الموضوع: تقييم لمركز تكنو فورد (تكنو وان)

السلام عليكم،

أنا كنت لسة شاري فورد فوكاس 2007 و بما ان صيانتها كانت في التوكيل، و بما ان التوكيل أسعاره غالية حبتين، قلت أروح حاجة قريبة اللي هي مركز "تكنوفورد" اللي في السلام - الحرفيين.

أولا : بالنسبة لأسعار قطع الغيار، فهي فعلا رخيصة (أنا بتكلم علي الأصلي أو حتي اللي قريب من الأصلي) يعني حتي أرخص من يافا اللي في شارع دمشق، و لكن اللي لاحظتوا كالآتي : ان الأسعار المتميزة دي بيتم تعويضها في المصنعية، يعني أنا دافع مصنعية حوالي 750 جنيه في تغيير تيل أمامي و خلفي، تغيير كارتيرة أمامية، تغيير سيور و صيانةعامة. طبعا ممكن دة يكون سعر مناسب لتوكيل زي فكري جروب و الحقيقة أنا كلمتهم و سألتهم علي سعر المصنعية للحاجات دي فقالولي نفس السعر تقريبا بس زايد عليها 10% فبيتهيألي ان أسعار المصنعيات في تكنو فورد محتاجة تتراجع شوية.

ثانيا : بالنسبة للخدمة، فهي كويسة جدا بصراحة، يعني العربية بتتصان كويس و تقفيل كل حاجة بيبقي بنضافة و من غير مشاكل. أنا الحاجة الوحيدة اللي ضايقتني كانت ان في عامل كان بيغير فيوزات جوة العربية، فمحطش كيس علي الفرش فللأسف الفرش اتوسخ و مش عارف هشيل الشحم اللي عليه دة ازاي، بس غير كدة أنا بصراحة خارج من عندهم مطمن ان العربية كويسة و مافيهاش أي حاجة، يعني بيكشفوا علي كل حاجة بضمير و دة يمكن اللي بيميز أي مركز عن أي ميكانيكي لأن الميكانيكي مهما كان كويس مش هيبقي عنده الامكانيات أو الوقت اللي يخلليه يكشف علي كل حاجة في العربية.

ثالثا : بالنسبة للمعاملة، فهي كويسة جدا خصوصا من مهندس هناك اسمه زكريا. طبعا في حاجات ماعجبتنيش زي ان في عميل كان اتعصب عشان مشكلة تأمين، فقالولوا "خلاص مش هنصلحلك حاجة، اتفضل من هنا" فبيتهيألي ان لازم يكون في صبر علي العملاء حتي لو كان عميل مجنون، هو في الأول أو في الآخر رايح لمركز صيانة مش ميكانيكي.

رابعا : بالنسبة لموقع المركز فهو مش يعيد قوي عني (أنا في التجمع) بس المنطقة بصراحة غير مريحة نفسيا يعني لو في العبور مثلا هيبقي أحسن, بس هما معوضين دة باستراحة مكيفة ظريفة يعني.

من الآخر، أنا كنت عايز أجرب المركز بنفسي عشان أقيمه بنفسي و لاقيته بصراحة غير اللي بيتقال، يعني يمكن فيه عيوب بس التقييم العام جيد جدا. يعني بإذن الله لو سعر المصنعيات مش هيزيد عن كدة أنا هعمل عندهم صيانة ال10 آلاف اللي جاية عندهم بس أتمني طبعا ان الصيانة تتعمل في وقت أسرع شوية. بس أنا أنصح أي حد معاه فوكاس انه يروحوا بشكل عام الا لو اكتشفنا حاجة أفضل.

المشاركة الأصلية كتبت بواسطة reda elgohary

طيب أنا معايا فورد كا 1997 ولسه شاريها مستعملة وهى بتسرب أو بتنقط زيت باور ،،تنصحنى أروح بها لمياكنيكى ولا المركز ده ،،خصوصا أنا ساكن ف المرج قريب جدا من الحرفيين؟؟؟

والله لو حضرتك محافظ علي العربية و مع حضرتك فلوس ممكن آه تروح لتكنو فورد، أنا شفت هناك كا..
بس بصراحة أنا لو مكان حضرتك ممكن برضه أروح لميكانيكي علي أساس إن العربية قديمة شوية، بس بشكل عام لو تكنو فورد أقرب من الميكانيكي و مع حضرتك فلوس و حضرتك عايز شغل كويس يبقي ليه لأ ؟