تقييمي لتغير موتور بولو 2001 من 1.0 الي 1.4

السلام عليكم
حبيت انقل تجربتي لتعديل البولو 2001 من 1000 سي سي الى 1400

اولا : انا لما فكرت اعدل كنت محتار اركب موتور 1.4 واحد كامة 60 حصان او اتنين كامة 75 حصان او 1.6 (موتور بولو 97)
ناس كتيير حذرتني من 2 كامة و قالولي انه حلو فى الجري و السحب بس مشاكله كتيير و صيانته مكلفة فلغيته من حساباتي و سعره زي الواحد كامة و يمكن ارخص
ولما فكرت فى الموتور 1.6 ناس بردة قالتلي حرام عليك تركب موتور مش موديلها تبهدل العربية و سعره تقريبا 3000 جنيه او 4000 بعفشته و كل حاجته
المهم استخرت ربنا و توكلت على الله و قررت على 1.4 واحد كامة mpi

ثانيا : نزلت اشتريت موتور بكنترول بضفيرة بعفشة بفتيس من نص بولو من حرفيين السلام العفشة امامية كاملة بدون مقص و قنطرة ب 6200 جنيه

ثالثا : دخلت فى رحلة التسقيط و قعدت يوم كامل من 6 المغرب الى 12 صباحا تاني يوم لغاية لما دورنا العربية و طلعت جربت العربية و روحت نمت و رجعت تاني يوم الصبح كان الفتيس في صوت زي صوت بلية الدبرياج

رابعا : حلينا الفتيس و غيرنا اسطوانة و دسك و بلية فى يوم كامل و طلعت جربت كانت العربية مش مضبوطة

خامسا : عملنا الكنترول و كودنا و شفرنا و ضبطت العربية بس بردة صوت البلية مرحش و طلع الفتيس عايز يتغير

سادسا : حلينا الفتيس فى يوم كامل تاني و جبنا فتيس تاني (طبعا ببلاش) لان كل حاجة عن تجربة و جربت طلع بردة فى صوت البلية بس اخف من الاول

سابعا : من الزهق قررت امشي بالعربية كدة و اعود نفسي على صوت البلية دة و دي طبعا البلية الداخلية جوة الفتيس يعني مينفعش غير تغيير الفتيس

ثامنا : اداء العربية يختلف عن الموتور ال 1.0 هو كالاتي :
1 - الاول على rpm 40 بيجيب 30 كم/ساعة بدل 20 فى الموتور 1.0
2 - الثاني على rpm 40 بيجيب 70 كم/ساعة بدل 50 فى الموتور 1.0
3- الثالث على rpm 40 بيجيب 100 كم/ساعة بدل 70 فى الموتور 1.0
4- الرابع على rpm 40 بيجي 120 كم/ساعة بدل 100 فى الموتور 1.0
5- الخامس بيجيب اقصى سرعة للموتور 160 كم /ساعة على rpm 4200 تقريبا بدل 150 كم /ساعة على rpm 5000 فى الموتور 1.0

و اخيرا ارجوا اني اكون افدتكم و ياريت حد ينصحني بحد يصلح الفتيس لان تغييره فعلا مش مضمون
تحياتي للجميع

مبروك عليك الماتور الجديد
سؤال :-
هل تغير الماتور بالاضافة الي التكلفة والتعب والمجهود حسيت بفرق كبير بينة وبين الماتور القديم ؟؟
ولا الفرق بسيط ولا يستدعي التكلفة والمجهود؟
وشكرا لحضرتك

اقتباس:

---

المشاركة الأصلية كتبت بواسطة abdo7000

مبروك عليك الماتور الجديد
سؤال :-
هل تغير الماتور بالاضافة الي التكلفة والتعب والمجهود حسيت بفرق كبير بينة وبين الماتور القديم ؟؟
ولا الفرق بسيط ولا يستدعي التكلفة والمجهود؟
وشكرا لحضرتك

---

الفرق مش كبير زي ما هو واضح من السرعات المكتوبة لان الموتور فارق 10 حصان فقط اكيد الفرق كان هايبقى محسوس اكتر مع الموتور 75 حصان 2 كامة بس شغال الحمد لله

فى الاول طبعا مبروك عليك الموتور الجديد
وعاوز اقولك ان الفرق مش بس سرعة انما الموتور ال 1400 سحبه احسن بكتير لما تكون مشغل التكييف ومحمل العربية والصيف دخل علينا وكلنا عارفين الموتور ال1000 بيموت فى السحب مع التكيييف بحس كأنى قاطر عربية ورايا
وربنا يباركلك فيه ويديك خيره ويكفيك شره

