الموضوع: كونتاك الريجاتا والفرق بين المضروب والاصلي

السلام عليكم ورحمة الله ..

الكونتاك عندي الفبرة بتاعتة باظت وكانت صيني وقعدت سنة لذلك لا حرج عليها
ولانى بحب العربية تكون زي ما الكتاب بيقول فقلت اغير كونتاك كامل واريح دماغي
وهنا بدءت قصة البحث اللى استمرت 3 ايام لحد ما تقريبا التجار حفظوني .. " مش انت اللى عديت
السبت اللى فات ومعاك عربية زرقا ؟ " اة انا يعم الحج اجري ولا اية

اسعار الكونتاك بالفبرة :
افضل سعر لقيتة 350 ج وسمعت ارقام عجيبة 500 و 700 !! لية يعم الحج هو احنا كفرة
جبتة ف النهاية بـ 300 ج بعد معناة وبحث ورغم انة مكنش عايز ينزل مليم احمر لما قالى 350 ح
الا اني رحت قلت لة انت قايلي يوم السبت اللى فات 300 متنزل منهم يعم قالى لا والله ما ينفع وانا مبغيرش كلمتى
لقيت ب 200 ج بس بدون مفتاح وبدون فبرة وبدون مسامير وبدون كونتاك اساسا !!
ولقيت ب 250 ولقيتة صيني ومرشوش اسبراي فضي وضربينة شحم ال يعنى نضيف زيرو انصحك
متجبهوش لانك هترجعة تاني

اعراض تلف الكونتاك وتعمل اية لو حصل الموضوع دة معاك :

1 - هتلاقي اما بيعلق المارش او اصلا مفيش تكة مارش
2 - مفيش استاند باي مود او بيعلق ع الاستاند باي رغم انك شلت المفتاح
دي مشكلة فبرة الكونتاك .. اما لو محستش ان المفتاح بيرجع لوضعة الطبيعي يبقى سوستة الكونتاك
ويبقى ظلمنا الفبرة .

تعمل اية لو ضربت منك لاقدر الله فبرة الكونتاك او الكونتاك نفسة ؟
انا مش هشرح بالتفصيل علشان ممكن تدور العربية اساسا بدون كونتاك ودة اللى عملتة
اللى هقولة انك ممكن تدور المارش من برة .. شيل سلك اللقط .. وافتح كونتاك ولمس مكان سلك
اللقط ف الاتوماتيك بالجنب الموجب ف المارش وهتدور معاك من برة .

أو : ممكن تعمل سلكتين تدور بيهم مؤقتاّ من جوة ودة اللى عملتة وقتها عشان لقيت الناس اتلمت لما كنت بدور العربية ف البنزينة .. فضول ولا قلق مش مهم .. تركب كلبسة ف سلك 3 ملي مكان سلك اللقط ف الاتوماتيك بتاع المارش .. وتدخلها الصالون .. وفردة تانية توصلها بكهربة العربية او الفردة الموجب ف البطارية وتدخلها للصالون وانتهت الامر .

لو عايز تنور النور العالى وتشغل استاند باي وتفتح النور الصغير عن طريق الفيشة دي "الوحيدة المكونة من 10 اطراف"


اعمل كوبري زي منا عامل من اول فتحة رقم واحد ف الفيشة مع رقم تلاتة دة العالي
النور الواطي الاولي مع التانية
النور السهاري الاولي مع الرابعة

ازاي تفرق بين الصيني المضروب والايطالى الاصلي :
اولا : الاصلي الايطالى :
دة شكلة :

لون الفيشة بيكون مائل للروز + مفيش غير برشامة واحدة ف المنتصف
بيكون من شركة : ومحفور علية اللوجو دة

بالاضافة لنفس العلامة على الفبرة كذلك محفور علية Made in italy حوالين الكونتاك من برة على جسم الكونتاك نفسة

