الموضوع: عايزين إجماع عام على سبب واحد

السلام عليكم

يا جماعه , موضوع صوت الونه ده اتقال فيه أكتر من رأى و أكتر من إحتمال , و لكن لحد دلوقتى مفيش إجماع عام لملاك البى واى دى على سبب واحد لهذا الصوت !

فيه ناس قالت ده الدبرياج , هو الدبرياج ابن ال .... , و لما تغيره بواحد ميتسوبيشى , حيروح الصوت.

و فيه ناس قالت ده الفتيس , ايوه الفتيس هو فيه غيره , و تحديدا ( بلى كرونة الفتيس ) , فيه ناس بتقول أصل البلى ده كبير حجما عن المعتاد و طبيعى يعمل صوت , و ده مش مؤشر انه عايز يتغير و لا حاجه , و عشان تحل الموضوع ده , حط زيت شمبر على زيت الفتيس بنسبه معينه أو أحد منتجات شركة " أبرو " الامريكيه إسمه مانع الونه و ده برضه بيتحط بنسبه معينه و حيروح الصوت.

و فيه ناس بتقول ده الشكمان ,,, الشكماااااااااااااااااااا اااااااااان , و بالتحديد العلبه الوسطى , و لو اتغير لواحد ميتسوبيشى إستيراد , حيروح الصوت.

و فيه ناس بتقول ده الموتور اللى هو ال Engine, هو صوته كده , و مفيش عزل صوت , بس انا مش مع الإحتمال ده , مش مقتنع انه الموتور صوته فيه ونه ,, و أى حد حيقولى الموتور أنا حبلغ عنه الصراحه , كله إلا الموتور.

و فيه ناس بتقول السبب , ده محمد مرسى.

كده بقه عندنا الإحتمالات : الدبرياج , الفتيس , الشكمان , الموتور , محمد مرسى ,, هاه مين يزود ..........

و فيه ناس بقه مكبره دماغها و مش عايزه هرشة نفووووووخ و تقولك يا عم متركزش , عيش الحياه , ولع فل راديو , إسمع جورج وسوف "نارى و لهفة قلبى" , ونة ايــــــــه اللى انت جى تقول عليه ,,, انت عارف قبله معنى الونه ايه و ايييييييييييييه ,, بس إوعى تتقفش فى كمين.

و الهدف من هذه المشاركه هو القول الفصل ,, هداية الحيارى ,, إغاثة اللهفان ,, الجواب الكافى لمن سأل عن الدواء الشافى ,, الوابل الصيّب من الكلم الطيّب ,, عدة الصابرين وذخيرة الشاكرين.

عايزين إجماع عام على سبب واحد.