الموضوع: حقوق المرأه في المجتمع

طيب، مبدئياً فيه شغل كتير بيرفض انه يعين ستات عشان حوار التأخير ده..

ثانياً.. إحنا لو في مجتمع محترم و البنت عارفة انها هاتروح متأخر محدش هايتعرضلها مكانش هايبقى فيه مشكلة.. انما عشان احنا في مجتمع ابن تييت فالبنت اتلغى من عندها فكرة الشغل متأخر.. و إن حصل فيا اما معاها عربية او متفقة مع سواق عشان متتبهدلش..

ثالثاً.. بالنسبة للأخوة اللي متضايقيين ان الست تشتغل.. أولاً لو مش عايزها تشتغل يبقى علمتها ليه من الأول؟؟ يعني انا مفروض يطلع عيني 17 سنة في التعليم بالميت عشان اقعد في البيت؟؟

و بعدين ماشي قعدنا في البيت، هل تعلم ان دينياً الست مش مفروض تعمل حاجة، و جوزها مفروض يجيبلها حد يقوم عنها بأعمال المنزل، و هيا تقعد متستتة و متهننة تحط في ميك اب و تتفرج على مسلسلات؟؟
مش ينفع، طبعاً مش ينفع.. عصر العبيد انتهى و محدش هاينزل يشتريلي جارية.. يبقى الحل ان الست تعمل شغل البيت، يبقى كده الراجل ملوش حق انه يتكلم مادام مش موفيها حقها في انها تقعد و الحاجة تجيلها لحد عندها..

حاحة كمان، في ظل الهبل الإقتضادي اللي احنا فيه، كام واحد قادر يقوم ببيت من غير ما يعتمد على جزء من مرتب مراته؟؟ و باتكلم على الناس اللي بيطلع عينها طول اليوم في الشغل عشان تاخدلها 1200 جنية اخر الشهر مش الناس اللي بتشتغل بالافات.. معنى كده ان شغل الست ضروري في الناحية دي.. بس بما ان الست بقت تصرف على نفسها، فقوامة الراحل المادية بخ..

حاجة كمان.. متضايقيين من ان الست بتنزل مظاهرات.. ماهو تاني.. لو البلد محترمة و المجتمع محترم كانت الست هاتنزل عشان تقول رأيها من غير ما تخاف من شوية الهمج اللي ممكن يضايقوها... انما للأسف في ظل المجتمع الهمجي ده طبيعي ان الست تتبهدل.. و ليها حرية الاختيار انها تسكت او تدافع و تناضل.. و الاحرار هما اللي بيناضلوا..

الست اللي بتطالب بالمساواة، بيطلع عينها في التعليم و الشغل و البيت و رعاية الأولاد و الزوج و تحمل السخافات اليومية من الناس البهايم في الشارع و قرف المواصلات و قرف الزحمة، ده غير القهر اللي بتتعرضله من و هي طفلة سواء عن طريق الختان او تفضيل الولد عليها او انها يتفرض عليها تتجوز حد مش عايزاه..

بيت ابوكي ل بيت جوزك ل قبر يلمك.. دي الست اللي في مصر..


متضايق من الستات أوي؟؟ امك و اختك و مراتك و بنتك دول ايه؟؟ ماهم ستات..

الستات نص المجتمع.. اللي مش فاهم كده يبقى اعمى، و اللي عايز يرجع الستات لعصر الجاهلية، يروح يعيش فيها هوا مع نفسه..

و اللي فاكر ان الستات واخدة حقوقها يبقى واهم، مش عشان شوية جمعيات بتحاول انها تخلي الستات تاخد حقوقها يبقى خلاص كده الستات زي الفل..

لو كان ينفع تيقى بنت و تنزل يوم في البلد دي، كنت هاتكره حياتك..