الف مبروك العربية
ربنا يباركلك فيها ويديك خيرها ان شاء الله

بالنسبة للأداء - لا في فرق مش بسيط ولا حاجة
عزم الموتور ال1.4 اكبر من عزم ال1.0 ودة بيبان معاك زي ما قال الباز في التكييف اولا والتحميل والمطالع ثانيا
ثالثا فرق السرعات يمكن مش كبير اوي - بس بردو فرق الأستهلاك مش كبير اوي

اما عن مشكلة الفتيس - فأنت بصراحة بتتكلم في حاجة ما ينفعش تتصلح نهائي (وخصوصا انك لسة في مرحلة الضمان - نصيحة روح للتاجر وتاخد فتيس مش محلول)
البلية الداخلية من اسوء ما يكون في الفتيس والصح انك تغيير فتيس كامل لأن مفيش بلي نظيف في السوق
انا عندي نفس مشكلة البلية (بس بتخبط مش بتون) والمطلوب مني تغيير فتيس كامل عشان البلية

ربنا يوفقك لما فيه الخير

والله المستعان
،
،

الف شكر يارجالة على المشاركات و ربنا يبارك فيكو و انا فعلا حاسس بالفرق فعلا فى التكييف و المطالع اما بالنسبة لموضوع تغيير الفتيس دة تاني اعتقد اني مش هاعمله تاني (على الاقل دلوقت) و هاعود نفسي على الصوت و خلاص لاني فعلا حاسس انه كل فتيس هاجيبه هايطلع في مشكلة
دة واحد كان عند الميكانيكي و انا بغير الفتيس اخر مرة غير 6 فتايس و بردة مش مبسوط
الف شكر مرة تانية

اداء ال 2 كامه جبار وخصوصا لز كنت مسقط نص كامل
ابس ال 1 كامه حلو برده والموضوع فى حد زاته ممتع عشان احسن من 1000
وربنا يباركلك فيها

اقتباس:

---

المشاركة الأصلية كتبت بواسطة mido_antouhh

اداء ال 2 كامه جبار وخصوصا لز كنت مسقط نص كامل
ابس ال 1 كامه حلو برده والموضوع فى حد زاته ممتع عشان احسن من 1000
وربنا يباركلك فيها

---

شكرا ياباشا انا الميكانيكي بتاعي اتحايل عليا علشان يركبلي ال 2 كامة لنفس السبب ال انت قلته بس دة عايز شباب يشدوا و يجروا و الكلام دة انا بعمل عربيتي علشان اشتغل بيها مش اكتر

ألف مبروك يا باشا على الموتور الجديد , أو بمعنى أصح العربية الجديدة :)
ربنا يعطيك خيرها و يبعد عنك شرها , أمين يا رب
بالتوفيق

تحياتى

مبروك واداء كويس

الف مبروك يا باشا على التعديل وربنا يباركلك فيه يارب ويديلك خيرها كله ويكفيك شرها كله
عندى تعليق على السرعات بتاعه الموتور ال 1400
يعنى اقصى سرعه بتيجى عند 4200 لفه طب ده معناه ان اقصى عدد لفات لاموتور 1400 هو حوالى 4200 وده معناه انك بتجيب تقريبا اخر الموتور فى كل نقله لكن مع الموتور ال 1000 انت فاضل حوالى 1000 لفه على اخر الموتور مع كل غيار طب كده يبقى المقارنه صح ولا ايه ؟
وعلى فكره انا طلعت النهارده على البحر يوم الجمعه الصبح فى اسكندريه عشان اجرب عشان انا لسه مغير اسطوانه وديسك وبليه بعد ما العربيه وقفت تحت البيت واطريت اوديها لاقرب واحد جمب البيت مش للميكانيكى اللى انا عاوزه كنت عاوز الشيخ ابراهيم يغيرهم بس النصيب هيا جت تحت البيت وحلفت ماهى واخده غيار
انا برضه قولت اعمل زيك عشان قريت موضوعك امبارح و برضه كل الغيارات على 4000 لفه وشوفت كل نقله كام
الاول جاب 25 التانى جاب 60 التالت جاب 85 الرابع جاب 105 على فكره موتور عربيتى 1300 وانا جبت اخر العربيه على الطريق الصحراوى وكان معايا 2 فى العربيه وكان بين ال 155 وال 160 على ار بى ام 5
وكمان عاوز اعرف لما اجى اطلع على السلانسيه بالدبرياج بس من غير بنزين بحس بدردره بسيطه ده عادى ولا ايه ؟؟؟؟؟

