هي الشتايم القذرة بأت حاجة عادية خلاص؟

انا عارفة ان كلامي ده مش هايعجب ناس كتير هنا.. بس فعلا الموضوع ملفت جدا للنظر.. هي الشتايم القذرة بأت حاجة عادية كده ممكن الواحد يدخل موضوع و يقول انه شتم معرفش مين اللي نرفزه شتيمة قذرة؟ :pinch:

هو مش برضه رسول الله صلى الله عليه و سلم قال" ليس المؤمن بطعان و لا لعان و لا فاحش و لا بذئ"؟.. دي أخدناها في ابتدائي.. يعني ألف باء دين.. و الحديث برضه المعروف جدا عن عبد الله بن عمرو ، عن النبي صلى الله عليه وسلم ، قال : " إن من أكبر الكبائر أن يسب الرجل والديه " ، قال : وكيف يسب الرجل والديه ؟ ، قال : " يسب أبا الرجل فيسب أباه ، ويسب أمه فيسب أمه ".

المنتدى ما شاء الله مليان ناس محترمة و منهم ناس انا شخصيا باكن لهم كل احترام و تقدير.. انما ممكن ألاقيهم بيحكوا عن مواقف شتموا شتايم قذرة عادي خالص.. و حد برضه حكى انه كان عايز يشتم سواق كسر عليه و عشان مش هايسمعه قام عامل له حركة بإيده :sweatdrop:

طبعا حاجات زي دي كنت باسمعها او اشوفها من الناس اللي ساكنين في المناطق الشعبية اوي و من الناس ال low class اوي.. انما كونها تطلع من ناس في مستوى احترام الأعضاء في نايل موتورز.. مش قادرة أبلعها بصراحة :pinch:

هل معنى كده ان خلاص؟ مافيش حد مش بيشتم في البلد دي؟ مش قادرة أصدق الصراحة.. و لو الحاجات دي بتطلع من ناس محترمة زي اللي هنا.. امال فين الناس اللي بتمسك لسانها عن الشتائم النابية؟ فين اللي بيكظموا غيظهم لوجه الله؟ فين المؤمن الحليم عف اللسان؟ فين الحلم اللي أوصانا به رسول الله صلى الله عليه و سلم و قال لنا انما الحلم بالتحلم و إنما الصبر بالتصبر؟

معلش انا عارفة اني تقلت عليكوا في الكلام و ان فيه ناس كتيرة هاتبقى شايفة اني مكبرة الموضوع حبتين.. انما عايزة بس أسأل الناس اللي لسانها اتعود على الشتايم حاجة: بتعمل ايه في نهار رمضان؟ هل برضه بتشتم الشتايم دي؟ ما أظنش خالص و احسبكوا جميعا على خير.. بس ما دمت بتمسك لسانك في رمضان و بتقول إني صائم كما أوصانا رسول الله صلى الله عليه و سلم، طيب ما تمسك لسانك طول السنة.. كن ربانيا و لا تكن رمضانيا.

باعتذر تاني عن فتح موضوع زي ده لأي حد ضايقه كلامي، انما فعلا لو كان الموضوع حالة فردية كنت بعت للي لفت نظري ده في مشاركاته رسالة خاصة و نصحته على الخاص.. انما للأسف الحالة مستفحلة و الكلام ده بيصدر من ناس - في نظري - في غاية الاحترام هنا في المنتدى و فعلا مش متخيلة اني أبقى ماشية مرة في الشارع و ألاقي فلان اللي باكن له كل احترام واقف بالعربية و خارج من فمه سيل من الشتائم القذرة :no4:

يا ريت يا جماعة فعلا كلنا نراجع نفسنا في موضوع الشتائم ده، لو مش عشان السب و البذاءة نهى عنهم رسول الله صلى الله عليه و سلم، يبقى عشان ما نأذيش آذان الناس اللي مش بتشتم و سمعوا الشتايم دي عرضا.. مالهمش ذنب الصراحة :dfgf:

انا من راى ان دى حسب اخلاق وتربية الانسان

فى ناس بتعرف تمسك نفسها وامتة تشتم وامتة ما تشتمش

بس مش معنى كلامى ان المفروض انهم يشتموا علشان ما حدش يقول انى برر الشتيمة

مثال وانا فى اعدادى كنت فى مدرسة خاصة اسمها هابى هوم فى بنى سيويف

المدير بتاعها بجد ربنا هيورينا فية يوم فى عز رمضان يقف فى وسط المدرسة واحلى الشتايم بتتقال من سب الدين وحاجات تانية كتير

فمن راى ان دا هيكون حسب التربية واخلاق الانسان

بشتم 24/7 بعقلى.....بحاول مشتمش خالص ابتديت بالسواقة و الحمد الله مبقيتش اشتم. عقبال الباقى.

