أنا اؤيدك في موضوع العربية الصغيرة طالما مش هاتسافر كتير
بتكون رائعة جوة البلد سواء في الزحام أو الركنة أو توفير الوقود
ولو اضطريت تسافر بيها لوحدك هاتمشيك برضه من هاتقول حاجة ... لكن هتبدأ تحس بتعبها لما تكون محمل فيها ناس وشنط وماشي مثر على طريق زي العين السخنة أو الكريمات اللى السرعة عليهم 120 ك / س ... ساعتها هاتحس إنك راكب موتوسيكل لأنها هاتجيب معاك الـ 120 ... بس هاتكون بالعافية في المطالع ... والطرق دي بتكون مليانة مطالع
غير كدة أنا بقالي 6 شهور رايح جاي على طريق الكريمات أسيوط بالعربية الألتو 800 لغاية أسيوط 400 كيلومتر رايح و 400 راجع على سرعة 120 في الآغلب كل إسبوع مرة ... والحمدلله العربية زي الفل ... بس الصيانات زيادة لأن طبعا ده معدل إهلاك أعلى من المعتاد
السيلاريو جميلة جدا ... بس هية وزنها أتقل من الألتو بحوالي 200 كيلوجرام .. والفرق ده هاياكل الفرق في الموتور اللى بينهم ... عشان كدة أفضل من السيلاريو عمليا وليس شكلا الألتو الـ كي 10 ... لأنها نفس وزن الألتو العادية ولكن موتورها أقوى 1000 سي سي مقابل 800
والأفضل من السيلاريو من جميع الزوايا هي السويفت ديزاير لأنها 1200 سي سي أربعة سلندر ووزنها نفس وزن السيلاريو بيزيد 50 كيلوجرام فقط وفي نفس الوقت حجمها أكبر من الداخل بصورة ملحوظة وكومباكت من الخارج وكويسة وشنطتها مناسبة ... بس معرفش سعرها مناسب ليك ولا لآ ... لأني أعرف إنها بحوالي 90 الف ... وبرضه هاتواجه مشكلة قلة قطع الغيار خارج التوكيل ... لأني معرفش ظروفها إيه وهل متوافرة ولا لأ
ليه مافكرتش في الساجا بتاعة بروتون عربية جميلة جدا موتورها 1300 سي سي قوي جدا لو قرصت عليه ... ولو ما قرصتش عليه ومشيت هادي هايديك توفير الوقود المطلوب وسعرها مناسب وابتدت تنتشر شوية .. وشكلها مميز وجميل ... وفي منها أتوماتيك