الموضوع: بخصوص ماكتبت عن مركز السبع سابقا

السلام عليكم ورحمه الله
كنت كتبت قبل كدة تقرير عن صيانة ال 55 الف كيلو
فالتوبيك ده ك-
http://www.nilemotors.net/Nile/339794-55.html

كان تقرير الصيانة ان السيارة تحتاج تغيير مارش وعلبة دريسكيون تكلفتهم تتجاوز 8 الاف جنيه في الصيانة القادمة
وكنت اتهمت المركز بعدم احترام العميل وصراحتهم بمشاكل السيارة الا بعد إنتهاء فترة الضمان
لان العربية خرجت من الضمان شهر أكتوبر العام الماضي
وقد كشفت عالسيارة في صيانة ال 50 الف كيلو شهر ديسمبر الماضي ولن اقوم الا بتغيير لمبتين فقط
فلماذا لم تقومو بذكر الاعطال التى ذكرتموها من تغيير مارش وعلبة دريكسيون سابقا فيفترة الضمان . خاصة بإن م الصيانة قاللي ان حالتهم منتهية . فأكيد كان في بوادر للعطل
وكنت سجلت شكوى مرتين عن هذا الموضوع في قسم الشكاوي تليفونيا .

وبالصدفة الشديدة جدااااااااااااااا كنت في المعادي بالقرب من زهراء المعادي
قولت اروح اشوف الموضوع وانا محبط وحاسس ان ذهابي زي عدمه
طلعت قسم الشكاوى وقابلت المهندس المحترم مدير الصيانة م محمد عمر
وهو بصراحة شديدة راجل زوق جدا فتعامله زي كل مهندسو السبع
قولتله انا عضو في قسم نيسان منتدى نايل موتورز اول كلمه قالهالي تبع أحمد مصطفى هههههههههههه
ايه ياعم أحمد انت مافيش مكان فمصر سايبه
قولتله بالظبط كده قاللي بقالي فترة مشوفتهوش من أيام التيدا قولتله ماهو لسه برضه معاه
قولتله أ أحمد مصطفى عرض عليا انه يكلم حد فالسبع بخصوص الموضوع ده وانا أكتفيت بتسجيل الشكوى .
قولتله على المشكلة بالكامل وان كلنا فالمنتدى بندعم نيسان بمراكز الصيانة والمبيعات
بعد ماشاف الرخصة وتواريخ الصيانات والضمان وكدة وأكد كلامي بإن لازم بيكون في بوادر أعطال قبلها ومبيحصلش فشهر ولا شهرين وخصوصا لو علبة دريكسيون وكذلك المارش
قاللي بالحرف أكيد إنت مقعدتش تدور العربية وقارص عالاخر عشان تبوظه .
قاللي ان حتى بعد إنتهاء فترة الضمان في موافقات بياخدوها من نيسان عن بعض قطع الغيار
وخصوصا لو العميل مواظب على الصيانات بالكامل في المراكز المعتمدة
حاجة كدة خاصة بالجودة
الراجل اخد المفاتيح وطلب مهندس شاطر يبص على العربية بنفسه
فالمهندس جه وقاله من غير مابص هي محتاجة علبة دريكسيون وانه كان متابعها الصيانة اللي فاتت
أما بخصوص المارش فقالي هتبيت العربية يوم عشان بنبعت نخرط المارش ونظبطله جلب ولازم نجرب بعد كده وإحتمال تسييبلنا العربية والتكلفة حاجه بسيطة تقريبا 250 جنيه
قولتله مافيش مشاكل
المهم م محمد عمر وصاهم على علبة دريكسيون للعربية مجانا والمفروض انها مش موجودة واول ماتيجي هيكلموني عشان يغيروها .
هذا ما حدث
طبعا انا لست على يقين 100 % انها هتتغير او وقت توفرها ولكن أحسبهم على خير ولا أزكي على الله أحدا .
دي شهادة قولتها لما قد حدث بالظبط . لكي لا أكون قد جنيت على أحد او إتهمته بالباطل .
وملخص التجربة
اي عضو عنده مشكلة مع مركز الصيانة يصعد صوته أد مايقدر ولا يقصر الموضوع على أفراد خدمة العملاء فقط لانهم غالبا بيقصّرو في شغلهم ومش بيهتمو بالمشاكل .
والسلام ختااااااااااام