بصي يا أنسة علا

تدني الاخلاق بقى سمة

تعرفي, اول امبارح كنت رايح النادي مع الاولاد, و قبل النادي بشوية واحد رخم بنيسان صني بيزنق عليا من الشمال علشان يلف قبل مني, غتاتة يعني, مع ان الطريق مش زحمه و انا مش ماشي ببطء, المهم انا رحت كابس بنزين و مديلة كلاكس وما رضيتش أعدية
علشان طبعا هوة بيغتت مش بيتصرف بذوق و يحترم اولويلتي في دخول الملف
لقيتة راح شاتم, رحت كابس فرامل و جايبة جنبي
ووضحتلة انها مش غتاتة ان يجيء من ورايا و يزنق علشان يلف قبل مني
و رحت مزعق فية و قلتلة وماتشتمش علشان انا كمان ممكن اشتمك
وممكن كمان اخبطلك عربيتك (حيث يعني ان عربيتي 4*4 عالية و بدفندر)
وممكن ابهدلك
راح حاطط دماغه في الارض و أنا أسف جدا و ابتدأ يعتذر
بصراحه احنا شعب مابيجيش غير بقلة الادب و بالكرباج

بصراحة الموضوع ده فعلا بيضايق جدا . بس المشكلة ان في مواقف فعلا الواحد مش بيعرف يمسك نفسه فيها فبيلاقي نفسه غصب عنه بيشتم او بيعمل حاجات مش مقبولة بس في فعلا ناس مستفذة جدا بتخرج الواحد عن شعوره . انا عن نفسي مابخرجش عن شعوري غير وانا سايق بس الحمد لله في اخر فترة بدات اقفل عليا الازاز واشغل قران واحاول احط اعصابي في تلاجة وماليش دعوة بحد وبحاول اطول بالي شوية حتي لو حد رمي عليا ولا حاجة بسيبه عادي بس مش دايما الموضوع ده ساعات مابقدرش امسك نفسي خصوصا مع سواقين التاكسي والميكروباص وبصراحة دلوقتي بحاول علي قد ما اقدر ماسوقش عربيات اصلا حتي لو ركبت اي موصلة مابقتش قعد جمب السواق او اللي سايق . بس دايما بحاول افتكر حديث عن الرسول صلي الله عليه وسلم ان (المسلم من سلم المسلمون من لسانه ويده )

ليس القوي بالصرعة لكن القوي من يملك نفسه عند الغضب
............
الفرصة قدامنا ... رمضان اقترب .... مش معقول حد يضيح صيامه بسبب شتيمة مقدرش يمنعها ....... ولو نجحنا في السيطرة علي انفعلاتنا في رمضان ... ممكن تبقى عادة حميدة في باقي الشهور

أولا:
التنابذ بالألقاب ومعناه الشتم
وهو محرم وفاعله فاسق
يقول الله تعالى:
( يَا أَيُّهَا الَّذِينَ آمَنُوا لاَ يَسْخَرْ قَوْمٌ مِّن قَوْمٍ عَسَى أَن يَكُونُوا خَيْراً مِّنْهُمْ وَلاَ نِسَاءٌ مِّن نِّسَاءٍ عَسَى أَن يَكُنَّ خَيْراً مِّنْهُنَّ وَلاَ تَلْمِزُوا أَنْفُسَكُمْ وَلاَ تَنَابَزُوا بِالأَلْقَابِ بِئْسَ الاسْمُ الفُسُوقُ بَعْدَ الإِيمَانِ وَمَن لَّمْ يَتُبْ فَأُوْلَئِكَ هُمُ الظَّالِمُونَ http://www.al-eman.com/Quran/ayas/11.gif ) سورة الحجرات

ثانياً:
السب بشتم الآباء والأمهات
وهو من أكبر الكبائر
عَنْ عَبْدِ اللَّهِ بْنِ عَمْرٍو، قَالَ قَالَ رَسُولُ اللَّهِ صلى الله عليه وسلم ‏"‏ مِنَ الْكَبَائِرِ أَنْ يَشْتُمَ الرَّجُلُ وَالِدَيْهِ ‏"‏ ‏.‏ قَالُوا يَا رَسُولَ اللَّهِ وَهَلْ يَشْتُمُ الرَّجُلُ وَالِدَيْهِ قَالَ ‏"‏ نَعَمْ يَسُبُّ أَبَا الرَّجُلِ فَيَشْتُمُ أَبَاهُ وَيَشْتُمُ أُمَّهُ فَيَسُبُّ أُمَّهُ ‏"‏ ‏.‏ قَالَ أَبُو عِيسَى هَذَا حَدِيثٌ حَسَنٌ صَحِيحٌ رواه الترمذي‏.

