تغيير كاوتش النيو صني وضمان العفشة

**د.محمدعبدالعال** · 10-03-2013 03:46 PM

يا جماعة أنا محتار اغير الكاوتش الماكسيس ولا اسيبه راكب في العربية .. بتاع الكاوتش قاللي مش لازم تغيره ده شغال كويس في السوق ومفيهوش مشكلة وده راجل أنا بثق في كلامه لأنه أصلا مهندس بس بيشتغل بإيده في المحل بتاعه .. ثانيا : أنا عندي 4 فرد بس 195 / 60 /15 .. كانوا بتوع عربية اخويا وهو شالهم عشان ركب جنوط أكبر .. تقريبا الكاوتش ممشيش نوعه كومو .. كان راكب في النترا 2012 .. بفكر أركبهم بدل الماكسيس بس خايف يطلعوا العفشة من الضمان .. لو حد يعرف معلومة أكيدة في الموضوع ده يا ريت يفيدني

**miceg** · 10-03-2013 03:57 PM

بص يادكتور
موضوع انه يخرج العفشه
كانت لعبه بيلعب بيها الضمان زمان
لكن كتير من الاعضاء غيرو الكاوتش والعفشه مازالت داخله جوه الضمان
هو المقاس ده بيزيد الموضوع ثبات لكن مش للدرجة مش هيخليها بي ام يعني :d
حكايه ان الماكسس ممتاز والكلام ده
والله جرب بنفسك وشوف حتى لو على سبيل التجربة
الماكسس ناشف ومش مريح وبيلم زلط لو هتقارنه بفئة عالية مثل الكونتنتال والميشلان والبريدجيستون
لكن لو هتقارنو بالكومهو يبقا الفرق مش هتحس بيه اووووي

**Sehsss** · 10-03-2013 04:00 PM

لا ما تقلقش مش هايطلعوا العفشة من الضمان ولا حاجة

**Land_Cruiser** · 10-03-2013 05:15 PM

يا فندم ما تقلقش من الضمان حتى لو ركبت فرد خشب مكان الماكسيس مش هتطلع العفشه من الضمان لان مش هتبقى فارقه كتير عن الماكسيس ده
معلش سامحنى انا متحيز حبتين ضد الماكسيس ده من ساعه ما نزلوه فى الشكل الجديد بدون مناسبه بعد البريدجستون اليابانى فى الشكل القديم . المشكله فى المقاس اللى حضرتك كاتبه انه هيوطى العربيه و علشان كده طالما الفرد الكومهو دول موجودين عندك يبقى جرب تركبهم و حمّل العربيه و شوف هتحك و لا لأ و بناء على النتيجه تقرر فالموضوع ده محتاج تجربه عمليه و فى نقطه تانيه ان عداد السرعه هيبقى مفارق شويه عن القياس الحقيقى . لو عاوز نصيحتى قدامك حل من اتنين :
١- تكمل بالماكسيس ده و تغيره على ٢٠-٣٠ الف كم بالكتير قوى
٢- تبيعه فى اسرع فرصه و تجيب مكانه بريدجستون او ميشلان نفس المقاس الاصلى و تخلص الموضوع

**د.محمدعبدالعال** · 10-03-2013 05:29 PM

ألف شكر على اهتمامكم يا شباب

**abdulmoniem** · 10-03-2013 05:38 PM

المشاركة الأصلية كتبت بواسطة land_cruiser

يا فندم ما تقلقش من الضمان حتى لو ركبت فرد خشب مكان الماكسيس مش هتطلع العفشه من الضمان لان مش هتبقى فارقه كتير عن الماكسيس ده

معلش سامحنى انا متحيز حبتين ضد الماكسيس ده من ساعه ما نزلوه فى الشكل الجديد بدون مناسبه بعد البريدجستون اليابانى فى الشكل القديم . المشكله فى المقاس اللى حضرتك كاتبه انه هيوطى العربيه و علشان كده طالما الفرد الكومهو دول موجودين عندك يبقى جرب تركبهم و حمّل العربيه و شوف هتحك و لا لأ و بناء على النتيجه تقرر فالموضوع ده محتاج تجربه عمليه و فى نقطه تانيه ان عداد السرعه هيبقى مفارق شويه عن القياس الحقيقى . لو عاوز نصيحتى قدامك حل من اتنين :
١- تكمل بالماكسيس ده و تغيره على ٢٠-٣٠ الف كم بالكتير قوى
٢- تبيعه فى اسرع فرصه و تجيب مكانه بريدجستون او ميشلان نفس المقاس الاصلى و تخلص الموضوع

بس المقاس ده .. إللي هو

195/60/15

معظم إللي بيغير بيغير ليه .. معنى كدة إنه مش صح أغير ليه؟

**Land_Cruiser** · 11-03-2013 12:52 AM

المشاركة الأصلية كتبت بواسطة abdulmoniem

بس المقاس ده .. إللي هو

195/60/15

معظم إللي بيغير بيغير ليه .. معنى كدة إنه مش صح أغير ليه؟

هاقول لحضرتك .. انا شخصيا اعتراضى مش على مقاس الكاوتش على قد ما هو اعتراض على خامته التعبانه و القلق منها و لذلك لو هاغير الاطار هجيب نفس المقاس بتاع الاصلى اللى هو 185-65-15 لكن خامات افضل و بكده الحسابات تبقى كلها مضبوطه و ارتفاع العربيه زى ما هو و ابقى مطمن ان مفيش اى آثار جانبيه للتغيير زى ان العربيه توطى مثلا بينما هاستفيد من جوده الاطار و هيطرى العفشه و يقلل الضوضاء اللى ناتجه عن الاحتكاك و هيحافظ على أداء الفرامل خاصه بعد الاستخدام كام الف كيلو لان اى كاوتش جديد بيبقى كويس فى الاول لكن بعد فتره الموضوع بيفرق و كمان موضوع لم الزلط ده هيختفى بالازعاج اللى بيعمله و الواحد يبقى مطمن و هو بيجرى باذن الله طبعا. اللى بيغير ل 15/60/195 احتمال يكون مركز اكتر على الشكل الخارجى على اساس ان العجل شكله رفيع و يجوز يكون بيدور على ثبات على حساب ارتفاع السياره عن الارض مثلا فالموضوع بيبقى فى الاخر اولويات على حسب الاستخدام و طريقه القياده يعنى لو حضرتك سواقتك عاديه و بيركب معاك ناس كتير باستمرار هتلاقى نفسك موضوع الارتفاع عن الارض ده مهم لانك مش هتعوز ان العربيه تحك فى المطبات العاليه بينما لو بتركب العربيه لوحدك و سواقتك عنيفه شويه هتلاقى اولوياتك زياده الثبات لما العربيه توطى و مش هيفرق معاك الموضوع لان العربيه بتبقى مش محمله فمش هتحك و هكذا يعنى