اقتباس:

---

المشاركة الأصلية كتبت بواسطة hamada_elzayat

الف مبروك يا باشا على التعديل وربنا يباركلك فيه يارب ويديلك خيرها كله ويكفيك شرها كله
عندى تعليق على السرعات بتاعه الموتور ال 1400
يعنى اقصى سرعه بتيجى عند 4200 لفه طب ده معناه ان اقصى عدد لفات لاموتور 1400 هو حوالى 4200 وده معناه انك بتجيب تقريبا اخر الموتور فى كل نقله لكن مع الموتور ال 1000 انت فاضل حوالى 1000 لفه على اخر الموتور مع كل غيار طب كده يبقى المقارنه صح ولا ايه ؟
وعلى فكره انا طلعت النهارده على البحر يوم الجمعه الصبح فى اسكندريه عشان اجرب عشان انا لسه مغير اسطوانه وديسك وبليه بعد ما العربيه وقفت تحت البيت واطريت اوديها لاقرب واحد جمب البيت مش للميكانيكى اللى انا عاوزه كنت عاوز الشيخ ابراهيم يغيرهم بس النصيب هيا جت تحت البيت وحلفت ماهى واخده غيار
انا برضه قولت اعمل زيك عشان قريت موضوعك امبارح و برضه كل الغيارات على 4000 لفه وشوفت كل نقله كام
الاول جاب 25 التانى جاب 60 التالت جاب 85 الرابع جاب 105 على فكره موتور عربيتى 1300 وانا جبت اخر العربيه على الطريق الصحراوى وكان معايا 2 فى العربيه وكان بين ال 155 وال 160 على ار بى ام 5
وكمان عاوز اعرف لما اجى اطلع على السلانسيه بالدبرياج بس من غير بنزين بحس بدردره بسيطه ده عادى ولا ايه ؟؟؟؟؟

---

عندي ملحوظة كان المفروض اكتبها فى بداية موضوعي بس نسيت

عدادات الموتور 1.4 غير عدادات موتور 1.0 يعني عداد rpm بتاع 1.4 اخره 60 اما بتاع 1.0 اخره 70 و انا مغيرتش عدادات و لو غيرتها هايبقى 40 rpm عندي يساوي 50 rpm فى العداد الصح بتاع 1.4
و حضرتك 1300 سي سي يعني تقريبا نفس الحصان مش هنلاقي فرق بس انا عايز اعرف حاجة 2001 ازاي 1300 دة مش موتورها دة موتور بولو تسعينات مش كدة ؟
و الدردرة دي غالبا طقم دبرياج و لو لسة مغيره يبقى نوعه وحش احسن نوع الساكس و في منه مضروب يفضل تشتريه من مكان ثقة سعره لا يقل عن 700 جنيه دلوقت

انا عربيتى موديل 96 مش 2001

وانا لسه مغيره بطقم اسمه luk من عند هريسه وده ب 650 جنيه وقالى انه المانى والدردره در وانا طالع بالدبرياج بس لكن بالبنزين مفيش دردره مش عارف بقى ده كده بيطبع ولا ايه

طب سؤال عشان نعرف اخر النقله عندك بتيجى فين يعنى السرعات اللى حضرتك كاتبها بتيجى مع زور النقله ؟ يعنى بتكون اخر الموتور ولا فيه لفات تانيه ؟

هههههههههههه طب و انت بتتطلع بالدبرياج ليه يا عم انت غاوي تضايق نفسك
luk حلو بس لو مكتوب عليه made in germany يبقى مضروب دة شغلي روح عنده تاني خليه يوريك طقم من عنده و اتاكد الاصلي بتاع اللوك ميكتبش عليه الماني

بالنسبة لاخر النقلة عندي انا بيقي عندي لسة شوية يعني فى الشد انا بجيب على التالت 120 و الرابع 140

اما الخامس لسة مجربتش لاني مجتش فرصة اعدي 160 لغاية دلوقت

سؤال تانى بس ملهوش علاقه بالموضوع

نزلت من كام يوم لقيت توكتوك خابط باب الهربيه اللى ورا ( الحمد لله خفيفه ) بس الجريده بتاعه الباب اليمين ورا مش موجوده لفيت عليها لما دوخت وفى الاخر لقيتها ( وجدتـــــــــــــــها ) وقالى ب 150 جنيه طبعا انا قعدت اقوله ليــــــــــــــــــــه ؟؟ ده انا اشترى الباب كله بسلطاته احسن