ثالثا:
السب عن طريق قذف الناس بالفواحش سواء الآباء والأمهات أو أي شخص آخر
وهو من الكبائر وفاعله ملعون
يقول الله تعالى:
( إِنَّ الَّذِينَ يَرْمُونَ المُحْصَنَاتِ الغَافِلاتِ المُؤْمِنَاتِ لُعِنُوا فِي الدُّنْيَا وَالآخِرَةِ وَلَهُمْ عَذَابٌ عَظِيمٌ http://www.al-eman.com/Quran/ayas/23.gif ) سورة النور

رابعاً:
السب عن طريق شتم أو لعن الدين
وهو حرام وفاعله كافر وملعون لإستهزائه بدين الله وهو إستهزاء بالله
يقول الله تعالى:
(وَقَالَتِ اليَهُودُ يَدُ اللَّهِ مَغْلُولَةٌ غُلَّتْ أَيْدِيهِمْ وَلُعِنُوا بِمَا قَالُوا بَلْ يَدَاهُ مَبْسُوطَتَانِ يُنفِقُ كَيْفَ يَشَاءُ وَلَيَزِيدَنَّ كَثِيراً مِّنْهُم مَّا أُنزِلَ إِلَيْكَ مِن رَّبِّكَ طُغْيَاناً وَكُفْراً وَأَلْقَيْنَا بَيْنَهُمُ العَدَاوَةَ وَالْبَغْضَاءَ إِلَى يَوْمِ القِيَامَةِ كُلَّمَا أَوْقَدُوا نَاراً لِّلْحَرْبِ أَطْفَأَهَا اللَّهُ وَيَسْعَوْنَ فِي الأَرْضِ فَسَاداً وَاللَّهُ لاَ يُحِبُّ المُفْسِدِينَ http://www.al-eman.com/Quran/ayas/64.gif ) سورة المائدة

اللهم تب علينا وتجاوز عنا
والله يقبل التوبة من كل تائب
يقول الله تعالى:
(إِلاَّ مَن تَابَ وَآمَنَ وَعَمِلَ صَالِحاً فَأُوْلَئِكَ يَدْخُلُونَ الجَنَّةَ وَلاَ يُظْلَمُونَ شَيْئاً http://www.al-eman.com/Quran/ayas/60.gif ) سورة مريم

غفر الله لنا ولكم

كنت عملت قبل كدة استطلاع من أكتر من سنة عن الموضوع ده ..
http://www.nilemotors.net/Nile/showt...A+%D3%C7%ED%DE
ممكن تراجعوا الموضوع عسى أن تكون في إجابات الناس ما يجيب عن أسئلتكم
تقبلوا خالص مودتي

اقتباس:

---

المشاركة الأصلية كتبت بواسطة OlaOsman

طبعا حاجات زي دي كنت باسمعها او اشوفها من الناس اللي ساكنين في المناطق الشعبية اوي و من الناس ال low class اوي..

---

اقتباس:

---

المشاركة الأصلية كتبت بواسطة Adham

بصراحه احنا شعب مابيجيش غير بقلة الادب و بالكرباج

---

http://www.postimage.org/Pq1IN2X9.jpg

http://www.postimage.org/aV1xQFRi.gif

عمرى ما شتمت حد نهائى ... أكتر كلمة قلتها .. ده متخلف ده ولا إيه ؟ .... على إعتبار إن متخلف دى وصف مش شتيمة :biggrin24:

بصراحة بحس إن الشتيمة بتقلل من إحترامى قدام الناس .... و كمان هو لو أنا شتمت واحد خلاص كده يبقى أخدت حقى و لا حتى خليته يحرم يعمل كده تانى؟!! ... ما إستفدتش حاجة نهائى غير ذنب زيادة و حرقة دم و أعصاب عالفاضى.

خليك كووووووووول ... خصوصاً و إنت سايق فى المحروسة. :D

الشتيمة بقت من سمات الشعب المصري
والاغرب ان مش بس الرجاله هما اللي بيشتموا
البنات كمان وايه اقذر الشتايم ومش عايز اقول انها بتوصل لدرجه ايه !!!!!

بلاش يا علا المثالية الحالمة فى دنيا الفانتازيا اوى دى احنا مش فى المدينة الفاضلة الشتيمة والنكت موجودة فى كل شعوب العالم لدرجة لما تتتفرجى على اى فيلم اجنبى تلاقى شتايم لو اتقالت بالعربى تبهدل الدنيا

دانا عملت مشاركة بسخرية فى موضوع قالوا ان طوب الأرض اشتكى منى ولا كأن الناس دى عندهم كهرباء وبيشوفوا التلفزيون

انا اعرف ناس قبل ماتركب عربيات كانو محترمين جدا وبعد ماركبوها تلاقيهم بنى ادمين تانين
انا كنت بشتم زمان وانا سايق بس خلاص جالى برود من اللى بيحصل فى الشارع

اقتباس:

---

المشاركة الأصلية كتبت بواسطة badblood

الشتيمة بقت من سمات الشعب المصري
والاغرب ان مش بس الرجاله هما اللي بيشتموا
البنات كمان وايه اقذر الشتايم ومش عايز اقول انها بتوصل لدرجه ايه !!!!!

