بالنسبة لتسقيط ماتور اللانسر
تمن ما تور اللانسر كان في حدود 4 آلاف جنية
دلوقتي سعرة وصل 9 آلاف جنية بسبب الاقبال عليه

بعدين التاكسي اللي بيغير الماتور ده بيكون اقل حاجة ماشي 250 الف كيلو ( ربع مليون كيلو )
انا لسة شايف تكسي عند المتحدة ماشي 195 الف وماتوره اسبيرانزا عادي

وسالت استاذ محمود حسين مدير مركز المتحدة : اكتر عربية اسبيرانزا جاتلك كانت ماشية اد ايه

تخيل كده قالي كام .......... 400 الف كيلو

قلته غيرت ماتور ........... قالي لا
قلته غيرت وش سلندر ......... قالي لا

قالي بتعمل الصيانة العادية بس مش اكتر من كده ( زيت وفلاتر وسير كتينة )

انا كنت قريت قبل كده موضوع ان العربية بيبقى عمرها الافتراضي وهي طالعة من المصنع 300 الف كيلو

لما نيجي بقى نتكلم عن عربية صيني وكمان تقفيل مصري وشركة جديدة في السوء( شركة شيري ) ومنافسة قوية وسعر قليل
وصيانة وقطع غيار رخيصة ( وكمان في قطع غيار مضروبة كتير , ومعظم الناس مش بتحط قطع الغيار الاصلية ولا البديل الياباني في بعض الظروف وبتحط ارخص قطعة بتلاقيها في السوق ) ........ يعني خلي عمر الاسبيرانزا الافتراضي 200 الف كيلو الى 250 الف

انت لو بتشوف الناس اللي معاها عربيات الماني بيحافظوا عليها ازاي والصيانة في معادها ولازم في التوكيل ولازم القطع الاصلية والمطب يتاخد بالراحة ....... ولو فيه ونه في اي حاجة جري على التوكيل ... وتدفع فلوس كتير ....... وتقولي اصل الالماني عمره الافتراضي طويل ........ طيب اصرف على عربية صيني ربع اللي بيتصرف على ارخص عربية الماني ( سكودا مثلا ) وبعد كده قول العربية بتعيش ولا لا

قرايبي عملوا صيانة لعربية باسات 2008 وكانت صيانة 60 الف دفعوا فيها 3800 ج .........
شوية فلاتر وزيت فتيس وزيت مكنة ويمكن تيل الفرامل ...........

انا مش بقول ان العربيات الالماني وحشة ...... لكن ك كوست بينيفت بتبقى مكلفة جدا وخصوصا الفولكس

كنت قريت مقال ان احسن العربيات اعتمادية كانت 5 شركات ياباني في المقدمة وبعديها الشركات الكوري
والمرسيدس حصدت المرتبة 23 وآخر حاجة كانت رنج روفر في المرتبة 35

الدراسة كانت تمت على استخدم السيارة لمدة سنة كاملة ويشوفوا العربية هتحتاج ايه كان المركز الاول هوندا وبعده تويوتا وبعده تقريبا سوبارو ثم ميتسوبيشي ثم ديهاتسو ثم مازدا .... ثم هيونداي ثم كيا

من الآخر لو معاك فلوس تجيب لانسر ........ هات لانسر وماتجبش اسبيرانزا ...... وده مش معناه ان الاسبيرانزا وحش ( انا شخصيا بحب الاسبيرانز عن الانسر .... لاني مش بحب العربيات الصغيرة )
ماتروحش تجيب اسبيرانزا وبعد كده تقول اصله الانسر احسن .........

هيبقى فيه سؤال مهم انت اشتريت الاسبيرانزا ليه ؟؟؟؟؟؟؟؟؟؟؟؟

اكيد علشان هي ارخص من الانسر وفيها كتير من امكانتها .......

(( واوعى تنسى : ما ينفعش اقارن عربية ب 70 الف بعربية ب 120 الف ..... دي مقارنة مش عادلة ))

وربنا يوفقك وتجيب حاجة كويسة

وآسف للاطالة