حد يعرف بقى اجيبها منين وبكام ولا اشيل ال 3 الفاضلين اوفر ؟؟؟؟ للعلم بولو 96

دة سعرها

هو فعلا مكنش مكتوب عليه made in germany ودى حاجه كانت مضايقانى وهريسه هو اللى قالى انه المانى وافتكرته اشتغلنى لما روحت وملقيتش النقشه بتاعه الصناعه كويس بقى انك قولتلى

تماااااااااااااام ياباشا زى الفل ( اللهم صلى على النبى )
بس انا بخاف جدا اجيب اخر النقله خالص وبغير على ار بى ام 3 بالكتير ده لو اتأخرت فى النقله مفيش غير المره الى قفلت فيها جاب ار بى ام 5 ( تجربه لمره واحده )

كدة اصلي

بس بعد كدة هات الساكس

ربنا يسهل ومنغيرش دلوقتى خــــــــــــــــالص

وياريت تقولنا انت لما لفيت ودورت على المواتير لقيت ايه اسعار المواتير ويا ترى ينفع يركب على الموتور ال 1400 فيتيس اوتوماتيك ولا لازم 1600 والاسعار لو حضرتك تعرف يبقى كتر خيرك

بالنسبة لعربيتك لازم 1600 اما لعربيتي ممكن 1400 2 كامة

الاسعار عندك تبقى اقل من 5000 جنيه موتور بفتيس at

التحويل لاوتوماتيك لازم تجيب نص كامل موتور بفتيس ب 2 كنترول بضفيرة بعفشة كاملة و كبالن و عدادات و قنصولة و بدالات النص عندي يعمل من 7500 ل 9500 1400 2 كامة و عندك ممكن من 4500 ل 6000 حوار مكلف بس الصراحة يستاهل

طب ليه مينفعشى موضوع ال 1400 ال 2 كامه عندى ؟ ده عشان الحوض نفسه ولا ايه ؟ انا اعرف انه ممكن يتسقط عندى ال 1400 عادى
واكيد ال 1600 حيكون اغلى كمان

على فكرة 2 كامة دي مش ميزة دي مصاريف زيادة و صيانة اكتر 1600 واحد كامة احسن و اوفر و هتلاقي سعره احسن من 2 كامة كنص مش مكنة بس

شكرا يا باشا على المعلومات وربنا يباركلنا كلنا فى عربياتنا

اَمين يا رب :)

هيا البولو 2001 مافيش منها غير 1000 سى سى بس؟

في 1400 بس قليل

اقتباس:

---

المشاركة الأصلية كتبت بواسطة hamada_elzayat

الف مبروك يا باشا على التعديل وربنا يباركلك فيه يارب ويديلك خيرها كله ويكفيك شرها كله
عندى تعليق على السرعات بتاعه الموتور ال 1400
يعنى اقصى سرعه بتيجى عند 4200 لفه طب ده معناه ان اقصى عدد لفات لاموتور 1400 هو حوالى 4200 وده معناه انك بتجيب تقريبا اخر الموتور فى كل نقله لكن مع الموتور ال 1000 انت فاضل حوالى 1000 لفه على اخر الموتور مع كل غيار طب كده يبقى المقارنه صح ولا ايه ؟
وعلى فكره انا طلعت النهارده على البحر يوم الجمعه الصبح فى اسكندريه عشان اجرب عشان انا لسه مغير اسطوانه وديسك وبليه بعد ما العربيه وقفت تحت البيت واطريت اوديها لاقرب واحد جمب البيت مش للميكانيكى اللى انا عاوزه كنت عاوز الشيخ ابراهيم يغيرهم بس النصيب هيا جت تحت البيت وحلفت ماهى واخده غيار
انا برضه قولت اعمل زيك عشان قريت موضوعك امبارح و برضه كل الغيارات على 4000 لفه وشوفت كل نقله كام
الاول جاب 25 التانى جاب 60 التالت جاب 85 الرابع جاب 105 على فكره موتور عربيتى 1300 وانا جبت اخر العربيه على الطريق الصحراوى وكان معايا 2 فى العربيه وكان بين ال 155 وال 160 على ار بى ام 5
وكمان عاوز اعرف لما اجى اطلع على السلانسيه بالدبرياج بس من غير بنزين بحس بدردره بسيطه ده عادى ولا ايه ؟؟؟؟؟

