

المشاركة الأصلية كتبت بواسطة blazer

لو ممكن اعرف سعر السيفيك ال vti موديل 2011 عامله اقل من 60 الف كم تبقى فى رينج كام

الشكل القديم اخره ٢٠١٠ و فيه واحده بحالة الزيرو عامله ٤٠ الف كم صاحبها بيتكلم في ١٥٥ الف