---

فعلا بقى فى بنات كتير اوى بتشتهم بالفاظ قذرة جدا وبيعملوا حاجات انيل فى نص الشارع ولا كان حد هممهم

القصة يا جماعة ان الطبقة الوسطى اندثرت وتحول أفرادها بدون أن يشعروا إلى طبقة دنيا فى الواقع ( فقر - تعليم متواضع فى الكيف حتى لو كان جامعياً - تفكك أسرى - خواء عقلى - ...إلخ . ) وفى المسمى الطبقى مازال هؤلاء- ونحن منهم ربما- يصنفون على أنهم مازالوا طبقة وسطى ! ولما كانت الطبقة الوسطى التى هى عماد أى مجتمع ويخرج منهاعادة قادة الفكر والأدارة والسياسة قد تهاوت واختلطت لحد التمازج التام مع (الطبقة الدنيا التى لها قيمها الخاصة التى فرضتها عليهات ظروف ضاغطة)فقد أصبح من العادى أن ترى المسمى مهندس أو محامى أو غيره يلبس الكرافات اللى جايبه من العتبة وملمع الجزمة الجلد الصناعى اللى مالاقاش للأسف غيرها على قد فلوسه وواقف فى الشارع يسب الدين ويشاور بصوابعة وحتى الهزار أصبح كذلك والله الناس معذورة و ماوصلتش لهذه الحال إلا بسبب عوامل متعددة فرضها التطور القاسى للطروف الاجتماعية فى بلدان نامية منها بلدنا . دا اقتراحى فى القضيه يعنى ...

شوفى اعلان فيلم اتش دبور الشيتمة عشان قالها بالانجليزى عادى و مفيش اى حاجة ولا اى رقابة مع انها لو اتقالت بالعربى كان زمانهم قلبو الدنيا:photo:..وموضوع الشتيمة نفسه العيب فى الناس ده مش عيب من واحد او اتنين ده ثقافة شعب كامل...ثقافتنا حاجة تفرح و تشرف بجد:gnorsi:

اقتباس:

---

المشاركة الأصلية كتبت بواسطة hitsh88

شوفى اعلان فيلم اتش دبور الشيتمة عشان قالها بالانجليزى عادى و مفيش اى حاجة ولا اى رقابة مع انها لو اتقالت بالعربى كان زمانهم قلبو الدنيا:photo:..:gnorsi:

---

دى برضه من الظواهر المضحكة جدا فى مجتمعنا، ان الكلمة الأبيحة لما تتقلب انجليزى تتحول الى كلمة مؤدبة، لاحظو معى الناس اللى بتحاول تعمل نفسها مهذبة بتستميت ازاى فى ترجمة اسماء الملابس الخاصة والوظائف الفسيولوجية الجسدية واسماء اجزاء الجسم وحتى بعض المهن المخجلة اللى اللغة الانجليزية حتى تكون التسميات (مهذبة) ويمكن قولها فى مكان عام بدون خجل، اما لو ان هؤلاء استخدموا المقابل العربى لاصبحت فضيحة وجرسة . يا ترى ايه السبب فى الظاهرة الاحتماعية الغريبة دى؟

اقتباس:

---

المشاركة الأصلية كتبت بواسطة romeeoo

بلاش يا علا المثالية الحالمة فى دنيا الفانتازيا اوى دى احنا مش فى المدينة الفاضلة الشتيمة والنكت موجودة فى كل شعوب العالم لدرجة لما تتتفرجى على اى فيلم اجنبى تلاقى شتايم لو اتقالت بالعربى تبهدل الدنيا

دانا عملت مشاركة بسخرية فى موضوع قالوا ان طوب الأرض اشتكى منى ولا كأن الناس دى عندهم كهرباء وبيشوفوا التلفزيون

---

طبعاً حضرتك عندك حق وكل حاجة قولتيها مظبوطة بس الواقع يختلف
أنا شايف لو إن حضرتك مش عايزة تسمعي حاجة زي كدة بجد
متتفرجيش على أفلام عربي ولا أجنبي ولا تتفرجي على برامج تليفزيون طبعاً مش كلها ولا تسمعي أغاني لأن كمان سمعت في بعض الأغاني كلمات تخدش الحياء
وبعدين يا ريتها جت على الكلام بس يعني حضرتك عاجبك إلي إنتي بتشوفيه ومش عاجبك إلي بتسمعيه وعموماً الرسول عليه الصلاة والسلام قال في حديث عن الفتنة وزمانها :(أمسك عليك لسانك وليسعك بيتك ولتبك على خطيئتك)
أعتقد هوه ده وقته ممكن حضرتك تفادياً لسماعك مثل هذه الأمور تتجنبي الخروج والإختلاط بالناس إلا لحاجة ضرورية وربنا يعينك

اقتباس:

---

المشاركة الأصلية كتبت بواسطة sab3aawy

دى برضه من الظواهر المضحكة جدا فى مجتمعنا، ان الكلمة الأبيحة لما تتقلب انجليزى تتحول الى كلمة مؤدبة، لاحظو معى الناس اللى بتحاول تعمل نفسها مهذبة بتستميت ازاى فى ترجمة اسماء الملابس الخاصة والوظائف الفسيولوجية الجسدية واسماء اجزاء الجسم وحتى بعض المهن المخجلة اللى اللغة الانجليزية حتى تكون التسميات (مهذبة) ويمكن قولها فى مكان عام بدون خجل، اما لو ان هؤلاء استخدموا المقابل العربى لاصبحت فضيحة وجرسة . يا ترى ايه السبب فى الظاهرة الاحتماعية الغريبة دى؟

---

أعتقد الفكرة هي :
لو إني قولت الكلمة بالعربي هبان زي ما قالوا من الـLow class
لكن لما أقول الكلمة بالإنجليزي فهذا ينفي إني من بيئة Low
ويبقى كأني مقولتش حاجة غلط لأن إستخدامي اللغة الإنجليزية أوضح إني من بيئة High
بإختصار الواطي هوه إلي بيتكلم عربي والمحترم هوة إلي بيتكلم إنجليزي
ويا حسرتي على لغتي الجميلة المقدسة
التي أصبح من يستخدمها تشينه ومن أعرض عنها لغيرها رفعته
ولا حول ولا قوة إلا بالله

وأرجو من الإدارة عدم محو كلمة واطي حيث أن Low class أيضاً تعني نفس المعنى والحدق يفهم

اولا شكرا على الموضوع لانه بجد عملي تذكره جيده
وانا الحمد لله مش بشتم حد وانا سايق وان كنت ممكن اشتم في سري بس بستحرم بضه لاني كده بديله من حسناتي وربنا يغفر لنا جميعا
انا فاكر مره كنت وقفت فجأه كده (انا غلطان) المهم قام راجل عداني وشتم قمت اتجننت وولعت في الطريق وصوت الماتور وكده بس يظهر انه خاف من اللي عملته المهم جيت جنبه ولقيت جنبيه مراته قولتله طب حتي على الاقل احترم اللي قاعده جنبك لاني ممكن اردلك الشتيمه
لقيته خاف كده واتحرج وقالي اصل كذا وكذا بيبرر قولتله طب اتكل على الله وسيبته
الحمد لله ان في ناس لسه عندها ذوق وخجل وبيعرفو غلطهم وياريت احنا نكون قدوه للناس وربنا يساعدنا على ذلك

جزاكم الله خيرا جميعا على التفاعل.. سواء بالإيجاب او السلب :)

انا هدفي يا جماعة من الموضوع ده مش مناقشة موضوع الشتائم في حد ذاته.. لإنه موجود و بتتعرض آذانا يوميا لكثير منها في الشارع.. انما اللي بأسف عليه هو الشريحة اللي معروف عنها الاحترام بين الناس و منهم ناس معانا هنا في المنتدى قمة في الاحترام و انا نفسي أشهد لهم بهذا.

الموضوع ده ما هو إلا تذكرة و همسة في أذن كل من نشهد له بالتقوى هنا في المنتدى بإنه لو حد استفذه في الشارع و لقى نفسه هايشتم شتائم قذرة بس يتذكر رسول الله صلى الله عليه و سلم و نهيه عن التشاتم بألفاظ لا ترضي الله و لا رسوله.

و عموما الحمد لله.. متهيألي بعد الموضوع ما أكتر من 300 حد في المنتدى قروه تبقى كده رسالتي وصلت :)

الف شكر ليكى يا علا لإنك فعلآ فكرتينى بحاجة كانت غايبة عنى
بصراحة انا شتمت مرتين قبل كده و بعد كده حسيت ان مستوايا إنحدر و انى نزلت لمستوى قليل قوى

المشكلة ببساطة هى ثقافة الزحام

يعنى الناس فى اوروبا محترمين ليه؟؟ لإن هم اتربوا فى حياة هادئة مفيش فيها ضوضاء و لا دخان و طوابير عيش و حقوقهم محفوظة مش بيحتاج انه يعلى صوته عشان يخدها

إنما لو عكستى الظروف عندهم أكيد هتلاقى تصرفات سيئة و هتبتدى إنها تزيد مع الوقت لحد ما توصل زى عندنا

و بالنسبة لى انا مش بحب أشتم أبدآ و بحاول انى أحافظ على لسانى لكن المشكلة ان الواحد بيتعرض أحيانآ لمساوىء الناس بشكل مركز فبالتالى بيلاقى ان الحل انه يبقى زى معظمهم عشان يعرف يتعامل معاهم

و الدعاء اللى فى التوقيع ده كان فيه أحد الأعضاء الله يكرمه كان كتبه و انا أخدته منه و و بقراه كل ما أحس النى متضايق من حد

و مرة تانية الف شكر لإنك نبهتينى عشان آخد بالى بعد كده

فعلا عندك حق يا علا _ _ _ دي بقت حاجة تتلف الأعصاب _ _ أنا ما بستحملش أسمع الكلام ده يتقال قدامي _ _ _ و كتير زعلت مع أصحابي بسبب كده لأن بعضهم بيعتبره عادي _ _ _ بل الأكثر من كده إن بعض الشباب بيهزروا مع بعض و يقولو يا ابن كذا و كذا بكلمات تستحق الجلد 80 جلدة في الإسلام _ _ _

