الضـــرائب

**Egyzizo** · 25-03-2013 10:14 AM

كثر الحديث مؤخراً عن قضية شهيرة بمديونية احدى الشركات الكبرى للضرائب ودار الجدل حول مدى قانونية هذه المديونية ما بين من هو مقتنع بأن موقف هذه الشركة قانونى وسليم ، والآخرين من يتهمونها بالتهرب من الضرائب.

بغض النظر عن القضية أعلاه .. قعدت أفكر فى ثقافة الضرائب عندنا وشعرت بغصة فى حلقى حين تأملت في من هم حولى فوجدت أن جميع من لديه عمل حر فى المجتمع الصغير حولى بدون استثناء لا يدفعون الضرائب المقررة عليهم كما ينبغى ويمكن وصمهم بالمتهربين، محل البقالة تحت البيت ، طبيب الأسنان ، الصيدلية على أول الشارع ، عيادات الأطباء البشريين .. إلخ ..

أظن أن هذا هو حال جل المجتمع المصرى وخاصة المشروعات الصغيرة؟

ما رأيكم؟

رجاء المشاركة فى الاستطلاع وتطبيقه ضمنياً على مشروعك أو على المكان الذى تعمل
وما هى المبررات التى تراها لعدم دفع الضرائب بالنسبة التى يحددها القانون؟

**shaddadfalcon1** · 25-03-2013 02:02 PM

طبعا لو قصدك علي سويرس فهو معروف

بس بالنسبه للضرائب فهي حق للدوله عشان تطور بيها خدمات للناس بس ده مش بيحصل ومفيش حاجه بتتطور وبالتالي الناس بتتهرب لان الدنيا زي الزفت والواحد بيطلع عينه عشان يلاقي القرش فمش بيهون عليه يروح يدي الفلوس للحكومه وهو عارف انها هتتسرق

ده غير اننا بندفع الضرايب مليون مره

يعني الحاجه وهي جايه من بره بتدفع عليها ضرايب ولما تشتريها تدفع عليها ضرايب تاني ولما تبيعها اللي هيشتريها بيدفع عليها ضرايب وهكذا يعني طول ماهي ماشيه مع المستهلك بتلم ضرايب

في كندا مثلا المستهلك هو اللي بيدفع الضريبه وبيبقي اسمها gts & pst ولو انت مش من ساكني البلد بتدفعها برضه بس وانت طالع في المطار لو معاك الفواتير بتسترد قيمة الضرايب اللي انت دفعتها لانك خلاص مش ساكن فيها وبالتالي ميصحش تدفع حاجه انت مش هتاخد بيها اي خدمه

بس طبعا ضرايب محترمه

يعني مثلا تشتري سندوتش ب 10 دولار تدفع عليها 1.5 دولار ضرايب

مرتبك مثلا من شخص عايش هناك بيدفع 3000 الاف دولار ثابت كل شهر بس في المقابل كل حاجه حلوه وتحس ان فلوسك بترجعلك

**S O P H O S** · 25-03-2013 02:46 PM

زمان كان تهرب
دلوقتي منقدرش نقيم لان القانون العام بين الناس بيطبق كل فين وفين
وده حق يومي ما بالنا بضرائب هتكون وضعها ايه ؟!

**Egyzizo** · 25-03-2013 09:46 PM

شكراً لكم
أرجو إضافة المزيد من الآراء

**MaZaGAngeE** · 26-03-2013 02:15 AM

بحكم عملي في القطاع الخاص
الشركات الصغيرة ليها حق في التهرب الضريبي لان اي ورفة بيدفع فيها رشاوي كتيرة و كمان البيروقراطبة بلا نهاية لدرجة ان بعض الصفقات المهمة ضاعت على الشركة بسبب اجراءات ورقية مالهاش اي معنى او لازمة

طبعا التهرب غلط ............. لكن الدولة السبب

**Egyzizo** · 26-03-2013 05:14 AM

فيه مستشفى خيرى أعرفه
بيشتغل تقريباً لوجه الله
خيرى بمعنى خيرى يعنى ، بياخد أجر من المريض القادر علشان يعالج المريض غير القادر ويدفع مرتبات العاملين فيه, بدون النظر إلى تحقيق أرباح خالص

حتى المكان ده اللى المفروض ان إدارته بتراعى ربنا، لقيته مش بيدفع ضرائب كما ينبغى

فعلاً ، نظرة المصريين للضرائب انها جباية غير مستحقة من الدولة ، يعنى خسارة فيهم.

**Imhotep** · 26-03-2013 10:41 PM

موضوعك انضاف له جديد. . . هى الحكومة برضة مش الضمير قاتلها و المفروض بتدور على كل قرش ضرايب عشان البلد محتاجة؟ طب اشمعنا فى صفقة بيع سوسيتيه جنرال اعفت البائع و المشترى الرئيسيين من الضرايب أللى حجم نسبتهم من الصفقة 70% و قررت تحملها على صغار المساهمين بس. . . و لا اااه . . . اصل الصفقة فيها كلمة السر اللى من 3 حروف. . . ق ط ر. . . مفقوسة قوى
[url=http://www1.youm7.com/News.asp?NewsID=993921&SecID=297&IssueID=0]

**3mr Farrag** · 26-03-2013 11:08 PM

الضرايب المفروض اي حد يدفعها للدوله
تتلخص في كلمه واحده انها
اتااااااااااااااااااوا

اقرأ الموضوع ده يمكن يفيدك
http://www.nilemotors.net/Nile/26492-a.html

**أبو صلاح** · 27-03-2013 02:20 AM

والشركات الكبيرة برضه فيها تهرب ضريبي
اسال اي محاسب عن الموضوع ده
معظم الشركات بقى فيها ادارة حسابات مستقلة للضرائب تكون تحت اشراف المدير المالي والمحاسب القانوني
انا كنت في شركة عبارة عن 4 مصانع و18 فرع بيع كان نشاطها ملابس
كانوا عاملين ادارة لحسبات الضرائب كان بيتصرف عليها مرتبات مالايقل عن 15 الف جنيه شهريا
ده كان في 2007
سمعت حاليا من احد الزملاء انهم وصلوا لاكتر من ضعف عدد الموظفين بسبب التوسعات اللي عملوها للمجموعة
طبعا مش عايز اذكر المبالغ التي بيتم اخفائها عن الضرائب كام
والله ملايين الجنيهات سنويا
سواء من ضرائب المبيعات لضرائب الخصم لضرائب الدخل للتأمينات

ودي شركة من الاف الشركات اللي بتعمل اكتر من كده

امال مكاتب المحاسبين القانونونيين اللي في البلد دي كلها تشتغل ايه؟