الموضوع: عمل تشيك للعربيه

روح توكيل العربية اكشف عليها أو مركز معتمد من التوكيل

بص يا باشا التوكيل آه بيبالغ فى وصف حاجات بس الحاجات دى انت عارفها

بس فيه حاجات ممكن تعدى على مراكز برة صعب انها التوكيل يتجاهلها

التوكيل لعبه كله فى الحاجات الاستهلاكية زى المساعدين والبطاحات والمقصات والتيول والطنابير

لكن بيقف على حالة الموتور والحساسات كويس جدا

وحالة الكهرباء فى العربية برضه

ووحالة السمكرة ودى أهم حاجة

يعرف لك آخر صيانة تمت للعربية كانت امتى والموتور اللى فيها بتاعها ولا لأ وأى لعب حصل فى العربية هيقول لك عليه

لأن العربية مفصصينها حتة حتة وعارفين خبايها كل عربية بيبقى جاى معاها كتالوج أصلاحات خاص بيها

لكن مثلا خليه قال لك الكاوتش تعبان هتبص انت بعينك على حالة الكاوتش من برا وتشوف هل يمشى معاك ولا لأ

نفس الكلام بالنسبة للمساعدين والبطاحات بتركب العربية بتشوف أداءها على الطريق


بص يا باشا تعالا نتسلى انا وانت على قد معرفتى فى العربية اللى معايا

أول حاجة نبدأ بسم الله ....
مبدئيا الكشف لازم يكون بالنهار فى وضوح الشمس وتقول لصاحب العربية عربيتك حصل ايه فيها بأمانة ؟
سمكرة العربية .... تبص على العربية من برا كويس جدا جدا وتشوفها من الأكسدام للأكسدام سنتى سنتى وتشوف بعينك لو فيه فروق ألوان تركز قوى عند الاكسدامات ودواير الرفارف لأن دى أكتر حتت بتتخبط
هتراجع الأبواب وتقارن الألوان مع لون السقف لو لاحظت أى فرق
تبص على العتب كويس جدا
تبص على السقف نفسه كويس جدا لا يكون فيه خبطة أو فعقة خفيفة ( لو مشبك وقع من البلكونة ممكن يسيب أثر مكانه ههههههه ! )

تبص للشنطة كويس برضه تفتحها وتبص على الدهان من جوا دايما الدهان جوا العربية بيبقى مطفى وخفيف جدا مش زى برا العربية

هتفتح الكبوت وتبص عليه من جوا وتركز قوى فى حوض الموتور واللون بتاعه برضه بيبقى مطفى وتمشى أيدك على البوية لأحسن تكون مسيلة ( دليل على الرش )

تفتح الأبواب وتبص عليها من جوا وعلى الدهان خاصة عند الأطراف لو فيه بوية مسيلة أو عالى وواطى يبقى الباب راشش

فيه حركة بيعملها التوكيل عند السمكرة ... بيبقى فيه جوا الأبواب والرفرف الخلفى للعربية قطع مطاط بيشيل فرش الباب ويشوفها وبيشيل الفانوس الخلفى ويشوفها

القطع دى عوازل للصوت فى نفس الوقت لو خبطة حصلت وجاء السمكرى عشان يسمكر لازم يحوشها وبتطلع قتافيت صغير مش حتة واحدة عشان ميعرفش يلزقها تانى وبتسيب بقعة مكانها لو لقيت البقعة دى بيبقى معناه ان فيه شغل سمكرة تم فى العربية

تشوف جسم العربية من تحت لو فيه أى خبطة فى علبة الشكمان علبة الببينة لحام فى العتب من تحت وباين مكان رش جديد أو رش مسيل

أرجع لحوض الموتور تانى بص على منظر الموتور العام وكل حاجة مترتبة فى مكانها ولا لأ وغطاء الرادياتير وقربة المياه وغطاء قربة المساحات فى مكانهم ولا حاجة مخلوعة ( بتدل على اهتمام صاحب العربية بيها طبعا )

شوف اذا كان فيه تنشيع زيت ولا لأ قيس مستوى الزيت شوف مستوى زيت الفرامل وزيت الباور ان وجد

اركب العربية ودور المحرك على السلانسية لاحظ صوت المحرك ولاحظ لون العادم ورائحته وزود بنزين جامد بس بعد ما العربية تسخن كدا وشوف لون العادم على rpm عالى للمحرك المفروض يبقى عديم اللون

وانت واقف برضه جرب تشغل جميع الأنوار فى العربية جرب جميع الأوبشن اللى فى العربية ازاز كهربائى وحساس مطر وحساس أضاءة ومساحات و دراع أشارات مع لف الدركسيون وشوفه شغال كويس ولا لأ وكاسيت وسماعات على الصوت عشان تعرف حالتها والراديو وولاعة السجاير وكراسى كهرباء ان وجدت

لاحظ ان كل اللمبات مطفية فى العربية بعد ما بتدور ومفيش اى لمبة تحذير منورة فى التابلوه غير معتاد انها تنور

جرب التكييف كويس جدا التكييف الساقع على كل الدرجات ونفس الكلام التكييف الساخن والعربية واقفة
ولاحظ اذا كان صوت المروحة بيعلى لما تشغل التكييف أو بعد ما تشغله بأقل من دقيقة كدا ( دليل على سلامة المروحة وانها شغالة بالسرعتين )
اطلع جرب العربية والغيارات بتاع الفتيس على كل الغيارات وامشى بيها سرعة كويسة بالتكييف عينك عل عداد الحرارة وراقب صوت المحرك وشوف الفرامل بتعمل صوت أو هزة أو أى شئ غريب فى العربية والغيارات بتنقل بسلاسة سواء كانت مانيوال أو أوتو

وامشى بيها فى طريق مكسر وشوف سلاسة العربية فى أكل المطبات المكسرة دى خدها بسرعة شوية بس مش بسرعة قوى بسرعة تخليها تكشفلك أى تزييقة مثلا أو حاجة مش مزبوطة أو خبطة جامدة بتحصل أو هزة جامدة فى الدركسيون

أرجع تانى وافتح الكبوت تانى وشوف فيه تسريب زيت محرك أو أى زيت ولا لأ
بص على جلود الأبواب وفرش العربية ومنظرها العام من جوا برضه وشوف فيه حاجة مكسورة زرار مثلا

شوف المساعدين لو مرشحين زيت بص عليهم كويس

أرفع العربية من قدام وامسك العجل الأمامى وهز العجلة كلها لبرا وجوا ولورا وقدام و شوف إذ كان بتتهز بالمساعدين والسوسته ولا ثابتة لأحسن تكون بطاحة المساعد بايظة

لف الدركسيون برضه وشوف سلاسة الباور وان مفيش صوت خبطة أو حكة أو حاجة بتتكسر وانت بتلف

جرب المارشدير برضه وشوف السلاسة وانت بتدى الغيار والعربية بتبدأ تتحرك

بالنسبة للمراكز فيه بنزينات كتير بتكشف وعندهم أجهزة كشف قدرة المحرك ( كبس المحرك )
وفيه مراكز خدمة برضه بتقدم الخدمات دى بس أنا معرفش فين فى منطقتك انتظر رأى الأعضاء الكرام بس أنا حبيت أفيدك لأن لازم اللى هيشترى يكون عنده وعى برضه ووجهة نظر حتى لو هيكشف فى التوكيل !!