و لا لما أكون ماشي مع أختي في الشارع و أشوف واد شكله صايع كده _ _ _ ضغطي بيعلى على طول لأني متوقع اسمع منه كلمه مش كويسة سواء بيقولها لواحد صاحبه أو لواحد بيتخانق معاه _ _ _ و للأسف الناس دي ما ينفعش أقومها أو أعمل راسي براسها لأن حتى لو أنا شتمته بكل الشتايم اللي في الدنيا و هو قالي نص كلمه يبقى هو اللي كسب لأنه بيكون قدر ينزلني من مستوايا كدكتور لمستواه كعربجي (سوري ع الكلمة)_ _ _

انا مره في مدينة نصر قدام قسم تامي مدينه والفي الفتحه اللي برجع منها على شارع النزهة واحد حك بعربيته حكه بسيطه جدا في عربيه واحدة كانت راكبه هي امها (خت بالك هي وامها)
ونزلت تشوف العربيه لاقيت الاكصدام مخبوط (او بمعني اصح مخدوش) وعينيك ما تشوف الا النور
نزلت الانسه او المدام الله اعلم وهات يا يزعيق في الولد لدرجه ان الولد مش عارف يتكلم من كتر قذارة الشتايم اللي كانت بتتقال وانا نفسي كنت مظلوم ومكنتش اعرف ان في بنات بالقذراة دي
فعلا شتايم غريبه وعجيبة مفيش تربيه خالص والبنت طبعا لابسه المحزق والملزق والام قاعدة في العربيه ولا هي هنا وحتى تقول لبنتها عيب ولا خلاص (انهيار اخلاقي)
وعجبي

اقتباس:

---

المشاركة الأصلية كتبت بواسطة badblood

انا مره في مدينة نصر قدام قسم تامي مدينه والفي الفتحه اللي برجع منها على شارع النزهة واحد حك بعربيته حكه بسيطه جدا في عربيه واحدة كانت راكبه هي امها (خت بالك هي وامها)
ونزلت تشوف العربيه لاقيت الاكصدام مخبوط (او بمعني اصح مخدوش) وعينيك ما تشوف الا النور
نزلت الانسه او المدام الله اعلم وهات يا يزعيق في الولد لدرجه ان الولد مش عارف يتكلم من كتر قذارة الشتايم اللي كانت بتتقال وانا نفسي كنت مظلوم ومكنتش اعرف ان في بنات بالقذراة دي
فعلا شتايم غريبه وعجيبة مفيش تربيه خالص والبنت طبعا لابسه المحزق والملزق والام قاعدة في العربيه ولا هي هنا وحتى تقول لبنتها عيب ولا خلاص (انهيار اخلاقي)
وعجبي

---

ياراجل ده انا لسه كنت في دريم باركمن كام يوم...عيل صغير عنده 5 سنين ولا حاجه ضايق بنت لسه مجبتش ال 20...
فالبنت وامها واخوها شدوو شويه مع ام الولد الصغير
وطبعا علشان ام الولد الصغير low classوالبنت high class
فقالتلها انتي ست localوقالتلها اللعنه عليكي بالانجليزي...وعملت حركه بصباعها,وقالتلها put this....mal3eena
وطبعا ده كله قدام اخوها وامها...واللهي انا اتكسفت لما سمعت الكلام ده...متخيلتش ان انا ممكن اقول اللي هي قالته ده....وطبعا الست الغلبانه مش فاهمه حاجه من اللي اتقال

اقتباس:

---

طبعا حاجات زي دي كنت باسمعها او اشوفها من الناس اللي ساكنين في المناطق الشعبية اوي و من الناس ال low class اوي

---

:ANSmile23::ANSmile23::ANSmile23::ANSmile23:

جزاكم الله خيرا على المشاركات :)

هو انا ما كنتش عايزة أحول إتجاه الموضوع.. بس محتاجة أفهم إيه وجه اعتراض المعترضين على ان الشتايم النابية بتتسمع أكتر في المناطق الشعبية اوي او من الناس ال low class

- هل عشان دخلت كلمة انجليزي في كلامي بدل ما أقول الناس البيئة؟
- و لا عشان المناطق الشعبية أوي مش بيتسمع فيها شتايم قذرة؟

ملحوظة هامة.. انا مش معترضة على إعترض المعترضين.. انا بس عايزة أفهم سبب الاعتراض.