ملحوظة : الصيني مش بيكون محفور علية made in italy على بلاستيك او فبرة خارجية حولين مكان المفتاح ومش بيكون علية لوجو ماجينت .. لو لقيت الاتنين دول مع بعض اعرف ان دة صيني " هصور صورة بكرة بالنهار بأذن الله "

: الصيني المضروب :
شكل الفبرة بتاعتة بتكون كدة :

لونها بيكون اسود ودايما فيها 4 برشام .. واهم برشامة اللى ف النص هي دي الزتونة نفسها
ف الصيني بتضعف وبتبوظ


لا تخرج قبل ان تقول سبحان الله :D

على الهامش
لاحقا بأذن الله هبقى اكتب طريقة فك وتركيب الكونتاك بطريقة تسمح لك بفكة بكل سهولة بعد كدة
لانة بيجي بمسامير زنـبة .. بالاضافة لانواع كونتاك الريجاتا " كونتاك الريتمو ريجاتا و كونتاك الريجاتا "
علما ان الريتمو ريجاتا يشتغل عليها عادي على نفس الفيشة . يتـبع بأذن الله1

المشاركة الأصلية كتبت بواسطة omarcom

الاخ الحبيب nicegypt
ارجو منك افادتنا عن المكان اللي اشتريت منه الكونتاكت وهل هو جديد ولا استيراد وهل بالمفتاح ولا بدون ..
لأني تقريبا من شهرا الكونتاكت بتاعي علق وما كنشي عاوز يدور العربية خالص ..روحت لكهربائي (الله يسامحه) حاول فيه كتير ما نفعشي قالي لازم يتغير وانا كنت على سفر قولتله ماشي روحت دورت (وقتها كنت في بني سويف) ما لقتشي غير نوع صيني بـ ٩٠ جنيه جديد اضطررت اني اشتريه ركبته كان بيعلق في الدوارة قولت مش مشكلة اهو يمشي معايا شويه لحد ما ارجع القاهرة واشتري حاجه ايطالي اول ما وصلت القاهرة بدور في العربية ما دارتشي اكتشفت انه حرقلي الترس بتاع المارش المهم اتصرفت ودورت العربية عن طريق سلكين وروحت للكهربائي ظبطلي المارش وعملي توصيلة مكان الكونتاكت بعد ما لغاه وبقيت ادور من السلك .. سئلت في التوفيقة وفي الدقي وفي فيصل ما لقتشي خالص ايطالي ولا حتى صيني غير عن واحد في الدقي وبيقولي ايطالي وهو صيني وبـ ١٧٠ جنيه .. روحت عزبة شلبي لقيت بس بصراحة ما عجبنيش اشترية من غير ما يكون معايا العربية عشان اتأكد انه شغال ولا لأ ..
ارجو انك تنصحني اشترية منين وتقريبا بكام ..

انا اشتريتة من عند احمد الالفي .. المكان : اسأل على شارع الفيات امشى لاخر الشارع هتلاقي ف وشك
اخر محل .. بس وقتها مكننش عندة غيرة فانت وحظك .. لذلك متعمتدش على محل ف قطع الغيار
لازم تلف وتدور ومش معنى انك لقيتها انها مش ملعوب فيها لان اغلب الحاجات دى خردة وف الغالب مش شغالة .. يفضل تروح بعربيتك والفبرة اللى حوالين الدركسيون " قطمة الدركسيون الفبر " مفكوكة وجاهزة
يعنى تشيل الفيش من الكونتاك القديم وتجرب ف الجديد ف وقتها .. وخلي عربيتك برة لان شارع فيات ضيق ميدخلش فية عربية اصلا يعنى مضطر تدخل على رجلك تجيبة وترجع تجربة .. انا جبتة بـ 300 ج وسعر عالى طبعا بس للاسف مش لاقي زي اللى جبتة ولقيت الاقل منة وطلب فية 500 ج !!
المفروض ميعملش اكتر من 200 ج اساسا .. لكن استغلال الظروف .. فعموما اعمل حسابك ف 300 ج
دة اخرة نهائى لو عرفت تجيبة اقل من كدة فانت وشطرتك