---

الموتور ال 1400 واحد كامة بيطلع ال 60 حصان بتوعه عند 4700 rpm
الموتور ال 1000 بيطلع ال 50 حصان بتوعه عند 5000 rpm
الموتور ال 1300 بيطلع ال 54 حصان بتوعه عند 5000 rpm

اقتباس:

---

المشاركة الأصلية كتبت بواسطة mohd7380

عندي ملحوظة كان المفروض اكتبها فى بداية موضوعي بس نسيت

عدادات الموتور 1.4 غير عدادات موتور 1.0 يعني عداد rpm بتاع 1.4 اخره 60 اما بتاع 1.0 اخره 70 و انا مغيرتش عدادات و لو غيرتها هايبقى 40 rpm عندي يساوي 50 rpm فى العداد الصح بتاع 1.4
و حضرتك 1300 سي سي يعني تقريبا نفس الحصان مش هنلاقي فرق بس انا عايز اعرف حاجة 2001 ازاي 1300 دة مش موتورها دة موتور بولو تسعينات مش كدة ؟
و الدردرة دي غالبا طقم دبرياج و لو لسة مغيره يبقى نوعه وحش احسن نوع الساكس و في منه مضروب يفضل تشتريه من مكان ثقة سعره لا يقل عن 700 جنيه دلوقت

---

ياباشا مبرووك عليك الموتور وربنا يكفيك شره ويديك خيره

بس معلومة العداد دى مش مظبوطة
العدادات كلها واحد فى القياس لكن هى بتختلف فى العدد
يعنى مثلا انا عداد عربيتى ابيزا ال 1000 سى سى كان 200 و red zone rpm من 5500 ولما سقط ال 1600 ال 101 حصان (مش ال 75 حصان) ركبت عداداته والعداد 220 وال red zone rpm من 6500 وده عشان الموتور عدد لفاته لحد 5800 لكن القديم كان عدد لفاته 5000

يعنى ال 40 rpm فى العداد القديم زى ال 40 rpm فى العداد الجديد

اقتباس:

---

المشاركة الأصلية كتبت بواسطة karim ibiza

ياباشا مبرووك عليك الموتور وربنا يكفيك شره ويديك خيره

بس معلومة العداد دى مش مظبوطة
العدادات كلها واحد فى القياس لكن هى بتختلف فى العدد
يعنى مثلا انا عداد عربيتى ابيزا ال 1000 سى سى كان 200 و red zone rpm من 5500 ولما سقط ال 1600 ال 101 حصان (مش ال 75 حصان) ركبت عداداته والعداد 220 وال red zone rpm من 6500 وده عشان الموتور عدد لفاته لحد 5800 لكن القديم كان عدد لفاته 5000

يعنى ال 40 rpm فى العداد القديم زى ال 40 rpm فى العداد الجديد

---

معلومة جميلة و مريحة نفسيا ليا الف شكر

بس ماشاء الله 101 حصان !!!!!

عربية حضرتك موديل كام و الموتور بتاع عربية اية ؟

اقتباس:

---

المشاركة الأصلية كتبت بواسطة mohd7380

بس ماشاء الله 101 حصان !!!!!

عربية حضرتك موديل كام و الموتور بتاع عربية اية ؟

---

انا عربيتى ابيزا موديل 98 والموتور ده كان بينزل فى الجولف 3 والبولو كلاسيك والفينتو والتوليدو والكوردوبا
ده الموضوع اللى انا كنت عامله
http://www.nilemotors.net/Nile/341077-98.html

ربنا يباركلك على الموضوع الجميل دة

اقتباس:

---

المشاركة الأصلية كتبت بواسطة mohd7380

الفرق مش كبير زي ما هو واضح من السرعات المكتوبة لان الموتور فارق 10 حصان فقط اكيد الفرق كان هايبقى محسوس اكتر مع الموتور 75 حصان 2 كامة بس شغال الحمد لله

---

ياريت يا باشا لو تقدر تقولى استهلاك البنزين فى ال 1.0
و فى ال 1.4 كام كم للصفيحه بالظبط و شكرا

اقتباس:

---

المشاركة الأصلية كتبت بواسطة engmoody86

ياريت يا باشا لو تقدر تقولى استهلاك البنزين فى ال 1.0
و فى ال 1.4 كام كم للصفيحه بالظبط و شكرا

---

الاستهلاك واحد تقريبا فارق حاجة بسيطة
الالف سي سي 300 كم/صفيحة
1.4 سي سي 270 كم / صفيحة
لو موتور سليم جدا