الموضوع: خدمة عملاء بريليانس واستفساراتهم ومشاكلهم موعدنا 17/3/2013

المهندس احمد هايبدأ اولا يعرف حضراتكم بنفسه وكتاباته هاتكون باللون الازرق للتمييز

اولا انا سعيد بالتواجد في المنتدي الرائع ده وان شاء الله هحاول افيدكم باكبر قدر من المعلومات ومحاولة حل اي مشاكل لدي السادة العملاء

انا المهندس / احمد البيلي بتوكيل البافارية لسيارات بريليانس وماهيندرا وجريت وول فرع القطامية

ويسعدني الاجابة علي اي استفسارات لحضراتكم وللعلم تم التنسيق مع ادارة المنتدي لمنح الاعضاء الاولوية في الحجز للصيانة واعطائهم مواعيد مميزة ومبكرة عن باقي الاعضاء بشرط وجود استيكر المنتدي عند الحضور

Mr.Mohamed

السلام عليكم ورحمة الله وبركاته

بعد ما كنت خلاص مقرر اجيب m11 وصبرت فوق ال3 شهور وهى مش موجودة فى التوكيل أصلا فقررت انى اشوف حاجة بديلة ليها وبعد بحث لقيت الأنسب ليا fsv2013 مانيوال

فكنت حابب اسئل هى كمان موجودة والا كالعادة مفيش أى خبر عنها فى التوكيل ؟؟ ولو موجودة فسعرها كام النهاردة ولو التوكيل هيبقى بالحجز فهقعد قد ايه ؟
ولو هقعد وقت كبير فى التوكيل فحد يقدر يفدنى عن أى معرض عارضها واجيبها اوفر بريس

منتظر اجابتكم وشكرا جزيلا مقدما

العربية ممكن حضرتك تحجزها والاستلام بعد 3 شهور وممك حضرتك تشرفنا في فرع القطامية وتقابل الاستاذ / محمد عامر مدير الفرع وممكن حضرتك تحجز معاه او تستلم فوريا في خلال ثلاثة ايام مع زيادة بسيطة جدا جدا بنحاول نخدم بيها اعضاء المنتدي وعملائنا فقط هاتزيد الف جنيه عن السعر المعلن والسعر المعلن لكل سياراتنا موجود علي موقع .......CARS واحب اضيف لحضرتك السيارة GREAT WALL C 30 وهي عربية جيدة جدا ضمانها 3 سنوات او 100000كم وسعرها حاليا 78000 وهاتزيد مع الطلبية القادمة وهاتوصل 84000 جنيه بما يمثل لحضرتك قيمة مضافة

omarkhaled55

ابعاد جنط الكروس 5 فى كام ؟؟؟ ولو حد عندة واحد للبيع او يعرف بكام ومنين يا ريت يقولى

حضرتك هاتلاقي ابعاد الجنط في كاتالوج العربية صفحة 189 وهو موجود في التوكيل بسعر 1000 جنيه شامل الضريبة

mderbala91

ارجو معرفه مكان خارج التوكيل لبيع dvd for brilliance fsv هاااااامممممم

حضرتك ممكن تركبه عند VIDEO BUS احنا بنتعامل معاهم في عربياتنا

بالنسبة لصيانة frv & fsv واسعارها

صيانة 2000 كم شاملة زيت وفلتر 350 جم

صيانة 10000 شلملة زيت وفلتر 400 جم

صيانة 20000 شاملة زيت وفلتر وفلتر بنزين وهواء 650 جم تقريبا في حالة الموتور 1500 cc

اما الموتور 1600 cc هاتكلف 800 جم تقريبا

مع العلم اننا حاليا في تفاوض واعداد مع ادارة نايل موتورز الكريمة لعمل خصم كبير لاسعار الصيانة وقطع الغيار بما يلائم السادة اعضاء المنتدي الكرام

المشاركة الأصلية كتبت بواسطة memoo1286

ممكن أعرف أسعار الصيانة ل brilliance v5 at عند 10000كم 20000 كم و60000 كم وأسعار بعض قطع الغيار كتيل الفرامل الأمامى وسير الكاتينة والفلاتر

