الموضوع: ~بالصور: تقرير صيانة ال 60,000 لبروتون جين تو 2010~

السلام عليكم,

رجالة بروتون و أهل المنتدي الكرام, يا رب تكونوا بخير.

بعد 34 شهر من شراء العربية و 62,000 كم من الاستعمال, تم عمل صيانة ال 60 الف امبارح الحمد لله في مركز عصام صفا.

بصراحة أنا كنت عايز أعملها في التوكيل بما اني ساكن في زايد و التوكيل 10 دقائق من البيت, بس معملتهاش هناك لسببين. الأول لأنه برغم اني خرجت برة الضمان بالفعل مش عايزين يستعملوا اي زيت تاني غير توتال بتاعهم (أنا جايب كاسترول). و التاني ان سعر الصيانة بقي 2200 بعد ماكان 1836!

طبعاً بما اني مبحبش أروح التوكيل ماصدقت قمت مكلم مهندس عصام و الراجل بصراحة قمة في الاحترام قال لي تعالي و غير الزيت اللي انت عايزه.

رحت امبارح المركز الساعة 11:05 و المركز كان زحمة نسبياً فالعربية قعدت بتاع نص ساعة عقبال ما دخلت جوة, طبعاً في الوقت ده استلمها مني المهندس و سألني علي ملاحظاتي و كانت كالتالي.



1- تغيير لمبة فرامل ورا يمين.
2- تربيط التابلوه بالكامل و الدركسيون (هما مش سايبيين يعني بس ساعات بحس فيهم برعشة خفيفة).
3- تنظيف ال Multi Function.
4- تشحيم العفشة.
5- تعليق اللوك يمين ورا و تثبيت اللي قدام شمال عشان كان بيتهز.
6- تعليق لوك الشنطة.
7- تغيير فلتر التكييف. (عشان كفاية عليه كده.)

كلها حاجات عادية الحمد لله بس برضو ملاحظات بالنسبة لي.



المهم الساعة 11:37 بالفعل العربية دخلت و ابتدوا شغل فيها و انا بقي طلعت قعدت في الاستراحة شوية و بعدين نزلت اتكلمت مع مهندس عصام شوية و سألتوا علي تيول الفرامل الموجودة عنده, قالي عند البوش الايطالي أمامي و عنده نوع جديد كندي اسموا Hardex و ده ب 200 جنيه سواء أمامي أو خلفي, و ماجالوش Feedback عليه لسه بما انو جديد.








المهم بعد ساعتين لساعتين و نص تم الانتهاء من الصيانة و خروج العربية برة المركز.



طلعت ادفع الفاتورة فوق و كانت 2025 جنيه (متضمن سعر فلتر التكييف الجديد 100 جنيه) و غير متضمن سعر الزيت لأن أنا اللي جايبه, بس في النهاية السعر أقل من التوكيل حوالي 300 جنيه و ده لأن مهندس عصام الله يباركله مزودش سعر المصنعية بعد زيادة سعر الدولار زي ما معظم التوكيلات عملت.

شكرت الراجل و سلمت و مشيت تقريباً الساعة 2 من هناك.

الملاحظات بعد الصيانة.

1- تم تغيير اللمبة في كشف الكهرباء.
2- الرعشة اختفت.
3- تم تنظيف ال Multi Function و بقي شغال تمام.
4- العفشة اتشحمت و ده العادي في الصيانة.
5- ال Locks ظبطت و فتح مقابض البابين بقوا أنعم.
6- تم ظبط قفل الشنطة.
7- فلتر التكييف اتغير.

نيجي بقي للملاحظات الأهم:

1- هدوووء بشكل ملحووظ و غير مسبوق في صوت الموتور, يمكن أهدي من صوته و هو زيرو.
2- السحب قل و ده لأني غلطت و شيلت البوجيهات البوش بلاتينوم و حطيت ال NGK العادية بتاعة التوكيل.
3- العربية بقت ماسكة نفسها أكتر علي الطريق (تربيط عفشة ليس إلا).

و في النهاية أرجو ان التقرير يكون عجبكوا و الي عندوا أسئلة يتفضل يسأل.

تحياتي.

المشاركة الأصلية كتبت بواسطة yousefsemsem

الف مبروك عليك الصيانه

الله يبارك فيك, متشكر.

المشاركة الأصلية كتبت بواسطة youssef_u

الف مبروك و عقبال ٦٠٠ الف

يا رب ان شاء الله ههههههه, الله يبارك فيك. :)

المشاركة الأصلية كتبت بواسطة nistelrooy

الف مبروك يا شاركي وعقبال صيانة الـ 100 الف :)) .. ايوا بقي رجع تقارير زمان :)

بس احسن حاجة في عصام صفا الراحة النفسية انا اخرة مرة جبت معايا اكل ديلفري واعدت فوق وشغلت التلفزيون وبراحتي بقي ولا كاني في بيتي وبعمل شاي لنفسي واخر حلاوة :)) ..

أنا و الله بحاول أرجع أي حاجة اهو ههههههههههه.

أه بصراحة أنا بروح هناك بحس اني وسط اهلي و عشيرتي (محدش يضرب) و بعمل شاي و نسكافيه و كله.

المشاركة الأصلية كتبت بواسطة chahutpartout

الف مبروك و ربنا يباركلك فيها
و عقبال صيانة ال100 الف

الله يبارك فيك, أمين يا رب.

المشاركة الأصلية كتبت بواسطة shshtawy

ممكن حضرتك تكتب لنا العربية ( سعر العربية كام ) لان بسم الله مشاء الله باين عليها زى الفل
اصل انا متردد مابين جديد وقسط وخلافة ومابين مستعمل وقلق المستعمل بس بفكر اشوف حاجة مستعملة زى ماحضرتك عملت واطلع على مركز الاستاذ عصام صفا ويعمل فيها كل كبيرة وصغيرة وزى ماتطلع بيتهيقلى مش هتعدى ال8 الاف جنية لانى قريت موضع عن واحد غير حاجات كتير جدا فلاتر ومساعدين وسيور وتكلفت 6000 جنية ومصنعية 2200

أنا جايب العربية زيرو من 3 سنين, دلوقتي سعرها في حدود 75-79 الف لو فابريقة برة و جوة. لو هتجيب مستعمل رخيص اكشف عليها كويس الأول.

المشاركة الأصلية كتبت بواسطة tutankhamoun

ما شاء الله و لا قوة إلا بالله .
أنا لسة ما أتعاملتش معاهم (عصام و صفا نهائيا )
بس كل الناس بتشكر فيهم و ما شاء الله ده وقت قصير لعمل الصيانة .

و مبروك الصيانة و ربنا يباركلك في العربية و يستر طريقك

الله يبارك فيك يا توت و يفضل تتعامل معاهم و لو للتجربة, حتي تقابل المهندس عصام المحترم.

و شكراً لدعائك.

المشاركة الأصلية كتبت بواسطة eng f3lix

الف الف مبروك على الصيانة

انا كنت فاكر القسم ده خلاص مات ومحدش بيدخله :)

الله يبارك فيك يا فيلكس باشا, كفاية دخلتك و الله.

المشاركة الأصلية كتبت بواسطة mido_soliman

مبروك يا حودة وعقباااااااااااالى :)

الله يبارك فيك يا أبو حميد, مش كنت تيجي, كان زماننا عاملين تقرير مزدوج, هههههههه.