هل تأخير صيانة ال5000 عن موعدها يمثل مشكلة؟

**NaBeLeOn** · 06-08-2008 07:10 AM

و أنا بعمل صيانة الألف المهندس قالى من أول صيانة ال5000 لازم حجز مسبق و يفضل تتصل قبلها ب5 أيام

المهم العربية وصلت 4600 قلت أحجز .. اللى رد عليا قالى أول حجز 14/8 !

طبعا العربية هتكون عدت ال5000 مرتاح لحد التاريخ ده .. حاليا عديت 4900 اصلا غير الاسبوع اللى فاضل ده و المشوار من عندى لحد التجمع حوالى 150 كيلو لوحده

مش عارف بصراحة هل فى مشكلة لو العربية وصلت ل5500 تقريبا .. اللى قالقنى ان ده اول غيار زيت للموتور و مش عارف بصراحة اركن العربية و لا اعمل ايه

**Kamal-1** · 06-08-2008 10:16 AM

ما تقلقش قوي كده يا كبير الزيت هيمشيك ممكن لحد 6 الاف بس حاول ما تمشيش بالعربية واوعى تحرق عليها الفترة اللي جاية

وماتقلقش

**ahmediz2000** · 06-08-2008 11:30 AM

غير الزيت عادى بره التوكيل وروح علشان تربيط العفشة والصيانة الدورية .. انا عملت كده فى صيانة ال10000 الاسبوع اللى فات ..ادونى معاد متاخر شويه وكان خلاص لازم اغير زيت ..سألتهم ينفع اغير زيت بره قالى عادى ..ولما رحت قلتهم انى غيرت الزيت وعملوا الصيانة عادى جدا وخدوا 100 جنيه (على ايه مش عارف)

**Hassan** · 15-08-2008 04:51 PM

فى مركز الصيانة بالاسكندرية افادونى بانة يلزم تغييرالزيت كل 5000كم بالرغم من انة موبيل 1

**sa3dawy** · 15-08-2008 05:24 PM

ماتقلقش خااااااااااااااااااااالص
انا الياريس بتاعتى قعدت بيها لل10000 كيلو ومحصلش حاجة !!

**Kamal-1** · 15-08-2008 11:19 PM

ماتقلقش خااااااااااااااااااااالص
انا الياريس بتاعتى قعدت بيها لل10000 كيلو ومحصلش حاجة !!

الياريس بيغيروا زيت في صيانة ال 1000 كم وبيحطوا زيت 10 الاف

انما الهوندا مابيغيروش زيت في صيانة ال 1000 والزيت اللي فيها بيمشيها 5000 كم

**NaBeLeOn** · 16-08-2008 01:59 AM

هو فعلا غيار الزيت كل 5000 ؟! ... غريبة

طبعا 360 جنيه فى غيار الزيت رقم مبالغ فيه ... بعد كده هغير انا الزيت بمعرفتى

**م/محمد صلاح** · 16-08-2008 12:23 PM

هما بيبقو 350 مش 360 (مش فارقه)
المهم انهم بيكونو تمن تغيير زيت وفلتر وطبعا شوية الحبشتاكانات اللى بيعملوها
انا لسه عامل صيانة ال 10000 يوم 13 اغسطس غيرولى زيت وفلتر وربطولى العفشه وظبطولى التكييف والزجاج الامامى بتاع السواق والاهم من كده انهم شدولى الفرامل شده صح الصح

بالنسبه انهم بيغيرو الزيت كل 5000 مع انه موبيل 1 بتاع 10000 انا كلمت فيها المهندس قاللى انت ممكن تغيره كل 10000 بس بعد ماتعمل صيانة ال 10000

**NaBeLeOn** · 17-08-2008 04:36 AM

هى الفرامل كان مالها يا أستاذ ميمو ؟

واضح ان مشكلة زجاج السائق موجودة عند معظم الناس .. هو حساس زيادة عن اللزوم لدرجة انه بيعلق بسرعه مع وجود اى عائق بسيط جدا

**م/محمد صلاح** · 17-08-2008 11:12 AM

المشاركة الأصلية كتبت بواسطة NaBeLeOn

هى الفرامل كان مالها يا أستاذ ميمو ؟

واضح ان مشكلة زجاج السائق موجودة عند معظم الناس .. هو حساس زيادة عن اللزوم لدرجة انه بيعلق بسرعه مع وجود اى عائق بسيط جدا

الفرامل ماكانش فيها حاجه يا باشا بس هما شدو الهاند بريك شويه لانه كان طرى شويه عندى من كتر الاستعمال يعنى كان بتك حوالى 11 تكه دلوقتى 3 تكات وبيقفش فى امها على طول

وبالنسبه لزجاج السائق فدى مشكله كومون فعلا ومنتشره لان الزجاج اوتوماتيك والعربيه دى بنت ناس مش واخده على تراب بلدنا فالاوتوماتيك بيعلق مع اى زرة تراب تدخل فيه ولو ضغطت عليه شويه بيخرج بره المجرى بتاعته بس احب اطمنك انها مش مشكله وبتتحل فى التوكيل على طول يعنى لوحصل معاك كده ماتقلقش ولاتقول المكنه باظت لا ... روحلهم عى طول وهما بيعملوه