الموضوع: تقرير عن ال bmw 316- f30

السلام عليكم جميعا
الحمد لله و الصلاة و السلام علي رسول الله
بفضل الله حجزت و استلمت ال 316 من حوالي اسبوع تقريبا
و اسف علي التاخير بس كنت بحضر التقرير و اهو اخد علي العربية اكتر

و القصه ابتدات كالاتي
طبعا اغلبكم يعرف ان معايا باجيرو اللي للاسف بتاخد بنزين 95
و بعد ما حكومتنا المجيدة غلته و بحكم مشواري كل يوم بقيت بستهلك بنزين ب 1400 جنية تقريبا اسبوعيا و ده خراب بيوت مستعجل و طبعا غصب عني حولت لل 92 لغاية لما اشوف حل
و مع الاخبار و الاشاعات عن موضوع الكوبونات و الدعم لل92 كان لازم اتصرف و كان الحل اني اجيب عربية اصغر
و وقع اختياري علي الفلوينس بحكم انها مع اختي و مجربها و عجباني و لما اختي عرفت عرضت عليا اخد عربياتها لانها مستكبراها و عايزه تجيب حاجه اصغر و قد كان و اخدت منها الفلوينس و ابتدت رحله البحث عن سياره صغيره
لكن تاتي الرياح بما لا تشتهي السفن و العربيات غليت بشكل متخلف و مبالغ فيه و بقي المبلغ اللي هدفعه لاختي مقابل الفلوينس ميجبش عربية عدله لذا انا من نفسي رجعتلها عربياتها و بدات ادور علي عربية جديده بالفعل
و في مره الحوار اتفتح قدام مدير البنك اللي والدي بيتعامل معاه و عرض عليا اخد قرض و اقنعني و انا قلت بما ان الموضوع دخل في كده اجيب عربية كويسه و وقع اختيار علي ال 316
رحت شفتها في التوكيل و عملت ليها تست دريف و العربية عجبتني جدا و اكتر بكتير من المرسيدس ال c180 خياري التاني و اللي مجربها بالفعل بحكم انها مع حمايا و شريكي و ابن خالتي و اتكلت علي الله و حجزتها
و الدفعة لسه واصله من اسبوعين تقريبا و طبعا محجوزة بالكامل هي و الدفعة الجايه اللي المفروض تدخل اخر الشهر و المندوب كلمني عشان اخلص الاجراءات و قد كان و خلصت اجراءات القرض و استلمت العربية و كان اختياري للفئة ال exclusive باللون الابيض و دواخل سوداء

نيجي بقي للعربية

1- الشكل الخارجي:
العربية ما شاء الله شكلها رياضي بحت بالكابوت الطويل و الشنطه القصيره و الواجهة هجوميه جدا و لايقه علي الخلفيه الرياضيه و طبعا ارتفاع متوسط عن الارض اللي و للاسف يعتبر احد عيوبها لعدم ملائمتها لطرقنا الجميله

2- الانتريور:
الانتريور طبعا ماشي مع ستايل bmw المعروف بال idrive في منتصف الطابلون و المساحه الخلفيه كويسه جدا و اوسع من ال c180 بفرق ملحوظ و اقل من الفلوينس و خصوصا ان وضعيه الجلوس في العربية بشكل عام واطيه
الجلد اللي نازل فيها مش طبيعي للاسف و مش عاجبني قوي لكنه موفي بالغرض و الكراسي مريحه و بتوفر دعم كويس للجسم


3- المحرك:
زي ما انتم عارفين العربية 1600 سي سي مع تيربو بقوه 136 حصان و عزم 220 نيوتن عند 1350 دورة
و علي ارض الواقع بقي المتور ما شاء الله حاجه روعة و رغم ان الباجيرو 6 سلندر و 3800 سي سي و 250 حصان لكن شتان صراحه و التيربو عامل شغل جااااامد و احسن حاجه انها بتاخد بنزين من 91-98
طبعا ان ماسك نفسي بالعافيه لان حسب الكتالوج اول 2000 كيلو مقدرش اعدي 4500 دورة للمحرك او 130 كيلو
و علي الرغم من انها المفروض اضعف من ال c180 لكنها بتديني ايحاء انها مش كده مش عارف ازاي
و طبعا اكتر حاجه عجباني استهلاك البنزين العربية اقتصادية جدا و لله الحمد خصوصا مع وضع ال eco pro