صيانة 2000 كم شاملة زيت وفلتر 400 جم

10000 كم شاملة زيت وفلتر 450 جم

20000 شاملة زيت وفلتر وفلتر بنزين وفلتر هواء 850 جم

وللعلم فسير الكاتينة جنزير وليس كاوتش بمعني ان العمر الافتراضي له مفتوح حسب الحالة ولايحتاج تغيير

fireboy

اولا السلام عليكم
ثانيا البافاريه و مدى السوء و الفشل فى اداره توكيل المفروض انه توكيل ل بى ام دبليو و مينى كوبر و اخيرا بريليانس نقف عند البريليانس بالرغم انها صينى بس فى ناس شكرت فيها و اللى زود الثقه ان البافاريه بقت الوكيل لها فى مصر فالاسف قريبى خد ثقه فى العربيه دى من البافاريه و اشترى بريليانس من اوتوسمير ريان من عشره ايام و استلمها fsv gls2013و كله كان ماشى تمام لحد تالت يوم من شراءها نزل يروح الشغل ففى الطريق وقف علشان يشترى حاجه رجع جه يدور العربيه مابدورش نهائى اتصل بالبافاريه قالولو هات المفتاح التانى الاسبير و هى هاتدور بالرغم من انو كان ساعتها فى 6اكتوبر وهو ساكن فى المعادى قال ماشى بعت واحد جابلو المفتاح الاسبير من البيت و جه كل ده و الراجل واقف على الطريق لوحده بعربيه زيرو واحنا عارفين حال البلد دلوقتى والامن والامان وصل المفتاح الاسبير جه يدور ما درتش اتصل بيهم تانى قالولو لا ده كده فيها عطل لازم تجبهلنا قالهم طب انا جنبكم لان البافريه فى ابو رواش قالولو احنا هنبعتلك ونش طوارئ ب 175جنيه قالهم ماشى بس اخلص بعد ما راحت وده كان يوم خميس قالولو الصيانه اجازه انهارده تعالى استلمها السبت لان الجمعه اجازه بردو قال ماشى راح يوم السبت قالولو الضمان مش مختوم روح اختمو راح مشوار علشان يختمو رجع قالولو سبهلنا و تعالى استلمها بكره رحلهم تانى يوم قالو له هى دارت بس لما بندخلها على الكمبيوتر بيطلع error
و لحد انهارده البافاريه مش عارفه تصلح العربيه و هو مش عارف يعمل ايه ازاى عربيه زيرو تعطل بعد يومين من شراءها و وكيلها مش عارف يصلحها والله انا و قرايبى و صحابى كل اللى كان بيفكر فى البريليانس لغى الفكره نهائى من بعد الموقف ده و دى مش اول مره البافاريه تعلن عن فشلها و عدم المسؤليه لان حصلت مع واحد قريبى تانى فى عربيه bmw740 كان بيعمل صيانتها اللى اتكلفت 54 الف جنيه مش ده المهم الاهم ان هما و هما بيعملو الصيانه كسروا الزجاج الامامى للسياره بالرغم انهم هما اللى كاسرينو هو اللى دفع تمنوا وده ان يدل يدل على مدى سوء و فشل اداره البافاريه فياريت اللى يعرف يقولى نعمل ايه فى العربيه البريليانس وهل جهاز حمايه المستهلك له دور فى الموضوع ولا ملوش لازمه و هل انا من حقى اقلهم انا عايز عربيه غيرها ولا لا
شكرا و اسف لو كنت طولت عليكم



اولا احنا بنعتذر لحضرتك بشدة عن اللي حصل

واوضح لحضرتك الموضوع بالنسبة لمفتاح الاسبير لان غالبا المشكلة دي بيكون سببها ان التكويد بتاع المفتاح بيفقد احيانا بسبب صدمة شديدة او مجال مغناطيسي واحيانا بدون سبب واضح وفي الحالة دي بنستعمل المفتاح الاسبير لحين اعادة تكويد المفتاح الاصلي وده اللي اشار علي حضرتك بيه اللي رد علي حضرتك لكن لما تبين ان العيب ليس في المفتاح كان لازم نفحص العربية

بالنسبة لذهاب حضرتك الي ابو رواش لان ده افضل علشان حضرتك تستلم العربية يوم السبت لكن لو حضرتك توجهت للقطامية وغالبا كان الوقت متاخر فده معناه انك هاتستلم عربيتك يوم الاحد لاننا السبت اجازة في القطامية والخميس في ابو رواش

وبالنسبة للمشكلة اللي في العربية علشان ادي حضرتك اجابة دقيقة رجاء ارسال رقم الشاسيه وبيانات العربية واسم حضرتك علشان اراجع الملف بتاعها وارد علي حضرتك

مرة ثانية بنعتذر عن اللي حصل وان شاء الله صورة البافارية تتحسن عند حضرتك وكل الاعضاء الكرام والعملاء وباكد علي حضرتك تاني بارسال البيانات للتحقيق في الواقعة وحل المشكلة نهائيا