أولاً بعد الصلاة والسلام على الرسول الكريم صلى الله عليه وسلم
بما إن حضرتك بتذكرينا بأهمية الموضوع
وبتأميرنا بالمعروف وتنهينا عن المنكر
فمشكورة وجزاكي الله خيراً

فيما يتعلق بإستخدام حضرتك لكلمة Low Class
ممكن أعرف أولاً حضرتك إستخدمتي ليه الكلمة الإنجليزي ومش العربي
ثانياً من هو في نظرك الـLow Class ده
هل الساكن في منطقة شعبية وما هو تعريف المنطقة الشعبية
هل هي إلي ساكن فيها ناس فقراء ولا التجار ولا إيه
هل إلي دخل مدرسة حكومة أو ميعرفش إنجليزي يعتبر Low Class
هل إلي والده أو والدته مش معاهم مؤهل عالي يعتبر واد بيئة
إيه حكاية إحتقار الناس دية عشان سكنهم أو تعليمهم أو ظروفهم المادية

أصل ده بيئة أو أصل ده Low Class مش فاهمك

قال رسول الله صلى الله عليه وسلم

بحسب امريءٍ من الشر أن يحقر أخاه المسلم

أنا عايز أفهم ما هي وجهة نظر كل واحد في إحتقاره للناس عشان إيه؟؟؟

اقتباس:

---

المشاركة الأصلية كتبت بواسطة Metbahdel

أولاً بعد الصلاة والسلام على الرسول الكريم صلى الله عليه وسلم
بما إن حضرتك بتذكرينا بأهمية الموضوع
وبتأميرنا بالمعروف وتنهينا عن المنكر
فمشكورة وجزاكي الله خيراً

فيما يتعلق بإستخدام حضرتك لكلمة Low Class
ممكن أعرف أولاً حضرتك إستخدمتي ليه الكلمة الإنجليزي ومش العربي
ثانياً من هو في نظرك الـLow Class ده
هل الساكن في منطقة شعبية وما هو تعريف المنطقة الشعبية
هل هي إلي ساكن فيها ناس فقراء ولا التجار ولا إيه
هل إلي دخل مدرسة حكومة أو ميعرفش إنجليزي يعتبر Low Class
هل إلي والده أو والدته مش معاهم مؤهل عالي يعتبر واد بيئة
إيه حكاية إحتقار الناس دية عشان سكنهم أو تعليمهم أو ظروفهم المادية

أصل ده بيئة أو أصل ده Low Class مش فاهمك
قال رسول الله صلى الله عليه وسلم

بحسب امريءٍ من الشر أن يحقر أخاه المسلم

أنا عايز أفهم ما هي وجهة نظر كل واحد في إحتقاره للناس عشان إيه؟؟؟

---

طيب كده انا فهمت و جزاك الله خيرا على التوضيح :)

انا بس مش هابدأ أقول أي حاجة غير اني ألفت نظرك للي انا كاتباه في محل السكن بتاعي بالبنط العريض.

طبعا انا ما أقصدش أي تحقير من شأن أي حد و على فكرة انا تعليم حكومي كما ذكرت في إحدى موضوعاتي و ساكنة في منطقة شعبية و عارفة انا باتكلم عن ايه.. كل اللي كنت قلته ان المناطق الشعبية جدا بيكثر فيها سماع الشتائم و الألفاظ النابية.. مش باقول ان كل سكان المناطق الشعبية بيشتموا.. و إلا اكون انا كمان من ضمنهم.. و لاباقول ان كل سكان المناطق الغير شعبية (بلاش الراقية عشان ما تتاخدش ضدي) مش بيشتموا.. دي حاجة كده زي جملة إحصائية.. يعني نسبة و تناسب. يا رب يكون قصدي و صل لك بوضوح.

اما عن استخدامي لكلمة low class فأنا باعتذر لو حد فهم منها إساءة غير مقصودة على الإطلاق.. انا بس ما سعفنيش الكلام بالعربي، خصوصا اننا كلامنا هنا معظمه باللغة العامية، ففعلا ما لقتش مرادف ليها بالعامية غير كلمة "الناس البيئة" و طبعا دي مش باحب استعملها في كلامي خالص.. و لو حد عنده مرادف تاني أكثر لطفا من دي أو من الكلمة اللي بالانجليزي فأهلا بها :)

باعتذر للمرة التانية عن أي إساءة غير مقصودة اتفهمت من كلامي :005:

أعتقد الموضوع راجع للأخلاق و التربية و ملهاش علاقة بالمكان
الفرق إن الناس الـ High Class محدش فيهم بينسى يلبس القناع قبل ما ينزل بدليل إن الواد توتي مجرد ما بيبعد من منطقته و الناس اللي يعرفوه ممكن يتحول للولاد شلاطة

أعتقد إن low class ‎‏ استخدمت هنا للوصف مش للشتيمة _ _ _ و إن المقصود بيها الناس اللي مستواهم الاجتماعي و الفكري قليل و دي أساسا المفروض تشمل الطبقة الغنية و الفقيرة لأن في ناس كده فيهم الاتنين بس لأن النسبة دي أكتر في الطبقة الفقيرة لتصادف إن هم مستواهم التعليمي أقل فالناس خدت على إن الكلمة دي لوصف الفقراء