4- القيادة:
البي ام غنيه عن التعريف
العربية سواقتها ممتعة و رياضيه و الدريكسيون دقيق و يخليك تحس ان العربية حته واحده متصله
و طبعا الدفع الخلفي بديك امكانية اللعب بيها بس طبعا ده مش هيحصل باذن الله
شخصيا شايف انها احسن من ال c180 اللي بتركز علي الراحه اكتر من الاداء الرياضي
و من المميزات فيها ان في 3 اوضاع قياده eco pro, normal , sport حسب متطلباتك في السواقة

5- الكماليات و وسائل الامان:
طبعا كعادة الالماني عموما التركيز مش بيكون علي الكماليات زي ما هو علي وسائل الامان
يعني ككماليات مفيش الا ال idrive و الحساسات الخلفيه و الجلد و الفوجات و المرايات الضم
ده طبعا بخلاف الاساسيات زي الازاز الكهرباء و التكيف
اما بقي وسائل الامان فحدث و لا حرج Dynamic Stability Control (DSC) Anti-lock Braking System (ABS), Dynamic Traction Control (DTC), Cornering Brake Control (CBC) and Adaptive Brake Assistant
ده طبعا غير الايرباج اللي مش فاكر عددهم بس مش اقل من 8 تقريبا

اما من ناحية العيوب فالحمد لله هما مش كتير

*اهمهم ارتفاع العربية عن الارض اللي مش عالي قوي بالاضافه ان العربية القعدة فيها واطيه وده بيزود الايحاء بكده

*تاني حاجه و ده اللي مضايقني شويه هو ان العربية مش متوفره بالزنون و لا الستاير الخلفيه او الفاميه
انا شخصيا بقالي حوالي 6 سنين بسوق عربيات مجهزة بالزنون و اعودت عليه جدا و الهالوجين بالنسبه ليا ملوش لازمة و للاسف في التوكيل قالي صعب اركبلها زنون من اصله لان الفوانيس الاصلي بتاعتها مش هتركب لاختلاف الضفيره و فيشة الفانوس ده غير ان سعره معدي و أي زنون after market هيدي error
و الستاير و الفاميه بقوا ضروري في الجو بتاعنا و خصوصا ان الانتريور اسود

* تالت حاجه و دي بصراحة غيظاني قوي ان العربية جت من غير الدواسات الاصلي بتاعتها و كمان مش موجوده في التوكيل بحجه ان بسبب اليورو سعرها بقي غالي و محدش هيشتريها و بصراحه انا شايف دي دناوه من التوكيل لان عيب عربية بالسعر ده و يشيلوا حاجه هبله زي كده
انا ان شاء الله هجيبهم من بره لان العاديه اللي جبتها مش لايقه لان البي ام الدواسه بتبقي مثبته في الارض مش معلقه و ده بيخلي الدواسه تضايق الواحد و هو سايق

*و اخيرا عدم توفرها بفتحات تكيف للمقاعد الخلفيه مع انها موجوده في ال 320

ده كده بشكل عام انطباعي المبدائي عن العربية و البقية تاتي ان شاء الله

و دعواتكم ليا لان للاسف ملحقتش اتهنا بيها
يوم ما استلمتها سواق تاكسي الله يجحمة حك لي الاكصدام من ورا و جري
و يوم ما رخصتها و مع اني مسبتش حد في المرور الا و راضيته لكن و انا طالع شاب ظريف بلانسر راح لابس فيا من ورا بهدله ليا منه لله

طبعا انا خدتها من قاصرها و دبحت عليها و ربنا يستر

و ده شويه صور للعربيه بس مش بتاعتي
دي الفئة ال sport اللي كنت عملتلها تست دريف و بتفرق بشكل اساسي في الجنط و الاكصدامات
و الحمرا دي هي ال exclusive زي عربيتي