بسم الله الرحمن الرحيم
الاعتذار واجب عن اسلوبى الساخر فى الموضوع القديم وعن اى مضايقة سببتها لاى شخص فى اتو ايجيبت او عضو فى المنتدى واتمنى انكم تقدروا تاثير تعب اليوم عليا ومحاولة نسيان عدم رضائى عن ماتم فى السيارة
نبداء تانى بسم الله :-
حجزت صيانة الالف فى اتو ايجيبت يوم الخميس 28/3/2013 الساعة 10 صباحا وعشان دى اول مرة توهت جامد واتو ايجيبت كلمونى فاكرينى لغيت الميعاد وقلتلهم انى تاية فى السكة ووصفولى ووصلت الحمد لله الساعة 11 بالظبط .
كمية الناس هناك كتير جدااا خدت رقمى واستنيت المهم استقبلتنى مهندسة الساعة 12.30 بعد الترحيب بيا وتقديم الرخصة والضمان قلت ملاحظاتى وكانت كالاتى :-
1- تقل مع سماع صوت فى الدركسيون وعلقت على كدة انة لما كان بيحصل كدة معايا فى عربيتى القديمة معناة ان زيت الباور فضى .
2- رعشة فى العربية بعد سرعة 80
3- سويتش الباب بيعلق
4- حزام الامان مش بيرجع لوحدة على طول يعنى لازم اظبطة بايدى كدة عشان يدخل مكانة وممكن ازقة ساعات .
5- عند ضغط الفرملة واثناء التكيف ماهو شغال الار بى ام يكاد يوصل للصفر وبحس ان العربية هتبطل لكن مابيحصلش.
6- صوت الكلاكس بيعلى ويوطى لما اضغط علية مستمر لمدة 10 ثوانى او اقل كمان (يعنى لما حد يرمى عليك وتضطر تزمر كتير الكلاكس بيعلى ويوطى )
7- عفشة العربية ناشفة
8- استهلاك البنزين عالى جدااا بتعمل 150 بالعافية او بوهم نفسى انها بتعمل 150
9-نتشة الفتيس
فى حاجات المهندسة ردت عليا فيها وقتى زى نتشة الفتيس ودة طبيعى قلتلها انى قريت ادوس فرملة واجيب n وارفع هاند بريك وبعدين اجيب P بس الترتيب الى مش عارف اظبطة اوى يعنى (كما قرائت فى المنتدى هنا ) المهم ردها عليا ان دة طبيعى ولازم يحصل فقلت اوك ابقى اسئل حد هنا واحدة واحدة تانى او لما اقابلكم ان شاء الله قريبا
وردت كمان على ان العفشة ناشفة ان كل نيسان عفشتها كدة وسئلتنى بتقارنها باية قلت نقول النترا قالتلى ماتقارنش بينها وبين الكورى قلت اوك ..وردت عليا فى نقطة الدركسيون انهم كدة كدة بيشوفوا كل السوائل ومن ضمنها زيت الباور قلتلها ماشى ..وبنزين العربية لا يتم تحديدة فى وسط البلد لكن على سرعة 60 الى 90 فى طريق طوالى والعربية دى بتعمل من 200 الى 220 فى الصفيحة ....ولما قلت عن حزام الامان قلتلى نشوفوا برة بقى وطلعنا فعلا بصت على العربية وقلتلها الحزام قالتلى هما هيشوفوا جوة مع زرار السويتش طلبت منها غسيل السيارة قالتى معتقدتش هيبقى فى وقت انت عربيتك هتخلص 5.30 والمغسلة هتقفل 5 قلتلها اتمنى نلحق قالتلى لو خرجت بدرى هنغسلها ...............وجة وقت الانتظار .....اول تحرك للعبية كان 1.30 يمكن او 2 شوفتها دخلت الورشة وسيبتها بقى وعيشت انا حياتى ......الساعة 3.20 دقيقة لقيت عربيتى واقفة برة وعلى الشاشة مكتوب فى اتظار الغسيل سيبتها وصليت ورجعت على 4.30 وهى واقفة مكانها دخلت للمهندسة افهم العربية واقفة لية قالتلى هسلمهالك لحظة واحدة .........مرحلة الاستلام......