المشاركة الأصلية كتبت بواسطة تامر.محمد

سلام عليكم , انا عندي بعض التعليقات

بالنسبة نفسه , فهو مش ضيق لا من الستات ولا من ان الستات تشتغل , هو ضيق من الانتهازية من بعض الستات
مثال كنا بنتكلم فيه , مثلا ان الست ما ينفعش لا تبات في الشغل ولا تمشي متأخر , ده منطقي , بس المنطقي كمان في حاجة زي دي ان مرتبها يبقى اقل , او ان اللي بيشتغلوا في اوقات متأخرة و بيباتوا ياخدوا بدلات عن ده

أوكي.. في أي دولة في العالم عدد ساعات العمل معروفة و ليكن 8 ساعات في اليوم.. أي ساعة زيادة مفروض في القانون يبقى عليها أوفر تايم بيبقى حوالي 150% من معدل أجر الساعة العادية.. كون إن بلدك مفيهاش نظام الأوفر تايم في معظم الشركات فده أكييييييد مش ذنب الستات !!! و بالتالي، الست و الراجل 8 ساعات، يالخدوا و ليكن 3 الاف جنية، الراجل قعد اوفر تاين مفروض يتحسبله، متحسبلوش مش مشكلة الست، مشكلة الشركة..


بالنسبة لنقطة النزول متأخر نفسه , بالنسبة لي انا مثلا , حتى لو الدنيا آخر امان , فانا شايف ده برده غلط
وجهة نظرك تحترم.. بس انت بتقول ليه الستات مش بيتأخروا في الشغل و ان دي تفرقة و كده، عشان كده بقولك لو الدنيا أمان بالليل مفيش مشكلة عندي انا شخصيا اني ارجع متأخر..

بالنسبة لنقطة شغل الست في البيت , انا فعلا اظن ان شرعا ده حقيقي , بس نتكلم بصراحة شوية , اللي يقدروا على كده زوجاتهم بيبقوا فعلا كده , و اللي ما يقدروش , بتقعد زوجاتهم في البيت تشتغل فيه , و اللي ما يقدروش يكفوا بيوتهم زوجاتهم بتشتغل و بتساعدهم مفروض اضطرارا
طب ايه تأثير ده على قوامة الراجل ؟ نقطة معقدة , بس اظن ده يقلل منها طبعا , بس في العموم بتبقى بالتراضي بقى في الحالة دي
(عايز استلف المثال الشهير , شرعا ربنا حلل الراجل يتجوز اربعة ههههههههههههههههههههه )

تمام.. و انا متفقة معاك في النقطة دي.. بس نيجي بقى للإحصائيات، هتلاقي ان 90% من الوقت الست بتعمل شغل البيت، و في أغلب الستات شغل البيت + شغل برة.. مش هاتكلم عن الوضع الاقتصادي عشان كلنا عايشينه.. و تاني، انا باتكلم على مستوى أغلبية الشعب اللي بيقبضوا أي كلام و بيقضوا الشهر بالبركة.. دول الأغلبية اللي كتير مننا مش حاسيين بيهم..

بالنسبة لنزول الست مظاهرات , انا مش ضده في حال كون المظاهرات آمنة , اما في الوضع الحالي فانا عن نفسي ارفض , و ده مش عيبها , اللي عيبها هي اللي بتروح هي تشتبك باللسان واليد بس

تمام.. متفقة معاك.. بس نرجع لنقطة إن الرجالة هما السبب في إن المظاهرات مبقتش أمنة !! نوع أخر من انواع اضطهاد المرأة.. بدل ما يحموا البنات اللي بينزلوا يطالبوا بحقوقهم او يعبروا عن رأيهم، شوف المهازل اللي بتحصل.. و طبعاً ده إن دل على شيء فيدل على إنعدام الأخلاق خلاص.. و بالنسبة للبنات اللي بتروح تشتبك.. فانا ماظنش ان بنت هاتشتبك مع حد من غير ما يكون عمل حاجة.. و لو بدأت هيا بالاهانة يبقى الرد على قد الفعل..

المساواة في الحقوق ماعنديش اي اعتراض عليها

ياريت كل الناس تبقى كده..