كمان في حاجة و هي إن بعض اللي مستواهم راقي ممكن يكون بيقول الكلام ده بس بينه و بين أصحابه و يتكسف يقوله ع الملأ بعكس الفئة الثانية ممكن تكون ماشي في الشارع و يسمعك أحلى كلام _ _ _

اقتباس:

---

المشاركة الأصلية كتبت بواسطة OlaOsman

باعتذر للمرة التانية عن أي إساءة غير مقصودة اتفهمت من كلامي

---

العفو حضرتك أخت فاضلة
نحسبُكي كذلك ولا نزكي على الله أحدا
ونسأل الله لكي ولنا الجنة أمين

الإنحطاط الأخلاقي من وجهة نظر أغلب المصريين للأسف بل أعتقد أغلب البشر مرتبط برصيدك في البنك ورأس مالك مما يعني أنك بما إنك ساكن في حي شعبي تبقى فقير تبقى منحط حتى لو كنت مؤدب يعني مؤدب بس برده درجة تانية
وبالتالي ملكش لازمة يعني أخاف على جرح مشاعرك ليه وبالتالي يتجرأ المنحط على إظهار سفالته لأن كل الناس حواليه من وجهة نظرة زيه (في الهوا سوا)
ولكن إلي ساكن في منطقة راقية يعني إنه مؤدب ومتربي ومحترم
يعني ميصحش إنك تجرح مشاعره بالكلمات دية لأنه محترم
عشان كده بيخاف المنحط يظهر سفالته لو عزل وساب مكانه وراح حي راقي (ولم إتزنق وحب يغلط يبرطم بالإنجليزي عشان ميتقالش إنه Low Class)

التربية والأخلاق ملهاش دعوة بالمكان
مش عشان الإنحطاط ظاهر في الأحياء الشعبية معناه إنها مليانه منهم ولا معنى إن حضرتك مبتسمعيش مثلاً في المعادي ألفاظ زي دية إن مفيش منحطين فيها

First I'm sorry to write in english but I don't have an arabic keyboard.
Second I objected low class description cause I come from a "LOW CLASS" neighborhood and I know how many respected people are living there and also how many non-respected.
But again this has nothing to do with the neighborhood at all.
So I objected the expression itself by categorizing people by where they live and not how they are.
Actually it's something made me suffer during a specific period of my life.

bottom line
I'm proud to be from a "LOW CLASS" neighborhood.

أنا عندى رأى بالنسبة لكلمة low class و high ..... المقصود بالكلمة يختلف من شخص لآخر على حسب هو بيصنف الناس حسب إيه ... مادياً أو أخلاقياً و إجتماعياً.

الإستخدام الأكثر لتلك الكلمات من ناس بيصنفوا على حسب المستوى المادى .... عشان كده الكلمة مبقتش محببة لمسامعنا ... لكن ده لا يعيب مستخدميها إذا كانوا يقصدون بها طبقة متدنية أخلاقياً و إجتماعياً.


تحياتى.

اقتباس:

---

المشاركة الأصلية كتبت بواسطة meza

أنا عندى رأى بالنسبة لكلمة low class و high ..... المقصود بالكلمة يختلف من شخص لآخر على حسب هو بيصنف الناس حسب إيه ... مادياً أو أخلاقياً و إجتماعياً.

الإستخدام الأكثر لتلك الكلمات من ناس بيصنفوا على حسب المستوى المادى .... عشان كده الكلمة مبقتش محببة لمسامعنا ... لكن ده لا يعيب مستخدميها إذا كانوا يقصدون بها طبقة متدنية أخلاقياً و إجتماعياً.


تحياتى.

---

mahe de heya el moshkela
en e7na bendakhal mostala7at ktera mesh 3araby fe este3malatna el yawmeya we '3aleban mabenkonsh asasan fahmen targametha sa7, momken min bab elta3aly we bardo momken min bab etarweesh

fe far2 kbeer been kelmet LOW CLASS (low social rank)ele 3ala lsan enas fe estekhdamat '3alat, we kelmet VULGAR aw CRUDE

طيب طالما الناس سابت الموضوع الأصلي و لسه بيتناقشوا في low class بالرغم من إني اعتذرت عن أي إساءة غير مقصودة من استخدامي للكلمة دي و و طالما ان ماحدش لسه عرض كلمة بديلة باللغة العامية تدي نفس المعنى فأنا بادعوا كل اللي بيشارك في الموضوع ده انه يقرا مشاركتي الأولى في رأس الموضوع.. هي دي رسالتي و برضه لسه عندي أمل انها تكون وصلت للمعنيين بها.. بعيدا عن مصطلح low class اللي عمل أزمة رغم كل التوضيحات :confused:

هههههههههههه

جبتى لنفسك وجع الدماغ

الله يكرمكم يا جماعة تنويه بس عن كلمة ايه سفن ايه اللي كل ما أقر موضوع ألاقي حد قالها
دي كلمة أظن إنها لا يصح أن تصدر عن حد في نايل موتورز
مكانها مش هنا خالص
على ذكر الشتيمة والكلام الذي لا يصح يعني