احنا يافندم غيرنا الزيت والفلتر مجاناا وبالنسبة للمشاكل الى حضرتك ذكرتها
1- تقل مع سماع صوت فى الدركسيون وعلقت على كدة انة لما كان بيحصل كدة معايا فى عربيتى القديمة معناة ان زيت الباور فضى .احنا راجعنا على كل السوائل والدركسيون تمام ........انا سئلت الناس قالولى كل العربيات بتعمل الصوت دة لانك بتتغط على علبة الدركسيون والباور فقلت اوك
2- رعشة فى العربية بعد سرعة 80 قالتلى تم ترصيص العجل وان شاء الله المشكلة هتنتهى معاك ..وفعلا الحمد لله العربية بقت زى الفل
3- سويتش الباب بيعلق ..قالتلى انة ملقناش عيب وتم تنضيفة يمكن تتحل المشكلة ..انا قلت علق معايا مرة فسيبك منة مش مهم اوى عادى يعنى
4- حزام الامان مش بيرجع لوحدة على طول يعنى لازم اظبطة بايدى كدة عشان يدخل مكانة وممكن ازقة ساعات . معلقتش علية اصلا وانا نسيت لانى كنت كاتبة فى الورقة بتاعتى لكن لما استلمت استلمت من الورقى الى هى كاتباها وهى مكتبتش دة فى الورقة بتاعة ام رالشغل بتاعتهم
5- عند ضغط الفرملة واثناء التكيف ماهو شغال الار بى ام يكاد يوصل للصفر وبحس ان العربية هتبطل لكن مابيحصلش. قالتلى احنا موصلناش للمشكلة دى بس عموما حطينا العربية على جهاز مش فاكر اية واتاكدنا من ظبطها وعدنا علية... فقلت ماشى
6- صوت الكلاكس بيعلى ويوطى لما اضغط علية مستمر لمدة 10 ثوانى او اقل كمان (يعنى لما حد يرمى عليك وتضطر تزمر كتير الكلاكس بيعلى ويوطى ) كان رد المهندسة ان جربو الكلاكس ولقوة شغال وانا رديت وقلت انا كنت سامعهم وهما بيجربوة وكنت عايز اقولهم يطولو شوية فى الدوسة هما بيدوسو دوسة صغيرة وهى بتبان فى الضغطة الطويلة فالمهندسة بصيطلى كدة الى هو عايز اية طيب تحب نرجعها انا قلت خلاص مش مشكلة المرة الجية
(7- عفشة العربية ناشفة
8- استهلاك البنزين عالى جدااا بتعمل 150 بالعافية او بوهم نفسى انها بتعمل 150
9-نتشة الفتيس ) تم الرد عليهم سابقا ان دة حال العربية عموما
خدت كبونات الخصم والضمان وباركتلى على العربية واديتنى اذن خروج وشكرتهم على حسن المعاملة ...لقيت العربية واقفة برة مكانها من 3.20 لحد 4.45 لما طلعت وخدتها لقيت فى شحم برة العربية كدة فقلت عادى هطلع على بنزينة اغسلها ركبت العربية لقيت الدرج مفتوح بتاع الطابلوة حطيت الضمان لقيت ايدى بتخبط فى حاجة جوة بصيت لقيت حاجة مدلدلة كدة قفلت باب العربية عليا وانا مخنؤ لقيت المكان دة مفرق بين المسند او دراع الباب والباب نفسة وكانت قشاية قطمت ضهر البعير دخلت قلت للمهندسة لحظة من فضلك قالتلى تحت امرك وخرجت معايا قلتلها على درج الطابلوة قالتلى عادى يافندم وقفلت باب جوة مكان الفلتر وقفلت الدرج وسئلتها الدرج بقى ناعم لية كدة كان اتقل من كدة قالتلى دة طبيعى لما نضف بس بقى افضل وقصة الباب حضرتك اتفضل ارتاح جوة وندهت حد خد العربية دخلها كنت فتحت الكابوت ولقيت زيت جوة طلبت انهم يمسحوة عشان البوية المهم خدها ودخل جوة ..