تعليق اخير , جمعيات حقوق المرأة هي ابعد ما يكون عن حقوق المرأة فعلا , دول موجهين فقط لحقوق المرأة النخبوية اللي زي حالاتهم بس
معاك ان كتير من الجمعيات دي أي كلام، بس فيه جمعيات حالياً و مبادرات من الشباب بتنزل للشارع و بتعمل حملات توعية.. مش باتكلم انا عن الحاجات اللي كانت زي ايام سوزان مبارك و الهبل ده.. باتكلم عن الجمعيات اللي بتعمل ده عشان تغير فعلاً

ربنا يكرمكم ياتامر باشا قلت اللي عايز اقوله ومكنتش عايز ارد عشان مخرجش بره الموضوع ويتحول لخناقه وتوصل في الأخر لأخونة الدوله برده :))

لا خناقة و لا حاجة.. إحنا مش مجموعة اطفال هنا عشان نتخانق اثناء الحوار.. حتى لو فيه اختلاف في وجهات النظر و في التوجهات السياسية.. انا حالياً بناقش وضع إجتماعي للمرأة بغض النظر عن إخوان و لا وطني و لا معارضة و لا أي شيء..

لا حول ولا قوة الا بالله

المشاركة الأصلية كتبت بواسطة magic girl

إحنا لو في مجتمع محترم و البنت عارفة انها هاتروح متأخر محدش هايتعرضلها مكانش هايبقى فيه مشكلة..

احنا لو في مجتمع محترم كان من الواجب الا تضطر المرأه للخروج إلى العمل من الأصل الا في أضيق الحدود

وَلَمَّا وَرَدَ مَاءَ مَدْيَنَ وَجَدَ عَلَيْهِ أُمَّةً مِنَ النَّاسِ يَسْقُونَ وَوَجَدَ مِنْ دُونِهِمُ امْرَأَتَيْنِ تَذُودَانِ ۖ قَالَ مَا خَطْبُكُمَا ۖ قَالَتَا لَا نَسْقِي حَتَّىٰ يُصْدِرَ الرِّعَاءُ ۖ وَأَبُونَا شَيْخٌ كَبِيرٌ (23)


ثالثاً.. بالنسبة للأخوة اللي متضايقيين ان الست تشتغل.. أولاً لو مش عايزها تشتغل يبقى علمتها ليه من الأول؟؟ يعني انا مفروض يطلع عيني 17 سنة في التعليم بالميت عشان اقعد في البيت؟؟

تتعلم لترفع عن نفسها الجهل وتكون زوجة وأم مربية فاضلة على علم وللمرأة أن تتعلم الطب والتمريض أو مايناسب طبيعتها
ولاسيما في الأمراض النسائية ، فتكون طبيبة نسائية ، أو ممرضة نسائية ، حتى لا تضطر النساء للذهاب إلى الأطباء الرجال


، و هيا تقعد متستتة و متهننة تحط في ميك اب و تتفرج على مسلسلات؟؟

لم أسمع من قبل بحديث أو آية في القرآن تقول ان وظيفة الزوجة قاصرة على وضع الميك اب ( الا على سبيل الزينة لزوجها) والفرجة على المسلسلات التي في الأصل تنشر هذه الأفكار

يبقى كده الراجل ملوش حق انه يتكلم مادام مش موفيها حقها في انها تقعد و الحاجة تجيلها لحد عندها..

والمرأه أيضا ليس من حقها الشكوى عندما يفكر الرجل في الزواج مرة أخرى طالما هي لا توفيه حقه


.. بس بما ان الست بقت تصرف على نفسها، فقوامة الراحل المادية بخ..


