لا انا بصراحة ما فهمتش حاجة
انت عامل high light علي كام جملة وكام رقم
لو حضرتك تقصد ان ال94 ثمنها بيكسر ال30 وبتوصل ل33 او مايزيد
فدة لعدة اسباب
اولا العربية بيقول كاملة + سليمة + دواخل فبريكة + محرك 1600 بتاع عربية 99
طب ما لازم تكسر ال30 - هي كدة فرقت ايه عن موديل 99 ؟؟؟؟
الأبيزا والألماني بوجه عام بتتكلم في حالة اكتر ما بتتكلم في موديل - هو انا بشتري عربية سوقي كوري ولا ياباني ؟؟؟
لو 94 وحالتها نظيفة ومكنتها بتاعة موديل اعلي ممكن تتكلم زيك زي ال99 بالمكنة الأستوك
لكن لو 94 بمكنتها الأستوك ومتركبلها تكييف بلدي ومتفصلها قاعدة للباور والتكييف وشغل بلدي - يبقي مش هتزيد عن 27 - 28 تحت اي حال من الأحوال
يعني هديلك مثال
عربية زي عربيتي - 99 محرك 1.4 mpi تكييف فبريكة + بارو فبركية + 4 زجاج + مرايات + ايموبلايزر + نور صالون وشنطة + انذار وسنتر هوا فبريكة + جنوط وطاسات الفبريكة 13"
لو سليمة هطلب فيها 39 مستريح اوي
لكن علي حالتها هطلب 30 علي استحياء
تعال لعربية زي بتاعة احد الأعضاء بدون ذكر اسماء
موديل 98 بمحرك 1.6 mpi 16v + تكييف اورجينال + باور أورجينال + 2 زجاج + مرايات + ايموبلايزر + جنوط 16"
تجيب علي حالتها 36 - 38 مستريح
وتعال لعربية 99 استوك وكاملة
تجيب لو سليمة 35 بالعافية
خلي بالك من كلمة فبريكة واورجينال لأنها تفرق كتيرررررر اوي
وخلي بالك من استوك ومتسقط
احياناً الأستوك يميزها واحيانا اخري يعيبها واحياناً المتسقط يميزها واحياناً يعيبها
امتي الأستوك يميزها ؟؟؟ لو حالته كويسة زي عربية بردو احد الأعضاء بايعها فاضية بموتور استوك ب27
وامتي يعيبها ؟؟؟ لو حالته تعبانة وملعوب في الضفيرة وحالتها بالبلا
وامتي التسقيط يميزها ؟؟؟ لو متسقط مكنة معروفة وليها قطع غيار ومتعدلة صح من عفشة لفرامل لفتيس لكنترول لضفيرة وكله شغل أورجينال ونظيف
وامتي المتسقط يعيبها ؟؟؟ لو متسقط مكنة سي سي عالي ومالوش قطع غيار وملعوب في الضفيرة والكنترول ومش ولا بد
فهمت قصدي يا استاذ حسام ؟؟؟
العربيات دي مش بالموديل - بالحالة ثم الحالة ثم الحالة
العربيات دي لو سليمة - هتسقطلها مكنة وتجيب داغها وترجع تسقطلها تاني وتالت ورابع وتعدل وترجعها استوك وتعدلها وترشها وتلونها وتجنطها وترجعها علي ابوها تاني
طالما سليمة طالما سليمة طالما سليمة اعمل اللي انت عايزه فيها وهترجعها تاني علي ابوها او تبيعها علي حالها
اهم حاجة تكون فاهمها وعارف انت بتعمل ايه
احد الأعضاء هنا بدون ذكر اسماء بردو جاب 94 تعتبر شاسيه وصاج فقط
وهو عملها علي ايده من الألف الي الياء وبسم الله ما شاء الله عليها - يطلب فيها 28 - 30 مستريح لكونها فاضية بدون تكييف او باور او زجاج
تحياتي
والله المستعان
،
،
المفضلات