لسة المهندسة بتقعد عربيتى رجعت تانى وانا ادمها وحد بيقولها حاجة وهو بيبصلى اتنرفزت ويعنى اية الكلام دة كنت سمعت ان فى حد مش عايز يشتغل فيها او قال هى كدة المهم طلعت وقفت برة وجبت منديل عشان العربية اكيد محدش مسحلها حاجة المهندسة قالتلى انا لسة مسلمتكش على فكرة قلتلها همسح بس الزيت بس لقيتة اتمسح لقيت المهندسة رجعت من الورشة وبتكلم حد جنب العربية وبعد مناقشات بينهم 5دقايق كدة جت بتقولى ان العربيات كلها كدة حتى بص العربية دى وفتحتلى عربية قلتلها بصى انا متاكد ان عربيتى مدخلتش كدة قالتلى محدش اصلا جة جنبها والا فكها قلتلها امال السويتش بتاع الكهربا نضف ازاى قالتلى لاء احنااااااااااااااا مفكنهوش قلتلها ياباشمهندسة هتمسكونى من هنا همسكم من هنا اتفتح ونضف يبقى الى قفل قفل غلط ماتفتحش يبقى نضفوا واقفلو المكان صح قالتلى هى مش مين يمسك مين على العموم ماشى بس حضرتك هتقعد معانا لـ 5.30 قلتلها اوك ودخلت لحد الساعة 5.20 محدش جة جنب العربية المهندسة خرجت لقيتنى انا والعربية واقفين جنب بعض ندهت حد وقالتلة دخلها جوة لو سمحت العربية دخلت وخرجت 5.30 احسن من الاول مش زى الاول اوى بس تمام الى جابها قالى بص كدة ياباشا لانى كنت واقف برة قالى كدة اخرها مافيش بعد كدة قلتلة مفتاحها فيها قالى اة دخلت للمهندسة قلتلها شكراااا انا هاخد العربية وامشى فين الرخصة لو سمحتى قالتلى مبروك على العربية الرخصة يافندم فى الدرج الى فوق الكاسيت خدت العربية ومشيت.
امبارح وانا ماشى بيها وقلت اجرب واشوف حسيت ان العربية بقت مش زى الاول يعنى كنت لما بجرى واسيب رجلى من البنزين الاربى ام بيهدى وهى على سرعتها دلوقتى لاء بحسها بتقفش فى نفسها شوية قلت ما علينا يمكن اكون لسة مش متعود او طبيعى او هسئلكم يعنى اشوف القصة اية واحدة واحدة ...قلت اجرب التكيف يمكن يكون اتحل الصراحة ملقتش العيب دة لكن لقيت حاجة تانية الشرطة بتاعة الصفر فى فوقها شرطة المؤشربتاع الار بى ام عليها وعند دخول التكيف بتنزل بين الصفر والشرطة الى فوقها دى ولما بدوس فرامل اثناء التكيف ما بيشتغل بحس ان العربية بتجيب الـn بمعنى الفرملة بتنزل اكتر انت عارف احساس الفرملة فى الـn مختلف عن احساسها فى الـd و الاربى ام بيعلى وبيوصل شرطتين كاملين اكنة على الـn اول ما بسيب رجلى من الفرملة بسمع صوت العربية اكنها جابت d بيبقى ليها صوت كدة معروف بسمعة والاربى ام بيوطى تانى عشان العربية هتمشى طبعا هى بتقعد ثانيتين كدة مابتتحركش لانها لسة بتنقل لوحدها من n الى d مش فاهمها يعنى تحسها اتلغبطت وبكدة تم بحمد الله صيانة الالف واختفاء مشاكل وثبات مشاكل وظهور مشاكل