[color="sienna"القوامة من الأمور التي خص الله بها الرجل دون المرأة ، والمقصود بها أن الزوج أمين عليها يتولى أمرها ، ويصلحها في حالها ويقوم عليها آمراً ناهياً كما يقوم الوالي على رعايتها ، قال تعالى : ( وللرجال عليهن درجة ) وقال سبحانه : ( الرجال قوامون على النساء بما فضل الله بعضهم على بعض وبما أنفقوا من أموالهم ) قال ابن كثير : " أي الرجل قيم على المرأة أي هو رئيسها وكبيرها والحاكم عليها ومؤدبها إذا اعوجت " ، وقال العلامة الشيخ الشنقيطي : " أشار إلى أن الرجل أفضل من المرأة وذلك لأن الذكورة شرف وكمال ، والأنوثة نقص خلقي طبيعي ، والخلق كأنه مجمع على ذلك ؛ لأن الأنثى يجعل لها جميع الناس أروع الزينة و الحلي وذلك إنما هو لجبر النقص الخلقي الطبيعي … ولا عبرة بنوادر النساء لأن النادر لا حكم عليه ".
ومن أسباب القوامة :
1- كمال العقل والتمييز ، قال القرطبي : إن الرجال لهم أفضلية في زيادة العقل والتدبير فجعل لهم حق القيام عليهن لذلك .
2- كمال الدين : لأنّ المرأة تحيض وتنفس فلا تصلي ولا تصوم في هذه الفترة بخلاف الرّجل .
3- بذل المال من الصداق والنفقة فهذا واجب على الرّجل دون المرأة .
ولذلك إذا امتنع الزوج من النفقة على المرأة فلها الفسخ عن طريق القضاء .
والخلاصة أنّ القوامة للرجل كما بيّن القرآن وإن أنفقت عليه وعلى نفسها وعلى أولادها فإنّ يكون من الإحسان كما قال تعالى : ( فإن طبن لكم عن شيء منه نفساً فكلوه هنيئاً مريئاً ) فالقوامة للرجل في جميع الحالات ولا يمكن تصور أن الرجل يستأذنها قبل أن يخرج مثلا . والله تعالى أعلم .
و لمزيد من التوسع في المسألة ينظر : أحكام القرآن لابن العربي (1/531) أحكام الجصاص (2/188) تفسير القرطبي (2/169) تفسير ابن كثير (1/491) ، أضواء البيان للشنقيطي(1/136-137 مهم )
[/color]


الامر الثاني ان مشكلة هذا الجيل أنه يضع احلامه ومتطلباته نصب عينيه ثم يحاول أن يسقط كل ذلك على الدخل أو الراتب الذي يتقاضاه الزوج وبالطبع هذا الدخل المتواضع لا يتناسب مع الأحلام الخيالية. لازم الأولاد يتعلموا في مدارس أجنبية... لازم يدخلوا طب أو هندسة... لازم نسكن في المنطقة الفلانية... لازم عربية ....لازم ....لازم... مع أن الحياة اسهل بكتير من كل هذا التعقيد وربنا يبارك في القليل وتقعد الست في بيتها معززة مكرمة وتترك العمل والهم والزحمة والقرف لزوجها وهي تراعي البيت وتتركه هو في الساقية وتوفر له بقدر الإمكان البيئة المناسبة لتعيينه على الإستمرار. ومستقبل الأولاد لا خوف عليه هو مضمون من عند الله ولا تظن أن اللي متخرج من مدارس اجنبية رزقه أكتر من اللي متخرج من مدرسة حكومية. طالما اديت ماعليك تجاههم بالحلال ثق أن الله سيوفيهم رزقهم كاملا





حاجة كمان.. متضايقيين من ان الست بتنزل مظاهرات


زوجها أو اخوها أو أبوها ينوب عنها لغاية لما يبقى فيه مجتمع محترم وساعتها برضه الموضوع لا يكون بهذه الصورة ممكن فقط تذهب لصندوق انتخابات مثلا وتعد لبيتها مرة اخرى معززة مكرمة




متضايق من الستات أوي؟؟ امك و اختك و مراتك و بنتك دول ايه؟؟ ماهم ستات..

الستات نص المجتمع.. اللي مش فاهم كده يبقى اعمى، و اللي عايز يرجع الستات لعصر الجاهلية، يروح يعيش فيها هوا مع نفسه..

و اللي فاكر ان الستات واخدة حقوقها يبقى واهم، مش عشان شوية جمعيات بتحاول انها تخلي الستات تاخد حقوقها يبقى خلاص كده الستات زي الفل..


ولأنهم أمهاتنا واخواتنا وزوجاتنا وبناتنا وتاج راسنا خايفين عليهم ونريد ان نحافظ عليهن كما وصانا الله ورسوله ولكن يجب أن يقتنعن هن اولا انه لا كرامة ولا عزة ولا إعلاء لشأن المرأه الا بإتباع هذا الدين وما أنزل الله على رسوله وليس بجمعيات ولا أفكار غربية

.

ولا حول ولا قوة الا بالله
نسأل الله تعالى ان يهدينا ويهدي نسائنا ويوفقنا لما فيه حبه و رضاه