الموضوع: حكايتى مع الميكانيكى/ محمد عبدة

المشاركة الأصلية كتبت بواسطة msobhy

طيب أنا هاحكى السبب الرئيسى اللى خلانى ابيع عربيتى
اول لما جبت العربيه فعليا مكنش عندى ميكانيكى وكنت كل شويه اروح من واحد للتانى
المهم عرفت محمد عبده عن طريق المنتدى
من اول مره روحت له وفعلا اتصدمت من المصنعيات - وفعلا كنت محرج انى اتكلم هنا عليها - لأنى لاقين ان مفيش حد بيشتكى - لغاية لما سألت فى مره على استحياء على أسعار مصناعيته هل هيه عاليه ولا عاديه ولاقيت الناس كلها بتشتكى ساعتها
أحب أقول لحضرتك ملخص المصايب اللى عبده عملها معايا
الاول تغيير فلاتر وسيور وبوجيهات 250 جنيه
بعد كده تغيير مساعدين وطنابير امامى وتيل فرامل امامى ومش عارف ايه تانى فى دورة المياه - تقريبا كانت 300 جنيه
ومن ده كتييييييييييييييييييير لكن خد التقيله
لاقيت العربيه سحبها زى الزفت و بتاكل ميه كتييييير - قال لى ده جوان وش السلندر - وتكلفته 300 جنيه - بعد ما فك قال لى وش السلندر لازم يتغير - قلت ماشى - أشتريت واحد مش فاكر بكام وطبعا عن طريقه - وركبنا جت احاسب لاقيته بيقول لى ان حسابه 500 جنيه - ليه يا عم اصل كان فيه شغل مخرطه وافشخنات ومش عارف ايه - المهم دفعت 400 جنيه زى الحمار
أجرب العربيه أكتشفت انى ماشى بعربية نموس - كمية دخان رهيبه طلعه من الشكمان
قالى ديه هاتخف كمان يومين - طبعا كدب السنين وسحب العربيه بقى فى الضياع رجعت له - قال لى ان الموتور كده عايز عمره - طبعا انا اتجننت - فجأه كده بقى عايز عمره - اه طيب والتكلفه - قال لى تقريبا من 3000 الى 3500 - طبعا انا رفضت وقلت نشترى موتور - حاول يقنعنى ان العمره هاتكون احسن - وفى النهايه اشتريت شورت بلوك ب 1000 - والباشا اخد مصنعيه تاااااااااااااااااااااااا اااااانى 500 جنيه على ايه معرفش - كل ده علشان طلبت منه تغيير كل الجوانات بتاعت الموتور ----- يعنى لسع منى 900 جنيه فى تغيير موتور
الجميل ان الموتور كان بيسيل زيت من عند وش السلندر - رجعت له قال لى انه عايز يتقرط عليه بس - وطبعا كلام كدب
بعدها ب 3 شهور وانا عنده قال لى ان جوان وش السلندر لازم يتغير علشان نوعه وحش (ده اسلام اللى عنده) وأول لما فك قال لى باللفظ ان اللى ركب محطش سليكون قبل ما يقفل - بجد انا مش عارف ساعتها انا كان هايحصل لى ايه
المهم زى الباشا دفعت 250 جنيه بالعافيه فى الجوان على اساس انه تكملة شغله
بعدها لاقيت العربيه بتسخن بغباء - روحت له وقلت له بوضوح ان المشكله ديه مشكلة ترموستات الكوعه
عمل كالتالى
الاول غير ترموستات الحراره وعمل شوية هبل وقال لى كده خلاص اتظبطت - وطبعا انا كنت هاتجنن - ترموستات حراره ايه اللى تسخن العربيه ودفعت 50 جنيه
طبعا العربيه تانى يوم كانت مولعه روحت له قال لى ديه الطرمبه - يا عم يهديك يرضيك - قال لأ ديه الطرمبه روحنا مغيرين الطرمبه وساعتها العربيه بقت بسقف جامد جدااااااااااااااا - المهم لأول مره روحت سايبه وماشى من غير ما حاسبه بيقول لى هو مفيش فلوس - قلت له لما تخلص شغلك
تانى يوم والله العظيم انا روحت له من نفق الجيزه لغاية عنده فى 4 أو 5 ساعات - العربيه بمجرد انها تشتغل بتولع
اتكرم عليه ساعتها وغير الترموستات وكان عايز 300 جنيه اديته 150 وقلت له انه المفروض هو اللى يحاسب على قطع الغيار اللى ركبت غلط ديه - راح قايل لى كلمته المعتاده - هو انا مغسل وضامن جنه
المهم سيبته والعربيه بتكركر وتسقف جااااااااااااامد جدا
يا عم انت مش بتقول ان التسقيف بسبب الحراره والعربيه اتظبطت - قال لى طيب انا هاعمل لك تعديل هايزود سحب العربيه جدااااااااااااااااااااااا ا وهايشيل التسقيف - وقام مغير لى طمبورة الكرنك من عنده بواحده خفيفه - ولا السحب زاد ولا التسقيف قل - وفى الاخر كان عايز يحاسبنا على ثمن الطمبوره 200 جنيه بالتركيب وهو ياخد القديمه
رجعتهاله وجبت سنسور كرنك وجربناه وطلع هو سبب التسقيف والصنايعى اللى عنده كان راسه والف جزمه انى اخد واحد مستعمل من عنده وأرجع الجديد
بالمناسبه كان عايز يدينى المستعمل ب 250 جنيه وانا كنت جايب ال gm تقريبا ب 100 - لما عرف تمنه قال لى خلاص - رجع الجديد وهاديلك الاصلى ده ب 100 بس - طبعا انا رفضت
المهم بعدها فعلا سيبت العربيه لغاية لما اتعرفت على ميكانيكى تانى فى شارع البحر الاعظم - مقارنه ب محمد عبده هو أحسن وارحم بكتيييييييييييييييييير - لكن حسبتها ان محمد عبده (مش العربيه) بيكلفنى فى حدود 3 جنيه سنويا على الاقل - روحت بعت اللى ورايا واللى قدامى واستلفت من طوب الارض واخدت عربية واحد قريبى
والله العظيم احد الاسباب الرئيسيه اللى خلتنى ابيع اللانوس هو محمد عبده
وانا عن نفس مش مسامحه على اى حاجه هو اخدها منى بدون وجه حق

يالهوي !!!
يعني ده شفط منك فلوس قد كده و كمان بوظ لك العربية !!!!!!!!!!!!!!!!!!!!!!!!
حسبي الله و نعم الوكيل